20 ناۋرىز كۇنى «جەبەۋ» رەسپۋبليكالىق قوعامدىق بىرلەستىگى ەلباسى مەن مەملەكەت باسشىسىنىڭ ۇندەۋىنە ءۇن قوسىپ، الماتىداعى دەنساۋلىق ساقتاۋ ۇيىمدارىنا كومەك كورسەتتى.

«جەبەۋ» رەسپۋبليكالىق قوعامدىق بىرلەستىگىنىڭ توراعاسى ءومارالى ادىلبەكۇلى، بىرلەستىكتىڭ كەڭەس مۇشەسى، بەلگىلى كاسىپكەر سابىرجان مۇحامەتحانۇلى، اتقارۋشى ديرەكتورى قۇرمەت قابىلعازىۇلى قۇنى ميلليون تەڭگەلىك ماسكا جانە انتيسەپتيكالىق ءدارى-دارمەكتى الماتى قالالىق № 12 ەمحانا مەن قالالىق دەنساۋلىق ساقتاۋ باسقارماسىنا تابىس ەتتى.

«جەبەۋ» قايىرىمدىلىق ماقساتتاعى اتالعان بۇيىمداردى قر ءىىم الماتى قالالىق توتەنشە جاعدايلار دەپارتامەنتىنىڭ باس شتابىنا الىپ بارعان بولاتىن، ونداعىلار قالالىق №12 ەمحاناعا جەتكىزۋگە نۇسقادى. باس دارىگەر الماز بولاتۇلىنىڭ تاپسىرماسى بويىنشا زاتتاردى وسى ەمحانا قىزمەتكەرلەرى مەن وسىنداعى قالالىق دەنساۋلىق باسقارماسىنىڭ وكىلدەرى قابىلداپ الدى. دەنساۋلىق باسقارماسىنىڭ وكىلدەرى جەبەۋلىكتەرگە ريزاشىلىق ءبىلدىرىپ، مىناۋ قيىن-قىستاۋ شاقتا دەنساۋلىق ساقتاۋ قىزمەتكەرلەرى مەن مۇقتاج جانداردىڭ يگىلىگى ءۇشىن جاسالىپ جاتقان رياسىز كومەككە العىس ايتتى.

بىرلەستىك توراعاسى ءومارالى ادىلبەكۇلى ەل باسىنا كۇن تۋعان ساتتەردە قاراپ قالماۋ، ەل مۇددەسىنە جۇمىلا قىزمەت جاساۋدىڭ ەلىمىزدەگى ءاربىر ازامات پەن ارقانداي ۇيىمىنىڭ، ونىڭ ىشىندە ۇكىمەتتىك ەمەس ۇيىمداردىڭ دا باس تارتپاس بورىشى ەسەپتەلەتىنىن، ءوزى باسشىلىق جاساپ وتىرعان بىرلەستىكتىڭ قاتارلاس قوعامدىق ۇيىمداردى وسىنداي شارالارعا اتالسالىسۋعا شاقىراتىنىن جەتكىزدى.

«ۇلتىمىزدىڭ تاعدىرى، ۇرپاعىمىزدىڭ بولاشاعى ءوز قولىمىزدا. ۋاقىت بىزدەن ەشقانداي كەراناۋلىقتى، سالعىرتتىقتى كۇتپەيدى. جاۋاپكەرشىلىك پەن ءتارتىپتى تالاپ ەتەدى. بارلىق ازاماتتار، كاسىپكەرلەر، مەكەمەلەر، قوعامدىق ۇيىمدار پرەزيدەنتتىڭ جانە ەلباسىمىزدىڭ ۇندەۋىنە ءۇن قوسايىق. ءبارىن دە وزىمىزدەن باستايىق. دەنساۋلىق ساقتاۋ ۇيىمدارىنىڭ، قۇقىق قورعاۋ ورگاندارىنىڭ  تالابى مەن ءوتىنىشىن ورىنداپ، وتباسىمىزعا، اينالامىزعا ۇلگى بولايىق. سونىمەن بىرگە شامامىزدىڭ كەلىسىنشە وسى قيىندىقتان شىعۋ ءۇشىن زاتتىق، رۋحاني كومەگىمىزدى كورسەتىپ، قولداۋ بىلدىرەيىك. الەمدىك تاجىريبەدەن بايقاپ وتىرمىز، بۇل اۋرۋدى ەڭسەرگەن ەلدەردىڭ باستى قارۋى: قاتاڭ ءتارتىپ، بەرەكە-بىرلىك، عىلىمعا دەگەن سەنىم، جاقسى ادەپ-عۇرىپ. مىسالى، يزرايلدە بىردە-ءبىر دارىگەرگە دەرت جۇقپاعان، ءارى دەرت جۇقتىرعان كىسىلەر ءدىن امان. جاپونيا، كورەيا سىندى دامىعان ەلدەر عىلىم مەن تارتىپكە جۇگىنە وتىرىپ، اۋرۋ وشاعىن قاتاڭ تىزگىندەدى. قازاقيانىڭ كەشەسى، بۇگىنى، ەرتەڭى بارىمىزگە ورتاق، ەل بولىپ ءبىر جاعادان باس، ءبىر جەڭنەن قول شىعارىپ كوروناۆيرۋس دەگەن تاجالدىڭ تامىرىنا بالتا شابايىق», - دەپ ۇندەۋ تاستادى جەبەۋلىكتەر.

Abai.kz