نۇر-سۇلتان مەن الماتىدا 1 ماۋسىمعا قاراعان ءتۇنى ساعات 00.00-دە بلوكبەكەتتەر الىندى.

«1 ماۋسىمعا قاراعان ءتۇنى قالانىڭ پەريمەترى بويىنشا ورنالاسقان بلوك-بەكەتتەردى الامىز. تج رەجيمى كەزىندە بۇل بەكەتتەر قالادان شىعۋ جانە قالاعا كىرۋدى شەكتەدى. بۇل — كوروناۆيرۋستىڭ تارالۋىن توقتاتۋ ءۇشىن قاجەت بولدى. 

ەلدەگى جانە قالاداعى جاعدايدىڭ تۇراقتانۋى شەكتەۋلەردى الۋعا مۇمكىندىك بەردى. بۇل رەتتە بارلىق كاسىپورىندار مەن ۇيىمداردا سانيتارلىق قاۋىپسىزدىك كۇشەيتىلىپ، قاۋىپسىزدىككە باسىمدىق بەرىلدى. ۇيلەرگە، اۋلا الاڭدارى مەن كوشەلەردى زالالسىزداندىرۋ جۇرگىزىلۋدە. بەلگىلەنگەن تارتىپكە باعىنىپ، سانگيگيەنا مەن الەۋمەتتىك قاشىقتىقتى ساقتاپ، قورعانىس بەتپەردەلەرىن كيىپ جۇرۋگە شاقىرامىن. بۇل قازىرگى ءومىردىڭ قالىپتى نورماسىنا اينالۋى ءتيىس. ءوزىڭىزدى جانە جاقىندارىڭىزدى قورعاڭىز!»،- دەپ جازدى الماتى قالاسىنىڭ اكىمدىگى.

كارانتين ۋاقىتىندا الماتىنىڭ ماڭايىنا 27 بلوكبەكەت قويىلعان بولاتىن.

سونىمەن قاتار، 1-ماۋسىمعا قاراعان ءتۇنى نۇر-سۇلتان قالاسىنىڭ اۋماعىنا قويىلعان بەكەتتەر دە الىندى. قالا اۋماعىنا 6 بلوكبەكەت قويىلعان.

«وتكىزۋ-باقىلاۋ بەكەتتەرىن الۋ - قالىپتى ءومىر ءسۇرۋ داعدىسىنا ورالامىز دەگەندى بىلدىرمەيدى. قالادا مەديتسينالىق ماسكا كيىپ ءجۇرۋ قاجەت. تۇرعىندار سانيتارلىق نورمالاردى قاتاڭ ساقتاۋى كەرەك. ماسكا كيىپ، ارا قاشىقتىقتى ساقتاپ، قولدى انتيسەپتيكپەن وڭدەگەن ءجون»،- دەپ حابارلايدى قالا اكىمدىگى.

Abai.kz