سوت اپپازوۆتى قىلمىستىق كودەكستىڭ 362 بابى ("بيلiكتi نەمەسە لاۋازىمدىق وكiلەتتiكتەردى اسىرا پايدالانۋ") مەن 107 بابى ("دەنساۋلىققا قاساقانا اۋىرلىعى ورتاشا زيان كەلتiرۋ") باپتارى بويىنشا ايىپتى دەپ تانىدى. بۇعان قوسا سۋديا شەنەۋنىكتى مەملەكەتتىك قىزمەت اتقارۋ قۇقىعىنان ءومىر بويىنا ايىردى جانە ارزاماسوۆاعا 1 ميلليون تەڭگە مورالدىق، 380 مىڭ تەڭگە ماتەريالدىق شىعىن، سونداي-اق سوت شىعىندارىن تولەۋگە مىندەتتەدى.
سونىمەن قاتار اپپازوۆتى وسى سوتقا جابىرلەنۋشىنىڭ ءبىرى رەتىندە قاتىسىپ وتىرعان بولات جاكىشەۆكە ماتەريالدىق شىعىن رەتىندە 760 مىڭ تەڭگە، مورالدىق شىعىن رەتىندە 200 مىڭ تەڭگە تولەۋدى مىندەتتەدى.
نۇرعالي اپپازوۆقا "2016 جىلى قىلمىستىق توپ ۇيىمداستىرىپ، بەلسەندى بولات جاكىشەۆتىڭ دەنساۋلىعىنا زيان كەلتىردى" دەپ ايىپ تاعىلعان بولاتىن.
تالعار اۋدانىنا قاراستى قارابۇلاق اۋىلىنىڭ تۇرعىنى، بەلسەندى گالينا ارزاماسوۆاعا "قاستاندىقتى ۇيىمداستىرۋشى" رەتىندە تانىلعان نۇرعالي اپپازوۆقا قىلمىستىق ءىستىڭ بىرنەشە بابىمەن ايىپ تاعىلعان. سۋديا ءىلياس مۇحاديۇلى ونىڭ كەيبىرى دالەلدەنبەگەنىن ايتتى.
ارزاماسوۆاعا قاستاندىق بويىنشا ايىپ تاعىلعانداردىڭ ءبىرى عاني سمانوۆ سوت زالىنان بوستاندىققا شىقتى. ول قىلمىستىق كودەكستىڭ 107 بابى بويىنشا ("دەنساۋلىققا قاساقانا اۋىرلىعى ورتاشا زيان كەلتىرۋ") كىنالى تانىلىپ، جابىرلەنۋشى ارزاماساوۆاعا كەلتىرگەن زالالدىڭ ورنىن تولتىرعانى جانە ونىمەن تاتۋلاسۋىنا بايلانىستى بوستاندىققا شىعارىلدى.
11 ناۋرىزدا وتكەن سوت وتىرىسى كەزىندە جابىرلەنۋشى گالينا ارزاماسوۆا "عاني سمانوۆتىڭ اتپاعانىن، سوت ساراپتاماسى وقتىڭ كولىك ىشىنەن ەمەس، باسقا باعىتتان اتىلعانىن انىقتاعانىن جانە ونىڭ (سمانوۆتىڭ) ماتەريالدىق شىعىنداردى تولىق وتەگەنىن" ايتىپ، وعان قوزعالعان قىلمىستىق ءىستى توقتاتۋدى سۇراعان بولاتىن.
سوت ۇكىمىمەن جەتى جىلعا باس بوستاندىعىنان ايرىلعان 40 جاستاعى نۇرعالي اپپازوۆتىڭ كامەلەتكە تولماعان بەس بالاسى بار. اپپازوۆتىڭ قورعاۋشىسى باقىتگۇل قۇداباەۆا سوت ۇكىمىمەن كەلىسپەيتىنىن، اپەللياتسيالىق سوتقا جۇگىنەتىنىن ايتتى.
جابىرلەنۋشى گالينا ارزاماسوۆا سوت شەشىمىنە قاناعاتتاناتىنىن ءبىلدىردى. ول سوتقا دەيىنگى تەرگەۋ كەزىندە كۇدىكتىلەرگە تاعىلعان ايىپتاردى قاتاڭداتۋ جونىندە بىرنەشە رەت تالاپ قويعان.
الماتى وبلىسى تالعار اۋدانىنا قاراستى قارابۇلاق اۋىلىندا تۇراتىن بەلسەندى گالينا ارزاماسوۆا 2019 جىلدىڭ 26 تامىزىندا تالعار اۋدانىنىڭ بۇرىنعى اكىمى رىسكەلدى ساتباەۆتىڭ قابىلداۋىنا كەلگەندە اكىمدىك عيماراتىنىڭ ماڭىندا ونى بەلگىسىز ادام تۋ سىرتىنان پنەۆماتيكالىق قارۋمەن اتقانەدى. جامباس سۇيەگى زاقىمدانعان بەلسەندى اۋرۋحاناعا تۇسكەن.
ەرتەڭىنە پانفيلوۆ اۋىلدىق وكرۋگىنىڭ سول كەزدەگى اكىمى نۇرعالي اپپازوۆتىڭ جۇرگىزۋشىسى كۇدىكتى رەتىندە ۇستالىپ، وعان قىلمىستىق كودەكستىڭ 293-بابىنىڭ ("بۇزاقىلىق") 3-بولىگى ("اتىس قارۋىن، گازدى قارۋدى، پىشاقتاردى، كاستەتتەردi جانە وزگە دە سۋىق قارۋدى نە دەنساۋلىققا زيان كەلتiرۋ ءۇشiن ارنايى لايىقتالعان باسقا دا زاتتاردى قولدانىپ نەمەسە قولدانۋعا تىرىسىپ جاسالعان ءىس-ارەكەتتەر") بويىنشا ءىس قوزعاعان. تامىزدىڭ 29-ىنا اۋىل اكىمى نۇرعالي اپپازوۆ "تاپسىرىس بەرۋشى" رەتىندە قاماۋعا الىنعان.
2020 جىلدىڭ 14 قاڭتارىنا وتكەن سوت پروتسەسىندە اۋدان پروكۋرورى ايىپتاۋ اكتىسىندە "وكرۋگتىڭ بۇرىنعى اكىمى ءوزىنىڭ كولىك جۇرگىزۋشىسىنە ارزاماسوۆانى پنەۆماتيكالىق تاپانشامەن اتۋ جانە ءۇيىنىڭ اۋلاسىنا جانارماي بوتەلكەسىن لاقتىرۋ تۋرالى ءوتىنىش جاساعانىن" ايتتى.
64 جاستاعى گالينا ارزاماسوۆا مەكتەپتە مۇعالىم بولىپ ىستەگەن. كەيىنگى جىلدارى اۋىلدىڭ الەۋمەتتىك ماسەلەسىن قوزعايتىن بەلسەندىگە اينالعان. ول وزىنە جاسالعان قاستاندىقتى "قىسىم" دەپ باعالايدى.
Abai.kz
