مەملەكەت باسشىسى قاسىم-جومارت توقاەۆ اۋىل مەن قالا مەكتەپتەرى اراسىندا 1,5 جىل الشاقتىق بار ەكەنىن ايتتى. اۋىلداعى مەكتەپتەردىڭ جاعدايى مەن ينفراقۇرىلىمىن جاقسارتۋ بويىنشا كوپ وزەكتى ماسەلەلەر كوتەرىلدى، دەيدى ءبىرجان سال اۋدانىنا قاراستى ورتا مەكتەپتە 40 جىل جۇمىس ىستەگەن زەينەتكەر ۇستاز قالامقاس عابباس.

«اۋىل مەن قالا مەكتەپتەرى اراسىندا ايىرماشىلىق ايتارلىقتاي بار. 40 جىل اۋىلدىق مەكتەپتە جۇمىس ىستەگەن مەن ءۇشىن بۇل جاڭالىق ەمەس. اۋىلدا بىلىكتى مامانداردىڭ جەتىسپەي، ءبىر مۇعالىمنىڭ بىرنەشە پاننەن ساباق بەرۋ جاعدايى دا كەزدەسەدى. بىلىكتى ماماندار كوپ جاعدايدا اۋىلدىق مەكتەپتەرگە جۇمىس ىستەۋگە كەلە بەرمەيدى. سەبەبى، كوپ جاستار اۋىلدا ينفراقۇرىلىم مەن قولايلى ءومىر سۇرۋگە جاعداي جوق دەپ ەسەپتەيدى. ولارعا مەكتەپتە بەرىلەتىن ەڭبەكاقى مولشەرى دە از بولىپ كورىنۋى مۇمكىن»، - دەدى ول.

ونىڭ ايتۋىنشا، مەملەكەت باسشىسىنىڭ ءبىلىم سالاسىنا قاتىستى كوتەرگەن ماسەلەلەردىڭ بارلىعى وزەكتى.

«اۋىلداردا قاشىقتان وقىتۋ دا قيىنعا سوققانى بەلگىلى. ويتكەنى، جەلى ارقالاي جۇمىس ىستەيدى. كەيبىر اۋىلداردا مۇلدەم جەلى ۇستامايتىنىن دا بىلەمىز. ال، قالادا وقۋشىلار قالاعان اقپاراتىنا ينتەرنەت ارقىلى قول جەتكىزە الادى. ولاردىڭ سول ءۇشىن ءبىلىم ساپاسى دا جوعارى، كوكجيەكتەرى دە كەڭ بولادى. سوندىقتان اۋىلداعى ءبىلىم ساپاسىن ارتتىرۋعا پرەزيدەنتتىڭ ءوزى دەن قويعانى قۋانتادى. بۇل بولاشاق ۇرپاقتىڭ ساپاسىن ارتتىرۋعا مۇمكىندىك بەرەدى»، - دەدى ق.عابباس.

Abai.kz