22 ماۋسىم كۇنى قول قويىلعان بۇيرىق جىلدىڭ سوڭىنا دەيىن جارامدى بولىپ، 525 000 شەتەل جۇمىسشىلارىنىڭ گرين-كارتاسىنا (اقش بيلىگى بەرەتىن ىقتيار حاتتىڭ اتاۋى – رەد.) اسەر ەتپەك.

"ەلىمىزدىڭ يمميگراتسيالىق جۇيەسىن جۇزەگە اسىرۋدا ءبىز شەتەل جۇمىسشىلارىنىڭ اقش-تىڭ ەڭبەك نارىعىنا اسەرىن، اسىرەسە قازىرگى جوعارى دەڭگەيدەگى ىشكى جۇمىسسىزدىق پەن ەڭبەك ەتۋگە دەگەن سۇرانىستى ويدا ۇستاۋىمىز قاجەت" دەدى ترامپ بۇيرىقتىڭ تۇسىندىرمەسىندە.

بۇيرىق شەتەل جۇمىسشىلارىنىڭ ءساۋىر ايىندا ەنگىزىلگەن شەكتەۋىن ۇزارتتى. ول قاتاڭ كارانتين شارالارىنا بايلانىستى جۇمىسسىزدىق ەداۋىر ارتقان بولاتىن.

جاڭا بۇيرىق بىلىكتىلىگى جوعارى جۇمىسشىلارعا ارنالعان H-1B ۆيزاسىنا، اۋىر شارۋاشىلىعىنان تىس سالاداعى ماۋسىمدىق جۇمىسشىلارعا ارنالعان H-2B جانە J-1 ۆيزالارىنا اسەر ەتپەك. كومپانيا قىزمەتكەرلەرىنىڭ L-1 ۆيزاسىمەن اقش-قا اۋىسۋى دا كەلەسى جىلعا دەيىن تىيىلدى.

بۇل شەكتەۋلەر ازىق-تۇلىك ءوندىرۋ سالاسىنداعى جۇمىسشىلارعا اسەر ەتپەۋى ءتيىس. ولار H-2B ۆيزاسىن الۋشىلاردىڭ 15 پايىزىن قۇرايدى.

مامىر ايىندا اقش-تاعى جۇمىسسىزدىق 13,3 پايىز بولدى. بۇل جىل باسىنداعى كورسەتكىشتەن شامامەن 10 پايىزعا كوپ (ول كەزدە جۇمىسسىزدىق 3,5 پايىز بولاتىن). كوروناۆيرۋستىڭ تاراۋىنا بايلانىستى كوپتەگەن شتاتتىڭ باسشىلىعى ءدامحانا، دۇكەن سەكىلدى كاسىپكەرلىك ورتالىقتارىن جاۋىپ تاستاپ، جۇمىسسىزدىق كۇرت ارتتى.

وتكەن ايدا جۇمىسسىز امەريكالىقتاردىڭ سانى 21 ميلليون بولدى. شتاتتار شەكتەۋدى بىرتىندەپ الا باستاعانىمەن، جۇمىسسىزدىقتىڭ وسى دەڭگەيى جىل سوڭىنا دەيىن ساقتالادى دەپ بولجانىپ وتىر.

قاراشادا قايتا سايلانۋدى كوزدەپ وتىرعان ترامپتىڭ رەيتينگى جۇمىسسىزدىققا بايلانىستى تومەندەگەن بولاتىن. وسىعان وراي ەل استاناسى ۆاشينگتوندا ترامپتىڭ يمميگراتسيانى شەكتەيتىن جاڭا بۇيرىق شىعاراتىنى تۋرالى قاۋەسەت تارادى. مۇنداي شەكتەۋلەر ونىڭ نەگىزگى جاقتاستارىنا وڭ اسەر قالدىرادى.

ءىرى بيزنەس يەلەرى ترامپتى شەتەل جۇمىسشىلارىنا تىيىم سالماۋعا شاقىردى. ولاردىڭ ايتۋىنشا مۇنداي تىيىمدار ەل ەكونوميكاسىنىڭ دامۋىن تەجەيدى.

امەريكا ساياساتى جونىندەگى ۇلتتىق قوردىڭ (ساۋدا، يمميگراتسيا، ءبىلىم بەرۋ سەكىلدى تاقىرىپتاردا زەرتتەۋ جۇرگىزەتىن ۇكىمەتتىك ەمەس ۇيىم – رەد.) اتقارۋشى ديرەكتورى ستيۋارت اندەرسون Wall Street Journal باسىلىمىنا ۆيزا شەكتەۋلەرىنىڭ جۇمىسسىزدىققا وڭ اسەر ەتەتىنى تۋرالى ەشقانداي دالەل جوق دەدى.

AP, AFP, dpa, Reuters جانە Wall Street Journal ماتەريالدارى نەگىزىندە دايىندالدى.

Abai.kz