اۋەلدە پرەزيدەنت تاپسىرماسىنا سايكەس، بۇل كومەك 1,5 ميلليون ادامعا بەرىلۋى كەرەك ەدى. كەيىن، قوعامدىق نارازىلىقتاردى ەسكەرە كەلە، جاردەمپۇلدى الۋشىلاردىڭ سانىن ءوسىردى. ەندى توتەنشە جاعداي كەزىندە تۇراقتى تابىسىنان ايىرىلعان 3 ميلليون ادامعا بەرىلەتىن بولدى.

42 مىڭ تەڭگە الاتىن ادامداردىڭ ۇزىن-سونار ءتىزىمى جاسالىپ، توپ-توپ كاتەگورياعا ءبولىندى.

ەلەكتروندى ۇكىمەتتىڭ سايتى - «egov» ارقىلى بەرىلەتىن بولدى. وعان «كىلت» تاپپاعان كوپ جۇرت تاعى تالاپ قويدى. اقىرى ارنايى سايت اشىلاتىن بولدى. ول - «42500.enbek.kz». بۇل سايتقا دا كوپ جۇرت كىرە العان جوق. «سايت» سىزىلىپ-سوزىلىپ ول تۇردى. «ەلەكتروندى ۇكىمەت» «كىلت» تۇگەندەپ ول تۇردى. اقىرى قارانوپىر حالىق بانك عيماراتتارى مەن اكىمدىكتەرگە، پوشتالارعا اعىلدى. نە ءۇشىن؟ شوت اشتىرىپ، ءوتىنىش وتكىزۋ ءۇشىن...

سايتتاردىڭ تەحنيكالىق ولقىلىقتارىنىڭ سەبەبىن، تسيفريلىق دامۋ ءمينيسترى اسقار جۇماعاليەۆ ءتۇسىندىرىپ كوردى. تۇسىندىرەمىن دەپ، سوزدەن ءسۇرىندى. «ءبىر كۇندە 15 ميلليون كىرگەن. سايتتىڭ شاماسى جەتپەي قالدى»، دەپ سويلەدى. كەيىن رەسمي اقپاراتتار اسەكەڭنىڭ ءسوزىن تۇزەپ، جاردەمپۇلعا ءوتىنىش بەرگەندەردىڭ سانى 400 مىڭنان اسىپ جىعىلعانىن جەتكىزدى. سويتسە، 76 مىڭ ادامعا SMS-حابارلاما تاراتىلىپتى. ونىڭ 60 مىڭى الگى كومەكتى الىپ ۇلگەرگەن ەكەن.

ال كەشە ەڭبەك ءمينيسترى ءبىرجان نۇرىمبەتوۆ SMS-حابارلاما جىبەرىلگەن بارلىق ازاماتقا بىردەي 42 مىڭنان بەرىلمەيتىنىن ايتىپتى. ءمينيستردىڭ مالىمەتىنشە، ايلىق تابىسى 500 مىڭ مەن 1 ميلليوننىڭ ارالىعىن قۇرايتىن 2 مىڭعا جۋىق ادام 42 مىڭدىق كومەككە ءوتىنىش بەرىپتى.

ونىڭ ايتۋىنشا، سوڭعى 2 كۇندە 412 مىڭ ءوتىنىش تۇسكەن ەكەن. سونىڭ 1873-ىندە قوماقتى ايلىق تابىسى بولعان.

«ولار تابىسىنان ايىلىرىپ قالعاندارىن ايتتى. بىراق، تەكسەرۋ كەزىندە سوڭعى قاڭتار، اقپان جانە ناۋرىز ايلارىندا ولار 500 مىڭ مەن 1 ميلليوننىڭ ارالىعىندا تابىس تاۋىپ وتىرعانى انىقتالدى. سويتە تۇرا 16 ناۋرىزدا اقشالارى تاۋسىلىپ قالىپتى-مىس. بۇل وتىرىك! بۇل دۇرىس ەمەس! كەرىشىم سۇرايمىز، ارينە. سىزدەر ۋاقىت ءبولىپ، ءبىزدىڭ سايتىمىزعا كىرىپ، ءوتىنىش قالدىردىڭىزدار. بىراق، سىزدەرگە 42 500 تەڭگەدەن بەرىلمەيدى»، - دەپتى مينيستر.

ال مىناۋ مينيستر ۇسىنعان جاڭا ءتاسىل. 42 500 تەڭگەنى الۋ ءۇشىن Telegram مەسسەندجەرىندە ءوتىنىش بىلدىرۋگە بولادى ەكەن.

Telegram-داعى بوتقا كىرىپ، Start (باستاۋ) باتىرماسىن باسۋ قاجەت.

بوت: https://t.me/Help42500Bot

ءوتىنىش بەرۋ ءۇشىن مىنا مالىمەتتەردى جازۋ كەرەك:

ءوزىن-ءوزى جۇمىسپەن قامتىعاندار:

1. «ءوزىن-ءوزى جۇمىسپەن قامتىعاندار» باتىرماسى
2. جسن
3. ەلەكترون پوشتا
4. تەلەفون ءنومىرى
5. بانك شوتىنىڭ ءنومىرى (IBAN)
6. ءوتىنىشتى راستاۋ

سوسىن سىزگە ءوتىنىش قابىلدانعانى تۋرالى حابارلاما كەلەدى

7. ءوتىنىشتىڭ تىركەۋ ءنومىرى
8. ءوتىنىشتىڭ قارالىپ جاتقانى تۋرالى حابارلاما.

قىزمەتكەر ءوتىنىش بەرەتىن بولسا:

1. «قىزمەتكەر» باتىرماسى
2. جسن
3. ءسىز جۇمىس ىستەيتىن ۇيىمنىڭ بيزنەس يدەنتيفيكاتسيالىق ءنومىرى (بين)
4. ەلەكترون پوشتا
5. تەلەفون ءنومىرى
6. بانك شوتىنىڭ ءنومىرى (IBAN)
7. ءوتىنىشتى راستاۋ

سوسىن سىزگە ءوتىنىش قابىلدانعانى تۋرالى حابارلاما كەلەدى

8. ءوتىنىشتىڭ تىركەۋ ءنومىرى
9. ءوتىنىشتىڭ قارالىپ جاتقانى تۋرالى حابارلاما.

Abai.kz