29 ساۋىردە ترامپ Reuters اگەنتتىگىنە بەرگەن سۇقباتىندا "قىتاي مەنىڭ سايلاۋدا جەڭىلگەنىمدى كورۋ ءۇشىن بارىنە بارۋعا دايىن" دەپ مالىمدەگەن. ول ءوزى بيلىككە كەلگەلى ۆاشينگتوننىڭ بەيجىڭمەن ساۋدا قاتىناسى ساياساتىنا قىتايدىڭ كوڭىلى تولمايتىنىن ايتادى.

اقش پرەزيدەنتى سونىمەن بىرگە قىتايعا دەموكراتيالىق پارتيا اتىنان سايلاۋعا ءتۇسىپ جاتقان بۇرىنعى ۆيتسە-پرەزيدەنت دجو بايدەنمەن جۇمىس ىستەگەن تيىمدىرەك بولۋى مۇمكىن دەپ ەسەپتەيدى.

قىتايدىڭ سىرتقى ىستەر مينيسترلىگى 30 ساۋىردە اقش-تاعى پرەزيدەنت سايلاۋى ەلىنىڭ ىشكى ءىسى دەپ مالىمدەدى. "بەيجىڭ باسقا ەلدىڭ ىشكى ىسىنە ارالاسۋعا نيەتتى ەمەس، اقش حالقى قىتايدىڭ سايلاۋ ساياساتىنا ارالاستىرمايدى دەگەن سەنىمدەمىز" دەدى قىتاي وكىلى.

سوڭعى اپتادا ۆاشينگتون مەن بەيجىڭ اراسىنداعى ساۋدا قاتىناسىنا قاتىستى پروبلەمالار ودان سايىن ۋشىعىپ كەتتى. بۇعان قىتايدىڭ ورتالىق بولىگىنەن شىققان كوروناۆيرۋس ەپيدەمياسىنىڭ اقش-قا جەتۋى باستى سەبەپتەردىڭ ءبىرى بولىپ وتىر.

عالامدىق پاندەميا سالدارىنان اقش-تا ون مىڭداعان ادامنىڭ ولىمىنە جانە ەلىندەگى ەكونوميكالىق رەتسەسسياعا ترامپ قىتاي كىنالى دەپ سانايدى.

30 ساۋىردە اقش پرەزيدەنتى دونالد ترامپ كوروناۆيرۋستىڭ قىتايدىڭ ۆيرۋسولوگيا زەرتحاناسىنان شىققانىنا دالەلى بارىن "سەنىممەن ايتا الاتىنىن" جەتكىزگەن.

ترامپتىڭ بۇل مالىمدەمەسىنە دەيىن اقش-تىڭ بارلاۋ قىزمەتى قىتاي زەرتحاناسىنان ۆيرۋس بايقاۋسىزدا سىرتقا تاراپ كەتۋى مۇمكىن دەگەن بولجامدى زەرتتەپ جاتقانىن حابارلاعان.

Abai.kz