قازاقستاننىڭ جەتىنشى قورعانىس ءمينيسترى بولىپ، وسى كرەسلونىڭ بوساعانىنا تۋرا جەتى كۇن تولعاندا، ادىلبەك جاقسىبەكوۆ تاعايىندالدى. بۇل جايىندا كەشە قازتاگ اگەنتتىگى پرەزيدەنتتىڭ ءباسپاسوز قىزمەتىنە سىلتەمە جاساي وتىرىپ، حاباردار ەتتى.

قازاقستاننىڭ جەتىنشى قورعانىس ءمينيسترى بولىپ، وسى كرەسلونىڭ بوساعانىنا تۋرا جەتى كۇن تولعاندا، ادىلبەك جاقسىبەكوۆ تاعايىندالدى. بۇل جايىندا كەشە قازتاگ اگەنتتىگى پرەزيدەنتتىڭ ءباسپاسوز قىزمەتىنە سىلتەمە جاساي وتىرىپ، حاباردار ەتتى.
جاڭا ءمينيستردى ۇجىمىنا تانىستىرا وتىرىپ، ن.نازارباەۆ «جاقسىبەكوۆ - اتالعان جۇمىس ورنىندا قاجەت ادامنىڭ ءدال ءوزى. ونىڭ ۇيىمداستىرۋشىلىق جۇمىستا مول تاجىريبەسى بار»، - دەپ، جىلى سوزدەرىمەن جەبەي كەتىپتى. سونىمەن بىرگە، ەلباسى قارۋلى كۇشتەر جايىن قاپەرىنەن شىعارمايتىنىن، بيىلدىڭ وزىندە قورعانىس ۆەدومستۆاسىنا 140 ملرد-تاي قارجى بولىنگەنىن، 3 مىڭنان استام اسكەريلەرگە جاڭا پاتەر كىلتى تاپسىرىلعانىن ايتا كەتكەن. وسىلايشا، ن.نازارباەۆ ءوزىنىڭ سەنىمدى دەگەن ساربازىنا تاعى ءبىر تەست سىناعىن تاپسىرىپ وتىر. بۇدان سۇرىنبەسە، جاقسىبەكوۆتىڭ ساياسات وليمپىندەگى جۇلدىزى دا ءال-ءازىر سونە قويماس. نە دەسەك تە، نازارباەۆ وسى شەشىمىمەن «احمەتوۆتەن كەيىن ازاماتتىق تۇلعا قورعانىس سالاسىنا باسشى بولمايدى-اۋ» دەگەن ءبىرتالاي ساراپشىنىڭ اۋزىنا قۇم قۇيدى. ەندى كينەماتوگرافيا مامانى قورعانىس سالاسىنا باسشى بولسا، بۇعان قارسى نە دەپ ءۋاج ايتارسىز؟ ارينە، ماسەلە ونىڭ جاس كەزىندە العان ماماندىعىنا تىرەلىپ تۇرعان جوق شىعار. ادىلبەك رىسكەلدىۇلى - وزىنە سەنىپ تاپسىرىلعان جۇمىستاردى شاما-شارقىنشا اتقارىپ، جاماندى-جاقسىلى الىپ جۇرگەن مەملەكەتتىك باسقارۋشى. ەستەرىڭىزدە بولسا، ول استانا قالاسىنىڭ العاشقى اكىمى بولدى، يندۋستريا جانە ساۋدا مينيسترلىگىنىڭ دە قۇلاعىن ۇستادى. ءبىرتالاي ۋاقىت «نۇر وتان» پارتياسى مەن پرەزيدەنت اكىمشىلىگىنىڭ باسشىلىعىندا دا بولدى. وسىنداي جاۋاپتى لاۋازىمداردان سوڭ اقورداداعى قىم-قۋىت تىرشىلىكتەن الىس، رەسەي فەدەراتسياسىنداعى ەلىمىزدىڭ توتەنشە جانە وكىلەتتى ەلشىسى مىندەتىن اتقارۋ  - وعان بەرىلگەن زاڭدى دەمالىس سياقتى ەتىن. ەندى مىنە، 2008 جىلدىڭ قاراشاسىنان بەرگى «قىسقا دەمالىسى» اياقتالعان جاڭا مينيستر احمەتوۆ ەڭسەرە الماعان اۋىر جۇكتى كوتەرۋى ءتيىس.

«اباي-ينفورم»