بۇگىن مەملەكەتتىك رامىزدەر كۇنىنە وراي نۇر-سۇلتان مەن الماتى قالالارىندا بىرقاتار شارالار ۇيىمداستىرىلدى،-دەپ حابارلايدى قازاقپارات.

ەلوردادا مەرەكەگە  وراي سالتاناتتى اۆتوشەرۋ باستالدى.

«بۇگىن مەملەكەتتىك رامىزدەرىمىزگە 28 جىل تولىپ وتىر. وسىناۋ مەرەكەگە وراي سالتاناتتى اۆتوشەرۋ وتكىزۋدى ءجون كوردىك. بۇل شارانىڭ باستى ماقساتى - ۇلتتىق قۇندىلىقتارىمىزعا بالايتىن رامىزدەرىمىزگە دەگەن سۇيىسپەنشىلىك سەزىمدى وياتۋ. ول بىرنەشە كەزەڭنەن تۇرادى. العاشى كەزەڭدە 28 اۆتوموبيل مەن 28 موتوتسيكلدىڭ قاتىسۋىمەن 28 شاقىرىمدىق شەرۋ بولادى»، - دەدى شەرۋ باستالار الدىندا باق وكىلدەرىنە سۇحبات بەرگەن نۇر-سۇلتان قالالىق جاستار ماسەلەلەرى باسقارماسىنىڭ «استانا جاستارى» كمم باسشىسىنىڭ ورىنباسارى ايان ەرمەنتاەۆ.

شەرۋگە قاتىسۋشىلاردىڭ بارلىعى قاجەتتى قورعانىس قۇرالدارىمەن قامتاماسىز ەتىلگەن جانە ولارعا كارانتين رەجيمى ەرەجەلەرىن ساقتاۋ بويىنشا نۇسقاۋلىق بەرىلگەن.

ال، الماتىدا كوپتەگەن نىساندار رامىزدەر كۇنىنە وراي بەزەندىرىلگەن.

قالالىق مادەنيەت باسقارماسى مەرەكەگە بايلانىستى قالانىڭ 8 اۋدانىندا ءتۇرلى مادەني شارالار ۇيىمداستىرعان.

اتاپ ايتقاندا، بۇگىن رىسقۇلوۆ پەن ءاشىموۆ كوشەلەرىنىڭ قيىلىسىنان باستاپ بايكەرلەر ءانۇراندى شىرقاپ، رىسقۇلوۆ-مومىشۇلى-موڭكە بي- ساين كوشەلەرىن ارالاپ كەلىپ «الماتى ارەنا» جانىنا توقتايدى.

سونداي-اق، ءار اۋدانداعى تۇرعىن ءۇي كەشەندەرىندە قازاقستان رەسپۋبليكاسىنىڭ تۋى كوتەرىلىپ، ءانۇران شىرقالادى.

ودان بولەك، ءتۇرلى ۇلت وكىلدەرى مەن ماماندىق يەلەرى اراسىندا مەملەكەتتىك ءانۇراننىڭ ونلاين فلەشموبى وتەدى.

بۇگىن دوستىق داڭعىلىندا قازاقستان قوناق ۇيىندە «مەنىڭ تۋىم» مەملەكەتتىك اكتسياسى جوسپارلانعان.

كەشكى 16:00 شاماسىندا اباي كوشەسىندە مەملەكەتتىك تۋدى كوتەرگەن اۆتوشەرۋ وتەدى.

سونىمەن قاتار، «پرەمەرا» تك، «شۇعىلا» شاعىن اۋدانىندا تۇرعىندار سالتاناتتى تۇردە ءانۇراندى ورىندايدى.

سونداي-اق بۇگىن الماتى اكىمى باقىتجان ساعىنتاەۆ Twitter -دەگى پاراقشاسىندا قالا تۇرعىندارى مەن قوناقتارىن مەملەكەتتىك رامىزدەر كۇنىمەن قۇتتىقتادى.

«مەملەكەتتىك رامىزدەر كۇنىمەن قۇتتىقتايمىن! بارلىق قيىندىقتى بىرگە ەڭسەرىپ، قۋانىشقا سەبەپ كوپ بولسىن. تۋعان قالامىز بەن وتانعا دەگەن ماحابباتىمىزدى ونەگەلى ىستەرىمىز جانە قول جەتكىزگەن بيىك جەتىستىكتەرىمىز ارقىلى كورسەتەيىك»، - دەپ اتاپ ءوتتى اكىم.

ايتا كەتۋ كەرەك، وسىدان تۋرا 28 جىل بۇرىن، ناقتى ايتقاندا 1992 جىلدىڭ 4 ماۋسىمىندا ەلباسى نۇرسۇلتان نازارباەۆ «قازاقستان رەسپۋبليكاسىنىڭ مەملەكەتتىك تۋى تۋرالى»، «قازاقستان رەسپۋبليكاسىنىڭ مەملەكەتتىك ەلتاڭباسى تۋرالى» جانە «قازاقستان رەسپۋبليكاسى مەملەكەتتىك ءانۇرانىنىڭ مۋزىكالىق رەداكتسياسى تۋرالى» زاڭدارعا قول قويعان ەدى.

ال «قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭ 2007 جىلى 4 ماۋسىمدا قابىلداندى. وسى زاڭعا سايكەس جىل سايىن 4 ماۋسىم قازاقستان رەسپۋبليكاسىندا مەملەكەتتىك رامىزدەر كۇنى رەتىندە مەرەكەلەنەدى.

Abai.kz