ۇكىمدى تىڭداۋعا سوتتالۋشىلاردىڭ تۋىستارى مەن قورعاۋشىلارى، پروكۋرور كەلدى. سۋديا ءابينۇر قاراباەۆ ۇكىم وقىپ جاتقاندا سوتتالۋشىلاردىڭ تۋىستارى جىلاپ تۇردى.
بۇرىنعى وڭتۇستىك قازاقستان وبلىستىق (قازىرگى تۇركىستان وبلىسى - رەد.) مەملەكەتتىك كىرىس دەپارتامەنتى باسشىسىنىڭ ورىنباسارى نۇرلان تەڭلىباەۆ پەن «قاپلانبەك» كەدەن بەكەتىنىڭ باسشىسى ەركىن بايساپاروۆ «ءىرى مولشەردە بىرنەشە رەت پارا العانى» ءۇشىن كىنالى دەپ تانىلىپ، 10 جىلعا باس بوستاندىعىنان ايىرىلدى.
وبلىستىق كىرىس دەپارتامەنتىنىڭ باسقارما باسشىسى سەيىتجان ەشتاەۆ، «قازىعۇرت» كەدەن بەكەتىنىڭ باسشىسى نۇرلان وسپانوۆ «ءىرى مولشەردە بىرنەشە رەت پارا العانى» ءۇشىن 4 جىلعا سوتتالدى. سوت وعان ۇكىم شىعاراردا تەرگەۋ كەزىندە وزگە قىلمىسكەرلەردى تابۋعا كومەكتەسكەنىن ەسكەرگەن.
«سارىاعاش ستانتسياسى» كەدەن بەكەتىنىڭ باسشىسى الماس جۇماباەۆ پەن بىرنەشە كەدەن بەكەتىنىڭ بەس قىزمەتكەرى «ءىرى مولشەردە بىرنەشە رەت پارا العانى» ءۇشىن 7 جىلعا، تاعى ءبىر قىزمەتكەر «ايتارلىقتاي مولشەردە پارا العانى» ءۇشىن 4 جىلعا باس بوستاندىعىنان ايىرىلدى.
«سارىاعاش ستانتسياسى» كەدەن بەكەتىنىڭ باس مامانى مەن ءۇش ازامات پاراقورلىققا دەلدال بولعانى ءۇشىن 1 جىلدان ءتورت جارىم جىلعا دەيىن سوتتالدى. 2018 جىلدىڭ ماۋسىم ايىندا قاماۋعا الىنعان ءۇش دەلدال جازانى تولىق وتەپ شىققانى ءۇشىن، سوت زالىنان بوساتىلدى.
سوتتالعان 4 كەدەنشى ايىبىن تولىق مويىنداعان، 11 ادام تاعىلعان ايىپپەن كەلىسپەگەن. سوتتالۋشىلاردىڭ بارلىعى جازاسىن قاۋىپسىزدىگى بارىنشا تومەن تۇزەۋ مەكەمەسىندە وتەيدى.
«سارىاعاش ستانتساسى» كەدەن بەكەتىنىڭ قىزمەتكەرى ەسقاراەۆ پارا العانى دالەلدەنبەگەن سوڭ اقتالدى» دەدى سۋديا قاراباەۆ.
ۇكىمگە قاتىستى سوتتالۋشىلار قانداي دا ءبىر كوممەنتاري بەرمەدى.
ايىپتاۋ اكتىسىنە ساي، سوتتالۋشىلار تاۋار تاسىعان كاسىپكەرلەردەن 20 ميلليون تەڭگەگە دەيىن پارا العان. كۇدىكتىلەر 2018 جىلدىڭ ماۋسىم ايىندا ۇستالعان. 2019 جىلدىڭ شىلدە ايىندا ءىس سوتقا تۇسكەن. 180 تومعا جۋىقتاعان «كەدەنشىلەر» ىسىندە 16 ادام ۇستالىپ، ولاردىڭ جەتەۋى قامالعان. ۇشەۋى تەرگەۋ كەزىندە قىلمىستىق ءىستى اشۋعا كومەكتەسكەنى ءۇشىن ۇيقاماقتا بولىپ، قالعانى كەپىلمەن بوساتىلعان.
2018 جىلى «كەدەنشىلەر ءىسى» بويىنشا كۇدىككە ىلىنگەن ەكى ادامعا ىزدەۋ جاريالانعانىمەن، ءالى تابىلعان جوق.
Abai.kz
