قازاقستان ۇكىمەت الەمدىك ەكونوميكادا ورىن العان كۇردەلى جاعدايعا قارسى ارەكەت ەتۋدىڭ بىرنەشە نۇسقاسىن ازىرلەدى.

بۇل تۋرالى بۇگىن ۇكىمەت وتىرىسىندا قر پرەمەر-ءمينيسترى اسقار مامين ايتتى، دەپ حابارلايدى قازاقپارات ءتىلشىسى.

«وزدەرىڭىزگە ءمالىم، الەمدەگى ەكونوميكالىق جاعداي كۇردەلى بولىپ تۇر. سىرتقى ەكونوميكادا كونيۋنكتۋرانىڭ تەرىس سەرپىنى بايقالىپ وتىر. بىرقاتار ءىرى حالىقارالىق قارجى ۇيىمدارى مەن دامۋ ينستيتۋتتارى بيىلعى جىلى الەمدىك ەكونوميكا ءوسىمى بولجامىنىڭ تومەندەگەنىن حابارلادى. وپەك+ مۇنايدىڭ نەگىزگى ەكسپورتتاۋشى ەلدەرى اراسىنداعى مۇناي ءوندىرۋدى شەكتەۋ بويىنشا ورتاق كەلىسىمگە قول جەتكىزبەۋى سەبەبىنەن مۇنايدىڭ الەمدىك باعاسى ايتارلىقتاي تومەندەۋىنە الىپ كەلدى»،- دەدى ۇكىمەت باسشىسى.

دەگەنمەن، ونىڭ ايتۋىنشا، ۇلتتىق ەكونوميكاداعى جاعداي بيىلعى 2 ايدىڭ ناتيجەسى بويىنشا 3,3 پايىز دەڭگەيىندە ساقتالىپ وتىر. ەكونوميكانىڭ شيكىزاتتىق ەمەس سالالارىندا ءوسىم بايقالۋدا. وڭدەۋشى ونەركاسىپ 9,4, ونىڭ ىشىندە كولىك جاساۋ 72,2, جەڭىل ونەركاسىپ 12,4, مۇناي وڭدەۋ 9,8 جانە مەتاللۋرگيا 8,2 پايىزعا ءوستى. تاۋ-كەن سالاسى 4,7, سونىڭ ىشىندە مەتالل كەندەرىن ءوندىرۋ 8,8 جانە تابيعي گاز ءوندىرۋ 4,1 پايىزعا ارتتى. سونىمەن قاتار قۇرىلىس 11,9 جانە بايلانىس 10,7 پايىزعا ءوسىم كورسەتتى. ينفلياتسيا نىسانالى 6-8 پايىز شەگىندە ساقتالىپ وتىر. نەگىزگى كاپيتالعا ينۆەستيتسيالار 11,6 پايىزعا، ال جەكە ينۆەستيتسيالار 12,1 پايىزعا ۇلعايدى.

«بۇل رەتتە قالىپتاسقان جاعدايدى ەسكەرە وتىرىپ، پرەزيدەنتتىڭ تاپسىرماسى بويىنشا شۇعىل ارەكەت ەتۋ شتابى جانە بارلىق وڭىرلەردە ءتيىستى شتابتار قۇرىلدى. ۇكىمەت وسى جاعداي ودان ارى قاراي دامۋىنىڭ بىرنەشە نۇسقاسىن ازىرلەدى. ءار نۇسقا قاجەتتى قارجى رەسۋرستارمەن قامتاماسىز ەتىلگەن. بۇل شارالاردىڭ ماقساتى حالىقتىڭ ءال-اۋقاتىنىڭ ساقتالۋىن قامتاماسىز ەتۋ بولىپ سانالادى. ازاماتتارىمىزدىڭ ەشقايسىسىن قيىن جاعدايدا قالدىرمايمىز»، - دەدى اسقار مامين.

Abai.kz