سودان كوپ ۇزاماي 2013 جىلى الەمنىڭ جەتى دۇركىن چەمپيونى شۋماحەر فرانتسيانىڭ مەريبەلە تاۋلى ايماعىندا شاڭعى تەۋىپ ءجۇرىپ، قاتتى قۇلاپ، ناتيجەسىندە باسسۇيەك-مي جاراقاتىن الىپ، ميىنىڭ ەكى جارتىشارىنا زاقىم كەلدى دەگەن حاباردى ەستىدىك.

2015 جىلى فرانتسيانىڭ Le Parisien باسىلىمى سپورتشىنىڭ ەمى ءۇشىن 500 مىڭ ەۋرو جۇمسالاتىنىن جاريالادى. «ميحاەل سپورتتا ءجۇرىپ 715 ميلليون ەۋرو تابىس تاپتى. قازىردە بۇل اقشا ەمىنە تولىقتاي جەتكىلىكتى.
الايدا، قازىردىڭ وزىندە ونىڭ وتباسى ارنايى تۇردە تاپسىرىسپەن جاسالعان، ءتۇرلى جابدىقپەن جابدىقتالعان Ferrari FXX Evoluzione كولىگىن 11,2 ميلليون ەۋروعا ساتىلىمعا شىعاردى. ءبىر جىل كولەمىندەگى شۋماحەردىڭ فيزيكالىق تۇرعىدان جاعدايى وزگەرىسسىز، ءبىر قالىپتى. ءالى دە تۋىستارىمەن سويلەسىپ، ءوز بەتىمەن قوزعالا المايدى. ال سالماعى بار-جوعى 45 كەلى. بۇل ونىڭ ءوز سالماعىنان 25 كەلى جوعالتقان. ەڭ وكىنىشتىسى، سپورتشى ءالى كۇنگە اينالاسىندا نە بولىپ جاتقانىن تۇسىنبەيدى»، – دەپ جازعان ەدى باسىلىم.

شۋماحەردىڭ ەمدەلۋ پروتسەسى ۇزاققا سوزىلدى. چەمپيون سول ۋاقىتتان بەرى ءالى توسەكتە جاتىر. قىستا 51 جاسقا تولدى. تۋعان كۇنى قارساڭىندا كەلىنشەگى وعان ءالى دە ءبىر توپ دارىگەرلەردىڭ كۇشتى باقىلاۋى مەن ۇلكەن كۇتىم كەرەك دەپ مالىمدەدى. كوروناۆيرۋستىڭ كەسىرىنەن جوسپارلانعان ۇلكەن وپەراتسيا دا كەيىنگە شەگەرىلدى.

شۋماحەردىڭ ەمىنە شيپا تىلەيمىز. اياعىنا تۇرىپ كەتسىن. تەمىر تۇلپارمەن جۇيىتكىپ ءجۇرىپ شاڭعىدان توسەككە تاڭىلىپ قالام دەپ ويلادى ءۇش ۇيىقتاسا تۇسىنە كىرمەگەن شىعار. جازىم بولسا بىلامىقتان ءتىس سىنار دەيدى ءبىزدىڭ قازاق. جازىم قايدا، باسساڭ اياعىڭنىڭ استىندا دەگەن دە بار. ەشكىم ەشتەڭەدەن ساقتاندىرىلماعان. شۋماحەرگە اللا دەنساۋلىق بەرسە ءالى اق وڭالىپ كەتەر. قارجى جاعىنان دا قاتتى قينالىپ قالماس. بىراق كىم ءوزىنىڭ بار تاپقان تابىسىن ولىممەن ارپالىسۋعا، دارىگە جۇمساعىسى كەلەدى دەيسىز. قانشا تاپساڭ دا سونى تىنىشتىق پەن اماندىقتا جاراتقانعا نە جەتسىن؟!

ارتىق اقشا ەشكىمگە ارتىقتىق ەتپەيدى. بىراق اقشا مەن دۇنيەنىڭ سوڭىنان جۇگىرىپ، ومىردەگى ەڭ ماڭىزدى نارسەلەردى ۇمىتىپ كەتكەندەر قانشاما. شۋماحەر دۇنيەقوڭىزدىقتان سونشا بايلىق جيناماعان دا شىعار. ول ءجاي عانا ءوز سالاسىندا ۇزدىكتەردىڭ ۇزدىگى بولدى، جاقسى تابىس تاپتى، بولدى. بىراق تاعدىردىڭ توسىنسىيى مەن ءومىردىڭ بۇرالاڭ جولدارى ارقايسىمىزدى ءار جاعاعا لاقتىرىپ تاستايتىنى بار...بۇل جەردە دە اقشا ەشتەڭەنى شەشپەيدى.

اسحات سادىربايدىڭ الەۋمەتتىك جەلىدەگى جازباسى

Abai.kz