مەملەكەتتىك رامىزدەر كۇنىنە وراي قر ۇلتتىق ءارحيۆى قازاقستاننىڭ باستى اتريبۋتتارى –   تۋ، ەلتاڭبا، ءانۇراننىڭ قالىپتاسۋ تاريحىنان سىر شەرتەتىن قۇجاتتار توپتاماسىن ۇسىندى. 

تاۋەلسىز قازاقستاننىڭ مەملەكەتتىك تۋى رەسمي تۇردە 1992 جىلى قابىلداندى. ونىڭ اۆتورى – بەلگىلى سۋرەتشى شاكەن نيازبەكوۆ.

قازاقستان رەسپۋبليكاسىنىڭ ۇلتتىق ارحيۆىندە ساقتالعان قازاقستاننىڭ مەملەكەتتىك تۋى رەسمي تۇردە 1992 جىلى قابىلدانۋى تۋرالى قۇجاتتار كوشىرمەسى.

قازاقستان رەسپۋبليكاسىنىڭ ۇلتتىق ارحيۆىندە ساقتالعان قازاقستاننىڭ مەملەكەتتىك تۋىنىڭ سىزباسى.

ەگەمەندى قازاقستاننىڭ ەلتاڭباسى 1992 جىلى رەسمي تۇردە قابىلداندى. ونىڭ اۆتورلارى – بەلگىلى ساۋلەتشىلەر جانداربەك مالىبەكوۆ پەن شوت-امان ءۋاليحانوۆ.

قازاقستان رەسپۋبليكاسىنىڭ ۇلتتىق ارحيۆىندە ساقتالعان قازاقستاننىڭ ەلتاڭباسى 1992 جىلى رەسمي تۇردە قابىلدانۋى تۋرالى قۇجاتتار كوشىرمەسى.

قازاقستان رەسپۋبليكاسىنىڭ ۇلتتىق ارحيۆىندە ساقتالعان قازاقستاننىڭ ەلتاڭباسى سىزباسى.

تاۋەلسىز قازاقستاننىڭ تاريحىندا ەلىمىزدىڭ مەملەكەتتىك گيمنى ەكى رەت – 1992 جانە 2006 جىلدارى بەكىتىلدى.

رەسپۋبليكا مەملەكەتتىك ەگەمەندىگىن يەلەنگەننەن كەيىن، 1992 جىلى قازاقستان ءانۇرانىنىڭ مۋزىكاسى مەن ماتىنىنە بايقاۋ جاريالاندى. بايقاۋ قورىتىندىسى بويىنشا قازاق كسر گيمنىنىڭ مۋزىكالىق رەداكتسياسىن ساقتاۋ تۋرالى شەشىم قابىلداندى. وسىلايشا تاۋەلسىز قازاقستاننىڭ العاشقى گيمىنىڭ مۋزىكاسىنىڭ اۆتورلارى مۇقان تولەباەۆ، ەۆگەني برۋسيلوۆسكي جانە لاتيف حاميدي بولدى. سونىمەن قاتار، ۇزدىك ماتىنگە جاريالانعان بايقاۋدا اۆتورلار ۇجىمى، بەلگىلى اقىندار مۇزافار الىمباەۆ، قادىر مىرزاليەۆ، تۇمانباي مولداعاليەۆ جانە جادىرا دارىباەۆا جەڭىپ شىقتى.

ەلدىڭ دىبىستىق ءرامىزىنىڭ تانىمالدىعىن ارتتىرۋ ماقساتىندا 2006 جىلى جاڭا مەملەكەتتىك گيمن قابىلداندى. ونىڭ نەگىزى رەتىندە حالىقتىڭ اراسىندا كەڭىنەن تانىمال «مەنىڭ قازاقستانىم» پاتريوتتىق ءانى تاڭداپ الىندى. ول ءاندى ءشامشى قالداياقوۆ 1956 جىلى جۇمەكەن ناجىمەدەنوۆتىڭ سوزىنە جازعان بولاتىن. قازاقستاننىڭ تۇڭعىش پرەزيدەنتى - ەلباسى نۇرسۇلتان نازارباەۆ انگە مەملەكەتتىك گيمن جوعارى مارتەبەسىن بەرۋ جانە اناعۇرلىم سالتاناتتى شىرقالۋى ءۇشىن مۋزىكالىق تۋىندىنىڭ باستاپقى ءماتىنىن وڭدەدى. قازاقستان پارلامەنتى 2006 جىلى 6 قاڭتاردا پالاتالاردىڭ بىرلەسكەن وتىرىسىندا «مەملەكەتتىك رامىزدەر تۋرالى» جارلىققا ءتيىستى تۇزەتۋ ەنگىزىپ، ەلىمىزدىڭ جاڭا مەملەكەتتىك گيمنىن بەكىتتى.

قازاقستان رەسپۋبليكاسىنىڭ ۇلتتىق ارحيۆىندە ساقتالعان قازاقستان گيمنىنىڭ 1992 جىلعى رەسمي تۇردە قابىلدانۋى تۋرالى قۇجاتتار كوشىرمەسى.

ايتا كەتەيىك، «قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭ 2007 جىلى 4 ماۋسىمدا قابىلداندى. وسى زاڭعا سايكەس جىل سايىن 4 ماۋسىم كۇنى قازاقستاندا مەملەكەتتىك رامىزدەر كۇنى اتاپ وتىلەدى.

Abai.kz