قازاقستاندا 6 شىلدە استانا كۇنى. وسىعان وراي، نۇر-سۇلتان قالاسىنىڭ اكىمدىگى قالا كۇنىن مەرەكەلەۋگە دايىندىقتى باستاپ كەتىپتى. بۇل تۋرالى KazTAG.kz جازدى.

نۇر-سۇلتان اكىمدىگى قالا كۇنىنە بايلانىستى وتەتىن شارالار ءتىزىمى قوسىمشا حابارلاناتىنىن مالىمدەپتى.

«ءيا. ءبىز قالا كۇنىنە وراي قاي جەردە قانداي ءىس-شارا بولاتىنىن سايتىمىزدا جاريالايمىز. بىراق، ونىڭ بارلىعى قاتاڭ سانيتارلىق تالاپتاردى ساقتاي وتىرىپ جۇزەگە اسىرىلادى»،- دەپتى اكىمدىكتىڭ ءباسپاسوز قىزمەتى.

قازىر قازاقستان بويىنشا كوروناۆيرۋس جۇقتىرعاندار سانى جونىنەن نۇر-سۇلتان قالاسى الدىڭعى ۇشتىكتە. مۇنداعى ناۋقاستار سانى 5500-گە جۋىقتاعان. 61 ادام كوۆيدتەن قايتىس بولعان.

ال، كۇنى كەشە عانا مەملەكەت باسشىسى نۇر-سۇلتان قالاسىنىڭ اكىمى التاي كولگىنوۆكە جۇمىسىنا سالعىرت قاراعانى ءۇشىن ەسكەرتۋ جاساعان بولاتىن. سەبەبى، ەلورداداعى كوپتەگەن مەكەمەلەر كارانتين جاعدايىنىڭ وزىندە سانيتارلىق تالاپتاردى ساقتاماعان.

پرەزيدەنت سونداي-اق، ەلدەگى ەپيدەميولوگيالىق احۋالدى تۇراقتاندىرۋ ءۇشىن بيىلعى ناۋرىز-مامىر ايلارىنداعىداي قاتاڭ كارانتين رەجيمىن ەنگىزۋدى تاپسىرعان ەدى.

ەستەرىڭىزدە بولسا، پرەزيدەنت قاسىم-جومارت توقاەۆ «انا ءتىلى» گازەتىنە بەرگەن سۇحباتىندا قازىر توي تويلاپ جۇرەتىن ۋاقىت ەمەس دەگەندى شەگەلەپ ايتتى.

«قازىر «تويىڭ تويعا ۇلاسسىن» دەپ اندەتىپ، توي تويلاپ جۇرەتىن ۋاقىت ەمەس. بۇگىنگىدەي تەحنولوگيانىڭ زامانىندا توي-تومالاقتىڭ اڭگىمەسىن ايتىپ، ءبىر-ءبىرىن اسىرا ماقتاپ، اس ءىشىپ، اياق بوساتقانعا ريزا كەيىپتە ءجۇرۋ ادەتىنەن ارىلۋ كەرەك. ءتىپتى وسىنداي قاۋىپتى پاندەميا كەزىندە كەيبىر ازاماتتارىمىز ماعان حات جازىپ، توي وتكىزۋگە مۇمكىندىك بەرۋ كەرەك دەپ تالاپ قويادى. مەملەكەتتىڭ ءوزى ولەرمەندىكپەن ءومىر سۇرەتىن كەزگە كەلدىك. سوندىقتان ەڭبەك ەتۋ – ءومىر ءسۇرۋ سالتىنا اينالىپ، باستى مىندەت سانالۋعا ءتيىس. توي قۋالايتىن ەمەس، وي قۋالايتىن كەزەڭمەن بەتپە-بەت كەلدىك. بۇل ءداۋىر – اقىل-ويدىڭ، عىلىم مەن ءبىلىمنىڭ، ەڭبەكتىڭ ءداۋىرى!»،- دەگەن ەدى توقاەۆ.

ەلىمىز بويىنشا، كوروناۆيرۋس جۇقتىرعانداردىڭ كوبى نۇر-سۇلتاندا ەكەنىن ايتتىق. مامىر ايىنداعى شەكتەۋلەر الىنعاننان بەرى ىندەتتىڭ تارالۋى 7 ەسەگە دەيىن وسكەن كورىنەدى. قاراپايىم حالىقتى ايتپاعاندا، بيلىكتە جۇرگەن ءبىراز شەنەۋنىك ۆيرۋس جۇقتىرىپ، وقشاۋلانىپ جاتىر. پرەزيدەنت شۇعىل تاپسىرما بەرگەن سوڭ، كەشە مينيستر الەكسەي تسوي ىندەتتىڭ بەتىن قايتارۋ ءۇشىن 3 ءتۇرلى ستسەناري مەن 10 ءتۇرلى شارا جوسپارىن ۇسىنعان.

قازىرگى ەپيدەميولوگيالىق جاعداي وسى. ەل اۋماعىندا اۋرۋحانالار مەن ءدارى-دارمەكتىڭ جەتىسپەۋشىلىگى دە الەۋمەتتىك جەلىلەردە ايتىلىپ، جازىلىپ جاتىر. مينيسترلىك شۇعىل تۇردە ءتورت اپتالىق لوكداۋنعا (كارانتينگە) ازىرلەنۋدە.

مينيستر الەكسەي تسوي كارانتينگە ازىرلەنىپ جاتقاندا اكىم التاي كولگىنوۆ قالا كۇنىنە دايىندالىپ جاتىر ما؟.. ولاي دەۋىمىزگە نۇر-سۇلتان قالاسى اكىمدىگىنىڭ رەسمي سايتىنداعى مىنا ءبىر اقپارات سەبەپ بولدى. قاراڭىز:

1.07.2020.

تاقىرىبى: نۇر-سۇلتاندا اشىق اسپان استىندا كينو كورسەتىلىمى وتەدى

«استانا كۇنىندە تۇرعىندار وتاندىق جانە الەمدىك كينەماتوگرافتىڭ ۇزدىك تۋىندىلارىن تاماشالاي الادى.

نۇر-سۇلتان تۇرعىندارى مەن قوناقتارى 1-6 شىلدە ارالىعىندا قازاقستاندىق جانە الەمدىك فيلمدەردى اشىق اسپان استىندا تاماشالاي الادى. كورسەتىلىم «استانا-ارەنا» ستاديونىنىڭ الدىندا (قابانباي باتىر داڭعىلى بويىمەن) وتەدى».

بۇل بۇل ما، الەۋمەتتىك جەلىگە استانا كۇنىنە وراي ۇيىمداستىرىلاتىن مادەني ءىس شارالاردىڭ ءتىزىمى دە جاريالانىپتى. مىنە قاراڭىز:

ءتۇيىن. وسىنداي الاعاي دا بۇلاعاي كەزدە قالا كۇنىنە وراي وتەتىن ءىس-شارالار كوروناۆيرۋس ىندەتىن ودان ءارى ءورشىتىپ جىبەرمەي مە؟ الەم ەلدەرىندە وسىعان ۇقساس ماڭىزدى مادەني شارالار كەيىنگە شەگەرىلىپ جاتقاندا، كولگىنوۆ اكىمدىگىنىڭ بۇل ارەكەتى قانشالىقتى دۇرىس؟

نۇربيكە بەكسۇلتانقىزى

Abai.kz