بەلارۋستەگى كەشە وتكەن پرەزيدەنتتىك سايلاۋدىڭ بەيرەسمي قورىتىندىسى جاريا بولدى. ۇلتتىق ەكسزيت-پولدىڭ ەسەبىنشە، بۇل جولى دا پرەزيدەنت الەكساندر لۋكاشەنكو جەڭىسكە جەتكەن.

ەكزيت-پول قورىتىندىسى: لۋكاشەنكو جەڭدى

الەكساندر لۋكاشەنكو – 79,7 پايىز داۋىس، ال ونىڭ باستى قارسىلاسى سۆەتلانا تيحانوۆسكايا 6,8 پايىز داۋىس العان. سايلاۋدىڭ رەسمي قورىتىندىسى 10 تامىزدا، ياعني بۇگىن جاريالانۋى ءتيىس.

بەلارۋس بيلىگى بۇل سايلاۋعا حالىقارالىق باقىلاۋشىلاردى جانە دەموكراتيالىق تالاپتاردىڭ جۇزەگە اسۋىن باقىلايتىن ەۋروپالىق ۇيىمداردىڭ وكىلدەرىن قاتىستىرعان جوق. وسىعان قاراماستان، ەل بيلىگى سايلاۋ ءوتتى دەپ ەسەپتەدى.

بەيرەسمي ەسەپ: تيحونوۆسكايا جەڭدى

بەلارۋس بەلسەندىلەرى رەسمي ەسەپتى مويىنداماي، وزدەرىنىڭ ەكزيت-پولىن جاريالاعان. ول بويىنشا تيحانوۆسكايا 70 پايىز، لۋكاشەنكو 10 پايىز داۋىس العان.

ەلدى 26 جىلدان بەرى باسقارىپ كەلە جاتقان، 65 جاستاعى الەكساندر لۋكاشەنكو بۇل جولى دا سايلاۋعا قاتىسقان. ونىڭ نەگىزگى قارسىلاسى قاراپايىم مۇعالىم سۆەتلانا تيحانوۆسكايا. ول كۇيەۋى، وپپوزيتسيانەر سەرگەي تيحانوۆسكيدى ۇمىتكەر بولۋعا جەتكىزبەي قاماۋعا العاننان كەيىن ساياساتقا بارۋعا شەشىم قابىلداعان.

سۆەتلانا تيحانوۆسكايا سايلاۋدىڭ بەيرەسمي قورىتىندىسى – ۇلتتىق ەكزيت-پول ەسەبىمەن كەلىسپەيتىنىن، لۋكاشەنكونىڭ جەڭىسىن مويىندامايتىنىن مالىمدەگەن.

ال بەلارۋس ورتالىق سايلاۋ كوميسسياسىنىڭ باسشىسى ليديا ەرموشينا سايلاۋدىڭ ناقتى قورىتىندىسى جۇماعا دەيىن ەسەپتەلىپ بولاتىنىن ايتقان. ول سونداي-اق، جەڭىلگەن ۇمىتكەرلەرگە سايلاۋ ناتيجەسىن سابىرمەن قابىلداپ، ەلدە بۇلىك شىعارماۋعا كەڭەس بەرگەن.

بەلارۋستەگى ميتينگ. زارداپ شەككەندەر كوپ...

دەسە دە، مەملەكەتتىك ەكزيتپولدىڭ ناتيجەسى جاريالانعاننان كەيىن بەلارۋستىڭ بىرنەشە قالاسىندا وپپوزيتسيا تاراپىنان ازاماتتار مينيستگىلەرگە شىعا باستاعان. كەيبىر دەرەكتەرگە سۇيەنسەك، لۋكاشەنكو جەڭىسىن مويىندامايتىنداردىڭ ميتينگىنە ۇزىن-ىرعاسى 100 مىڭعا جۋىق ادام جيىلعان.

«NEXTA Live» دەرەكتەرىنە قاراعاندا، نەميگتە تۇتقىنداردى تاسىمالدايتىن ۇلكەن كولىك نارازى توپتى قاققان. زارداپ شەككەندەر بار، قايتىس بولعاندار دا بولۋى مۇمكىن.

اۋەلدە نارازى توپ جەڭىس پاركىندەگى «مينسك - گورود-گەروي» تاستۇعىرىنىڭ الدىنا جينالعان. كەيىن كۇشتىك قۇرىلىمدار جينالعانداردى شەتكە ىعىستىرىپ شىعارعان. ارنايى وپەراتسياعا ىشكى ىستەر ساربازدارى مەن ومون جاساقتارى جۇمىلدىرىلعان. نارازى توپتى تارقاتۋ ءۇشىن كوز جاساۋراتاتىن گازدار مەن سۋ شاشقان. وسىدان كەيىن ەكى تاراپ اراسىندا قاقتىعىس ورىن العان. ەكى تاراپتان دا زاردەپ شەككەندەر بار دەلىنگەن رەسمي اقپاراتتا.

ال كۇشتىك قۇرىلىمدار تاراپىنان 8-9 تامىز كۇندەرى 80-گە جۋىق ادامنىڭ تۇتقىندالعانىن مالىمدەگەن.

پرەزيدەنتتىك سايلاۋدىڭ الدىندا پرەزيدەنت لۋكاشەنكونىڭ «جالعىز» وپپونەنتى سۆەتلانا تيحونوۆسكايانىڭ شتابىنا سايلاۋعا جىبەرىلمەگەن ەكى ءىرى وپپوزيتسيالىق توپ بىرىككەن ەدى. ولار: «بەلگازپرومبانكتىڭ» بۇرىنعى باسشىسى ۆيكتور باباريكو مەن وپپوزيتسونەر ۆالەري تسەپكالونىڭ سايلاۋالدى شتابى. ال تيحانوۆاسكايانىڭ سايلاۋالدى ۇگىت-ناسيحات جيىندارىنىڭ ارقايسىسىنا 35 مىڭ مەن 65 مىڭنىڭ ارالىعىندا ادام جينالىپ وتىرعان. ساراپشىلار، مۇنى لۋكاشەنكو بيلىگى تۇسىنداعى ەڭ ءىرى نارازىلىق جيىندارى دەپ باعالاعان.

وسك: لۋكاشەنكو 80,23 پايىز جينادى

ايتپاقشى، بۇگىن بەلارۋس ورتالىق سايلاۋ كوميسسياسى كەشەگى سايلاۋدىڭ الدىن الا قورىتىندىسىن جاريالاپتى. ول بويىنشا الەكساندر لۋكاشەنكو 80,23 پايىز داۋىس جيناعان. ۇزىن-ىرعاسى 4 ميلليون 652 مىڭ ادام داۋىس بەرگەن.

ال سۆەتلانا تيحونوۆسكاياعا 574 مىڭ ادام داۋىس بەرگەن. ونىڭ ناتيجەسى 9,90 پايىز دەپ كورسەتىلگەن.

اننا كانوپاتسكايا 1,68 پايىز، اندرەي دميتريەۆ 1,04 پايىز، سەرگەي چەرەچەن 1,13 پايىز داۋىس جيناعان. ال 6,02 پايىز ەلەكتورات بارلىعىنا قارسى داۋىس بەرىپتى.

بەلارۋ وسك مالىمەتىنشە، بۇل سايلاۋعا 5 ميلليون 790 مىڭ ادام كەلىپ داۋىس بەرگەن. بۇل شامامەن 84,23 پايىزدى كورسەتكەن.

توقاەۆ لۋكاشەنكونى قۇتتىقتادى

ايتپاقشى، جاڭا عانا قازاقستان پرەزيدەنتى قاسىم-جومارت توقاەۆ الەكساندر لۋكاشەنكونى پرەزيدەنتتىككە قايتا سايلانۋىمەن قۇتتىقتادى.

«وسىنداي ساياسي قيىن-قىستاۋ كەزدە وتكەن سايلاۋدىڭ قورىتىندىسى - ءسىزدىڭ بەلارۋس تاۋەلسىزدىگى مەن ەگەمەندىگىن نىعايتۋ جولىنداعى باعىتىنىڭىزدىڭ حالىق قولداۋىنا يە ەكەنىن كورسەتەدى»، - دەپ جازىلعان رەسمي حاتتا.

Abai.kz