"بەيجىڭ توتەنشە جاعدايدىڭ الدىندا تۇر. ءبىز پروفيلاكتيكا مەن باقىلاۋ شارالارىن كۇشەيتىپ جاتىرمىز. كارانتين تالاپتارىن ساقتاماعاندارعا ايىپپۇل سالامىز. ۆيرۋس كەڭ تاراپ كەتپەۋى ءۇشىن كانالداردى جابامىز", – دەپ مالىمدەدى 15 ماۋسىمدا بەيجىڭ ۇكىمەتىنىڭ رەسمي وكىلى سيۋي حەتسزيان.
وتكەن اپتادا بەيجىڭنىڭ وڭتۇستىك-شىعىسىندا ورنالاسقان ەڭ ءىرى "سينفادي" بازارىندا كوروناۆيرۋس وشاعى انىقتالعان. ىندەت جۇقتىرعانداردىڭ دەنى ساۋدا ورىندارىندا جۇمىس ىستەيتىندەر مەن ولاردىڭ تۋىستارى بولعان.
رەسمي ستاتيستيكاعا سايكەس، قازىر بەيجىڭنىڭ ينفەكتسيالىق اۋرۋحاناسىندا 80 ادام ەم قابىلداپ جاتىر. بىلتىر جىلدىڭ اياعىندا ەپيدەميا باستالعالى بەرى قىتاي استاناسىندا 670 ادامنان ۆيرۋس انىقتالعان. ولاردىڭ توعىزى قايتىس بولعان.
ءبىر ميلليارد 400 ميلليون حالقى بار قىتاي بيلىگى COVID-19 ۆيرۋسىن جۇقتىرعاندار سانىن تومەندەتىپ كورسەتەدى دەگەن وزگە ەلدەردىڭ ايىپتاۋلارىن تەرىسكە شىعارىپ كەلدى.
Abai.kz
