كوروناۆيرۋسپەن كۇرەس بۇكىل الەمدە ءجۇرىپ جاتىر. ءار مەملەكەت ءوز حالقىنىڭ اماندىعى ءۇشىن امالداپ، قولدا باردى قىسىپ-قىمتىرماي قورعانۋعا كوشكەن. سول قاتاردا ءبىز دە بارمىز. قاۋىپتى ىندەتتىڭ بەتىن قايتارۋ ءۇشىن قۇزىرلىلار قانداي شارا قابىلداعانىن بۇعان دەيىن دە جازدىق.

راس، قازىر تارتىساتىن ەمەس، تار كەزەڭدەمىز. الايدا، قازاق بيلىگى، بيلىگى عانا ەمەس، تۇگەل قوعامى ناقتى ىستەن گورى قۇر ماقتانعا قۇمار كونە ادەتىن توتەنشە جاعداي كەزىندە دە قويا الماي وتىرعانداي وي قالدىرادى. بەيبىت كۇندە «الگا كازاكستان»، دەپ ۇرانداپ سويلەپ، كۇن سايىن فلەشموب ۇيىمداستىراتىن شەندىلەر ەندى كوروناۆيرۋسپەن چەللەندج ارقىلى كۇرەسۋگە كىرىسكەن بە دەيسىڭ، ەرىكسىز...

جو-جوق، جاپتىم جالا، جاقتىم كۇيە ەمەس. ۇكىمەت قيىن-قىستاۋ كەزەڭدە قول قۋسىرىپ قاراپ وتىر دەسەك جانە وتىرىك بولار. ناۋرىزدان بەرى جاريالانعان توتەنشە رەجيم، قالالاردى كارانتينگە جابۋ، ازىق-تۇلىكتەن تارلىعان كەيبىر وتباسىلارعا كومەكتەسۋ - وسىنىڭ ءبارى ەل ءۇشىن ىستەلگەن يگىلىكتى شارۋالار. ونىڭ ۇستىنە قازىرگى قوعامنىڭ قاس جاۋى وسى چەللەندج بوپ تۇر دەمەيمىز، جانە. ەل ەڭسەگى پاسەيگەن وسىنداي كەزدە ءبىرلى-جارىم رۋحتى ءسوز كەرەك تە شىعار. بىراق، ول ەسەپپەن بولسا، كانى...

«ادەمى باستالعان ءىستى ادەمى اياقتاي المايتىن» ادەتىمىز شىعار، بالكىم. سوڭعى كەزدەرى قولعا الىنعان ناقتى شارالاردىڭ ورنىن كوز الدايتىن قىزىلدى-جاسىلدى الەمجەلىلىك ەستافەتالار باسىپ بارادى. جانى قالماي جالپى اتسالىسىپ جاتقان چەللەندج دە سونىڭ ءبىرى. ەڭ وكىنىشتىسى، قۇزىرلى مينيسترلىكتەر مەن اكىمدىكتەر سول چەللەندجدەردىڭ شوعىن ۇرلەپ جاتىر ەكەن.

دەنساۋلىق مينيسترلىگىنىڭ الەۋمەتتىك جەلىدەگى بەينە ۇراندارى. مىنە قاراڭىز:

بۇل - ءبىر،

بۇل - ەكى،

بۇل - ءۇش،

بۇل - ءتورت، ت.ب.

بۇلاي دەۋىمىزگە، الەۋمەتتىك جەلىدە قاپتاپ جۇرگەن #ۇيدەنشىقپاەلدىساقتا #وستاۆايسيادوماسوحرانيجيزني، #Birgemiz سەكىلدى چەللەندجدەر سەبەپ بولىپ وتىر. ارينە، مۇنىڭ ءبارىن مينيسترلىك جاريالاپ وتىرعان جوق. بىراق باستى نازاردا ۇستاپ قولداۋ كورسەتىپ وتىرعانى شىندىق.

مينيسترلىك قانا ەمەس، قوعامنىڭ بارلىق سالاسى قازىر چەللەندجدەنىپ جاتقانداي، قۇددى. «تابيعات قۇشاعىندا»، «اتپەن سۋرەت»، «بالىقپەن سۋرەت»، «بىرگە اندەت»، «تەرەزەدە ءان سال»، «شاش الۋ» ت.ب. كوپ. ءتىپتى وتە كوپ. الەۋمەتتىك جەلىلەردە انشىلەر دە، ارتىستەر دە، اقىن-جازۋشىلار دا، كاسىپكەرلەر دە، اۋىلداعىلار دا ءتۇرلى چەللەندجەردىڭ، ەستافەتالاردىڭ ءبىر-ءبىر كەيىپكەرى بولعان.

كوروناۆيرۋس دەرتى دەندەپ بارادى. ەلدە قازىر 800-دەن اسا ناۋقاس تىركەلدى. وسىدان-اق، ىندەتتىڭ بەتى قاتتى ەكەنىن بايقاۋعا بولادى. قازىر بيلىك يەلەرىنىڭ بەرگەن اقپاراتتارى جەتكىلىكسىز. كۇندەلىكتى ەستىپ-كورىپ جۇرگەنىمىز: قاي وڭىردەن، قانشا ادام ۆيرۋس جۇقتىردى، ونىڭ قانشاسى جازىلدى دەگەن اقپارات قانا. ءبىتتى. ءتىپتى پالەن وبلىستان ءبىر ادام ۆيرۋس جۇقتىردى دەگەنىمەن، ناۋقاس ادام ول وبلىستىڭ قاي قالاسى، قاي اۋىلىندا ەكەنى دە ايتىلمايدى. ناۋقاستىڭ كىم ەكەنىن، كىممەن بايلانىستا بولعانىن ايتۋ ەتيكاعا جات دەگەندەرى ءجون شىعار، تىم قۇرىعاندا ول ناۋقاستاردىڭ قالاي اۋىرىپ، قالاي جازىلعانى تۋرالى اقپارات تاراتىلۋى كەرەك قوي.

ءتۇيىن. مەملەكەتتىك ورگاندار ءمان-ماعىناسىز جىلتىراققا قىزىقپاي ناقتى جۇمىستار ىستەسە دەيمىز. ءتۋريزمدى دامىتامىز دەپ ۇساق-تۇيەك ۆاينەرلەرگە ميلليونداپ قارجى بولەتىن شەندىلەر، ءتىلسىز جاۋدى ۇران تاستاپ، فلەشموب جاساپ جەڭە المايتىنىن ءتۇسىنۋ كەرەك. قوعام توتەنشە جاعداي كەزىندە رەسمي اقپاراتتاردىڭ ازدىعىن، جەدەل جاڭالىقتاردىڭ مەملەكەتتىك تىلدە كەشىگىپ جاتقانىنا نازار اۋدارىپ وتىر. ءبىز بىرگەمىز دەپ بوس ۇرانداعانشا عالىم، دارىگەرلەردىڭ، ۆيرۋسولوگتار ۇسىنعان ناقتى، عىلىمي اقپاراتتاردى جاريالعانى ءجون...

ىندەتپەن كۇرەستىڭ الدىڭعى شەبىندە جۇرگەن دارىگەرلەردىڭ قازىرگى حال-احۋالى قالاي؟ ولار نە كيىنىپ، نە ءىشىپ ءجۇر؟ كەشە عانا 120 دارىگەردىڭ ۆيرۋس جۇقتىرعانى ايتىلدى. ولاردى قازىر قانداي تاسىلدەرمەن ەمدەپ جاتىر؟ قانداي ءدارى-دارمەكتەر پايدالانىلۋدا؟ سۇراق كوپ. جاۋاپ جوق. ەسەسىنە ءبىز Birgemiz دەپ جاتىرمىز...

Abai.kz