بەيسەنبى كۇنى اقوردا ماڭىندا الەۋمەتتىك ماسەلەلەرىن ايتىپ، شاعىمدانعان تۇرعىندار اراسىندا 2011 جىلعى جاڭاوزەن وقيعاسى كەزىندە جاراقات العان مۇنايشىلار ەرمۇحان يماناليەۆ جانە مۇحانبەت سەرىكباەۆ، "تەرگەۋ اباقتىسىنداعى ازاپتاۋ" جايلى مالىمدەپ، اۋىر ناۋقاستان ەكى جىل بۇرىن قايتىس بولعان مۇنايشى ماقسات دوسماعامبەتوۆتىڭ شەشەسى، 12 بالانىڭ اناسى وڭايگۇل دوسماعامبەتوۆا جانە ونىڭ ۇلى قايرات دوسماعامبەتوۆ تە بولعان ەدى.
نارازىلاردىڭ ايتۋىنشا، ولار بۇعان دەيىن جۇمىس سۇراپ، بارلىق قاجەتتى مەكەمەلەر مەن ورگاندارعا، "وزەنمۇنايگاز" كومپانياسىنا بارىپ، ارىز-شاعىمدارىن ايتقان. الايدا تالاپتارى سول كۇيى ورىندالماعان.
ماڭعىستاۋ وبلىسىنىڭ اكىمى سەرىكباي تۇرىموۆ "بۇل ازاماتتاردىڭ ماسەلەسىنەن حاباردار" ەكەنىن ايتىپ، "ولارعا اۋتسورسينگتەن جۇمىس ۇسىنىلعان، بىراق وزدەرى ودان باس تارتادى، بۇل ازاماتتار قانشا تالاپ قويعانمەن "وزەنمۇنايگازدان" جۇمىس بەرىلمەيدى" دەدى. ال نارازىلار اكىمدىك ۇسىنىپ وتىرعان جۇمىستىڭ جالاقىسى وتە از، ونداي جالاقىمەن بالا-شاعانى اسىراۋ قيىن دەپ وتىر.
جاڭاوزەن تۇرعىندارى بۇعان دەيىن دە تۇراقتى جۇمىس تالاپ ەتىپ، اكتسيا وتكىزگەن. سونداي تالاپ قويعان جاڭاوزەندەگى جۇمىسسىز جاستار بەلسەندىسى ەرجان ەلشىباەۆ بىلتىر قازان ايىندا "دەنساۋلىققا قاساقانا اۋىر زيان كەلتىرۋ" بابى بويىنشا بەس جىلعا باس بوستاندىعىنان ايرىلعان ەدى. قۇقىق قورعاۋشىلار ەرجان ەلشىباەۆتى ساياسي تۇتقىن ساناتىنا قوسقان.
2011 جىلى 16 جەلتوقساندا ماڭعىستاۋ وبلىسى جاڭاوزەن قالاسىندا ەڭبەك جاعدايىن جاقسارتۋدى تالاپ ەتكەن جەرگىلىكتى مۇناي كومپانياسى جۇمىسشىلارىنىڭ بىرنەشە ايعا سوزىلعان بەيبىت نارازىلىق اكتسياسىن پوليتسيا وق اتىپ تاراتقان. رەسمي مالىمەت بويىنشا، بۇل وقيعا سالدارىنان 17 ادام (بىرەۋى – شەتپە ستانتسياسىندا) مەرت بولعان. قالا تۇرعىندارى مەن قۇقىق قورعاۋشىلار، قۇرباندار سانى بۇدان كوپ دەپ سانايدى.
Abai.kz
