12 تامىز كۇنى الماتىنىڭ مەدەۋ اۋداندىق سوتى ازاماتتىق بەلسەندى ءاسيا تولەسوۆانىڭ بوستاندىعىن ءبىر جىل التى ايعا شەكتەۋ تۋرالى ۇكىم شىعاردى. سونىمەن بىرگە بەلسەندىنى سوت شىعىنىن وتەپ، جابىرلەنۋشىلەر قورىنا شامامەن 41 مىڭ تەڭگە تولەۋدى مىندەتتەدى.

ونلاين رەجيمدە وتكەن سوت پروتسەسىن جۇرگىزگەن سۋديا تاكەن شاكىروۆ تولەسوۆانى قىلمىستىق كودەكستىڭ «بيلىك وكىلىن قورلاۋ» جانە «بيلىك وكىلىنە كۇش قولدانۋ» باپتارى بويىنشا ايىپتى دەپ تانىدى.

«سوت ءاسيا تولەسوۆانى 378-باپتىڭ 2-ءبولىمى بويىنشا كىنالى دەپ تاۋىپ،  20 ايلىق ەسەپتىك كورسەتكىش، ياعني 55 560 تەڭگە كولەمىندە ايىپپۇل ساۋ تۋرالى ۇكىم ەتتى. 380-باپتىڭ 1-ءبولىمى بويىنشا كىنالى دەپ تاۋىپ،  1 جىل 6 ايعا باس بوستاندىعىن شەكتەۋ جازاسىنا كەسۋ تۋرالى ۇكىم ەتتى»، – دەدى ۇكىمدى وقىعان سۋديا شاقىروۆ.

سۋديا شاكىروۆ ەكى ايدان بەرى تەرگەۋ اباقتىسىندا قاماۋدا وتىرعان ءاسيا تولەسوۆانى بوساتۋدى بۇيىردى.

ءاسيا تولەسوۆانىڭ باس بوستاندىعىن شەكتەۋ جازاسى ول قاماۋعا العان مەرزىم، ياعني 8 ماۋسىمننا باستالادى. ۇكىمگە سايكەس، تولەسوۆا پروباتسيا قىزمەتىنە حابارلاماي، تۇرعىلىقتى جەرى مەن جۇمىسىن اۋىستىرا المايدى.  باسقا جەرلەرگە پروبتسيا قىزمەتىنىڭ رۇقساتىنسىز شىعا المايدى.

ءاسيا تولەسوۆانىڭ ۇستىنەن قىلمىستىق ءىس قوزعاۋعا ونىڭ 6 ماۋسىم كۇنى رۇقسات ەتىلمەگەن ميتينگ كەزىندەگى ارەكەتى تۇرتكى بولعان. ىشكى ىستەر مينيسترلىگىنە تيەسىلى Polisia.kz سايتى ءا.تولەسوۆا زاڭسىز ميتينگ كەزىندە پوليتسيا قىزمەتكەرىنە قارسى كۇش قولدانعانىن جازعان.

سوتتا تولەسوۆادان «ءجابىر كوردى» دەلىنگەن التى پوليتسەي جاۋاپ بەردى. ولاردىڭ ىشىندە مەيىرجان تۇرعانبەك تولەسوۆا ءوزىن اۆتوزاك الدىندا ءۇش رەت ۇرعانىن ايتسا، پوليتسەي نۇربەك تەمىرحانوۆ بەلسەندى ءوزىن جۇكە الدىندا ۇرىپ، باس كيىمىن قاعىپ ءتۇسىردى دەگەن. نۇربەك تەمىرحانوۆ، تاسقىن تالدىباەۆ، ەرنات سابالاقوۆ، ۇلان ابيبوللا مەن تىلەك تولەگەنوۆ سوت كەزىندە ءاسيا تولەسوۆانىڭ «گاد، ي تى گاد! مەرزكيە مەنتى! نيكتو يز ۆاس نە دوستوين نوسيت فورمۋ!» دەگەن سوزدەرىنە قورلانعانىن ايتقان.

ءاسيا تولەسوۆا سوتتا بۇل ارەكەتىن پوليتسيا ادامداردى جاس-كارىگە قاراماي زاڭسىز ۇستاي باستاعاندا ولارعا اراشا ءتۇسىپ، پوليتسيا وزىنە كۇش قولدانعانىمەن تۇسىندىرگەن.

ءاسيا تولەسوۆانىڭ ادۆوكاتتارى تولەسوۆا ن.تەمىرحانوۆتىڭ باس كيىمىن قاعىپ تۇسىرگەندە ونىڭ باسىنا قولى تيمەگەنىن ايتتى. سونداي-اق قورعاۋشىلار ايىپتاۋ اكتىسىندە وقيعا حرونولوگياسى بۇزىلعانىن، باس كيىمدى قاعىپ تۇسىرگەن وقيعادان بۇرىن  اۆتوزاك الدىنداعى وقيعا الدىمەن بولعانىن ايتىپ، سوتتاعى ۆيدەو بۇرمالانىپ مونتاجدالعانىن العا تارتتى. سونىمەن قاتار ادۆوكاتتار پوليتسەي مەيىرجان تۇرعانبەك اۆتوزاك الدىندا تولەسوۆانى ازاماتتىق كيىمدە ۇستاپ، سۇيرەلەگەن ادامعا كەدەرگى كەلتىرۋدىڭ ورنىنا وعان قوسىلىپ، بەلسەندىنى ارتىنان ۇستاعانىن ايتقان.

ايتا كەتەيىك، 8 ماۋسىم كۇنى ءاسيا تولەسوۆانى پوليتسيا دەپارتامەنتىنە كۋاگەر رەتىندە شاقىرتقان. جاۋاپ بەرۋگە ءاسيا تولەسوۆانى الىپ قالىپ، ۋاقىتشا قاماۋ اباقتىسىنا قاماعان.

دەرەككوز: Malim.kz 

Abai.kz