قورعانىس ءمينيسترى نۇرلان ەرمەكباەۆ قاراماعىنداعى قىزمەتكەردىڭ جەمقورلىق جاساپ، قىلمىستى بولعانى ءۇشىن وتستاۆكاعا كەتپەيدى. بۇل تۋرالى مينيسترلىكتىڭ zakon.kz سايتىنا بەرگەن جاۋابىندا ايتىلدى. 

بۇعان دەيىن باتىس قازاقستان وبلىستىق قورعانىس ىستەرى جونىندەگى دەپارتامەنتتىڭ بۇرىنعى باستىعى مارات ەسەنوۆ 200 مىڭ تەڭگە پارا العانى ءۇشىن قىلمىستىق جاۋاپكەرشىلىككە تارتىلعان بولاتىن. ەسەنوۆكە قاتىستى سوت ۇكىمى 2020 جىلى 4 ماۋسىمدا زاڭدى كۇشىنە ەندى. ول پارا العانى ءۇشىن 4,8 ميلليون تەڭگە كولەمىندە ايىپپۇل تولەۋگە مىندەتتەلگەن. سونىمەن قاتار، ول پولكوۆنيك شەنىنەن ايىرىلدى جانە مەملەكەتتىك قىزمەتتە جۇمىس ىستەۋگە تىيىم سالىندى.

ال، 2019 جىلدىڭ قاراشاسىندا پرەزيدەنت قاسىم-جومارت توقاەۆ باسشىلاردىڭ قول استىنداعى قىزمەتكەرلى ءۇشىن جاۋاپكەرشىلىگى جونىندە زاڭعا قول قويعان بولاتىن. زاڭعا سايكەس، سىبايلاس جەمقورلىققا جول بەرگەن باسشى ون كۇن ىشىندە وتستاۆكاعا كەتۋگە مىندەتتى. سونداي-اق زاڭدا ورتالىق مەملەكەتتىك ورگاننىڭ باسشىسى (مينيستر) قول استىنداعى ايماقتىق ءبولىمنىڭ باستىعى (بقو قورعانىس ىستەرى جونىندەگى ءبولىمىنىڭ باستىعى) ءۇشىن جاۋاپتى بولىپ تابىلادى دەپ بەلگىلەنگەن.

الايدا، قورعانىس مينيسترلىگىنىڭ مالىمەتىنشە، ەرمەكباەۆ ايماقتىق بولىمشەلەر باسشىلارىنا جاۋاپ بەرمەيدى. سوتتالعان بقو قورعانىس ىستەرى جونىندەگى بۇرىنعى باستىعى مارات ەسەنوۆ ءۇشىن باس شتابتىڭ قۇرىلىمدىق بولىگى بولىپ تابىلاتىن ۇيىمداستىرۋ جانە جۇمىلدىرۋ جۇمىسى دەپارتامەنتىنىڭ بىرەۋى ورنىنان كەتۋى كەرەك ەكەن.

«قورعانىس ءمينيسترى نۇرلان ەرمەكباەۆ بقو قورعانىس ىستەرى جونىندەگى دەپارتامەنتتىڭ بۇرىنعى باسشىسى مارات ەسەنوۆتىڭ سىبايلاس جەمقورلىق قىلمىسى بويىنشا سوتتالۋىنا بايلانىستى ءوز ەركىمەن وتستاۆكا سۇرامايدى. بۇل ارادا باسقا جاۋاپتى ادامدار لاۋازىمىنان ايرىلۋى كەرەك»,- دەلىنگەن حابارلامادا.

قورعانىس مينيسترلىگى وزدەرىنىڭ ايىرىقشا قۇزىرلى ورگان ەكەنىن باسا ايتتى. ەگەر باسقا مينيسترلىكتەردىڭ ورتالىق اپپارات سياقتى فۋنكتسيالارى مەن مىندەتتەرىن ورىندايتىن ايماقتىق دەپارتامەنتتەرى بار بولسا، ياعني تەك وبلىس شەگىندە، ال قورعانىس مينيسترلىگىندە بىردەي فۋنكتسيالارى بار اۋماقتىق بولىمشەلەرى جوق.

«وبلىستىق قورعانىس ىستەرى جونىندەگى دەپارتامەنتى قورعانىس مينيسترلىگىنىڭ اۋماقتىق ورگانى بولىپ تابىلمايدى، مىسالى، اسكەري گوسپيتال، اۋداندىق ەكسپلۋتاتسيالىق ءبولىم نەمەسە كەز-كەلگەن اسكەري ءبولىم سەكىلدى. بۇل مەملەكەتتىك قىزمەت تۋرالى زاڭنامادا ايقىن كورسەتىلگەن. مۇنىڭ ءبارى - قورعانىس ۆەدومستۆوسىنىڭ اۋماقتىق ورگاندارى بولىپ تابىلمايتىن مەملەكەتتىك مەكەمەلەر.

بىزدە ايماقتىق دەڭگەيدە 17 قورعانىس ىستەرى جونىندەگى دەپارتامەنتتەر، جۇزدەگەن اسكەري بولىمدەر بار، بىراق ولاردىڭ بارلىق كومانديرلەرى (باستىقتارى) قورعانىس ءمينيسترى تاعايىنداعانىنا قاراماستان تىكەلەي مينيسترگە باعىنادى دەگەندى بىلدىرمەيدى. تيىسىنشە، قورعانىس ءمينيسترى وبلىستاعى قورعانىس ىستەرى جونىندەگى دەپارتامەنت باستىعىنىڭ جاساعان سىبايلاس جەمقورلىق ارەكەتى ءۇشىن وتستاۆكاعا كەتۋىنە زاڭدى نەگىزى جوق، ويتكەنى ول قارۋلى كۇشتەردىڭ باس شتابىنىڭ قۇرىلىمدىق بولىگى بولىپ تابىلاتىن ۇيىمداستىرۋ جانە جۇمىلدىرۋ جۇمىستارى باسقارماسىنا تىكەلەي باعىنادى»،- دەيدى مينيسترلىك وكىلدەرى.

سونداي-اق، قورعانىس مينيسترلىگى اسكەريلەر ءۇشىن «وتستاۆكا» ۇعىمىنىڭ ەرەكشە ءمانى بار ەكەنىن ءتۇسىندىردى.

«بۇرىن، بەلگىلى ءبىر دەڭگەيدە وتستاۆكاعا كەتۋ تۋرالى ءوتىنىش، اسىرەسە سوعىس ۋاقىتىندا، اسكەري قىزمەتتەن جالتارۋ، ءتىپتى اسكەري مىندەتتەن قاشۋ دەپ تۇسىندىرىلەتىن. اسكەري قىزمەتكەر نەمەسە وفيتسەر، مايدان كەزىندە وتستاۆكاعا مۇلدە كەتە المايدى، ويتكەنى بۇل اسكەري ادامنىڭ انتىنا قايشى. بۇل اسكەردە قىزمەت ەتكىسى كەلمەيتىندەرگە «جاقسى امال» بولار ەدى», - دەدى قورعانىس مينيسترلىگى.

Abai.kz