بۇگىن اتىراۋ وبلىسى اكىمىنىڭ ورىنباسارى بولىپ باقىتگۇل حامەنوۆا تاعايىندالدى،- دەپ حابارلايدى قازاقپارات.

اتىراۋ وبلىسىنىڭ اكىمى ماحامبەت دوسمۇحامبەتوۆ جاڭا ورىنباساردى اكتيۆ جينالىسىنا تانىستىردى.

بۇعان دەيىن باقىتگۇل قايىرجانقىزى قر پارلامەنت ءماجىلىسىنىڭ دەپۋتاتى بولعان ەدى.

ول ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىن قازاق ءتىلى جانە ادەبيەتى پاندەرىنىڭ مۇعالىمى ماماندىعىمەن، ءال-فارابي اتىنداعى قازاق ۇلتتىق ۋنيۆەرسيتەتىنىڭ اسپيرانتۋراسىن بىتىرگەن. كەيىن اتىراۋ مۇناي جانە گاز ينستيتۋتىن، م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىن تامامداعان. فيلولوگيا عىلىمدارىنىڭ كانديداتى.

1999-2001 جىلدارى اتىراۋ وبلىستىق تەلەراديو-اقپاراتتىق كومپانياسىنىڭ ديكتورى، رەداكتورى، 2001-2004 جىلدارى اتىراۋ مۇناي جانە گاز ينستيتۋتىنىڭ قازاق جانە ورىس تىلدەرى كافەدراسىنىڭ وقىتۋشىسى، ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ ەليتارلىق مەكتەبى ديرەكتورىنىڭ تاربيە جۇمىسى جونىندەگى ورىنباسارى بولىپ جۇمىس ىستەگەن.

2004-2005 جىلدارى «راحات تۆ» اتىراۋ تەلەراديو حابارلارىن تاراتۋ فيليالى قازاق رەداكتسياسىنىڭ ءتىلشىسى، 2005-2016 جىلدارى اتىراۋ كاسپي ءوڭىرىنىڭ قازىرگى زامانداعى كوللەدجىنىڭ ديرەكتورى بولعان.

2016 جىلعى 24 ناۋرىزدان التىنشى سايلانعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى.

«نۇر وتان» پارتياسىنىڭ مۇشەسى، پارتيانىڭ ساياسي كەڭەسىنىڭ مۇشەسى، قر پرەزيدەنتىنىڭ العىس حاتىمەن، ىبراي التىنسارين، «ءبىلىم بەرۋ ءىسىنىڭ قۇرمەتتى قىزمەتكەرى»، «بەلسەندى قىزمەتى ءۇشىن» توسبەلگىلەرىمەن، «قۇرمەت» وردەنىمەن ماراپاتتالعان.

Abai.kz