قر دەنساۋلىق ساقتاۋ مينيسترلىگى الماتى قالاسىندا تاعى ەكى ادامنىڭ كوروناۆيرۋس جۇقتىرعانىن مالىمدەدى.

-وسى ساعاتتا الماتى قالاسىندا - 17 ادام، نۇر-سۇلتان قالاسى بويىنشا 18 ادام، جالپى 35 ناۋقاس تىركەلدى، - دەلىنگەن دەنساۋلىق ساقتاۋ مينيسترلىگىنىڭ سايتىندا.

ەسكە سالايىق، كەشە نۇر-سۇلتان مەن الماتى قالاسىندا كارانتين جاريالاندى. مۇنداي شەشىمدى پرەزيدەنت جانىنداعى توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيا قابىلدادى.

پرەمەر-مينيستر اسقار ءماميننىڭ توراعالىعىمەن قر پرەزيدەنتى جانىنداعى توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ وتىرىسى ءوتتى.

نۇر-سۇلتان جانە الماتى قالالارىندا COVID -19 تارالۋ جاعدايىن ەسكەرە وتىرىپ، سونداي-اق قازاقستاننىڭ باسقا قالالارىنا كوروناۆيرۋستىڭ تارالۋىنىڭ الدىن الۋ ماقساتىندا مەملەكەتتىك كوميسسيا نۇر-سۇلتان جانە الماتى قالالارىندا قوسىمشا شەكتەۋ، الدىن الۋ جانە ەپيدەمياعا قارسى شارالاردى ەنگىزۋ تۋرالى شەشىم قابىلدادى.

Abai.kz