قالا مەرى كەيشا لەنس بوتتومس ءبىر كۇن بۇرىن 27 جاستاعى رەيشارد برۋكس اتىپ ولتىرىلگەننەن كەيىن پوليتسيا باستىعى ەريك شيلدستىڭ وتستاۆكاعا كەتۋ تۋرالى ءوتىنىشىن قابىلداعان.

"مەن بۇل كۇش قولدانۋدى اقتاۋعا بولادى دەپ ويلامايمىن جانە وفيتسەردى بىردەن قىزمەتتەن كەتىرۋگە شاقىردىم" دەدى بوتتومس ءباسپاسوز ءماسليحاتى كەزىندە.

اقش-تا افروامەريكالىق دجوردج فلويدتىڭ پوليتسەي قولىنان قازا تابۋىنان كەيىن شتاتتار مەن وزگە ەلدەردە باستالعان ناسىلشىلدىككە قارسى نارازىلىق جالعاسىپ جاتقان كەزدە برۋكستىڭ ءولىمى قارسىلىقتى ونان ءارى ءورشىتۋى مۇمكىن.

دجوردجيا شتاتىنىڭ تەرگەۋ بيۋروسى وقيعانى زەرتتەپ جاتقانىن حابارلادى. اقپارات بويىنشا، وقيعا 12 ماۋسىمدا تۇندە اتلانتا قالاسىنداعى جەدەل تاماقتاناتىن ءدامحانالاردىڭ ءبىرىنىڭ ماڭىندا بولعان. جەرگىلىكتى پوليتسياعا رەيشارد برۋكستىڭ كولىگىمەن جولدى بوگەپ، كولىك ىشىندە ۇيىقتاپ قالعانى تۋرالى حابارلاما تۇسكەن. پوليتسيا ىشىمدىككە تەست جۇرگىزگەننەن كەيىن برۋكستى ۇستاماق بولعان كەزدە ەر ادام قاشىپ كەتپەك بولعان.

كۋاگەرلەر تۇسىرگەن ۆيدەولاردىڭ بىرىندە برۋكستىڭ ەكى اق ءناسىلدى پوليتسەيمەن الىسىپ جاتقانى كورىنەدى. وندا برۋكس وزىنە قارسى قولدانىلعان ەلەكتوشوكەردى پوليتسەيدەن تارتىپ الۋعا تىرىسادى.

تاعى ءبىر ۆيدەودا پوليتسەيدەن قاشىپ بارا جاتقان برۋكستىڭ قولىندا ەلەكتروشوكەرگە ۇقساس قۇرال بار ەكەنى بايقالادى.

ء"دال وسى ساتتە اتلانتا وفيتسەرى تاپانشاسىن الىپ، قولىن سوزىپ، برۋكسقا باعىتتايدى، ول قۇلايدى" دەيدى رەينولدس. فلويد ولىمىنە بايلانىستى نارازىلىقتاردىڭ ەڭ ىرىلەرى اتلانتا قالاسىندا بولعان.

Abai.kz