وتكەندە ابىلقايىر ىسقاقوۆ باسشىلىق ەتەتىن پاۆلودار وبلىسىنىڭ ەكىباستۇز قالاسىنداعى قازاق قىزدار گيمنازياسىنىڭ 27 جىل بويى عيماراتسىز ەكەنىن، ونداعى 422 وقۋشى ورىس مەكتەبىنىڭ ءبىر بۇرىشىنىپ پانالاپ، ەكى اۋىسىممەن وقىپ جۇرگەنىن ايتتىق.

Abai.kz اقپاراتتىق پورتالىندا «قازاق قىزدار گيمنازياسى 27 جىل بويى عيماراتسىز وتىر!» اتتى ماقالا جاريا بولدى. بەلگىلى ساياساتكەر، قر پرەزيدەنتى جانىنىن قۇرىلعان ۇلتتىق كەڭەستىڭ مۇشەسى ەرلان سايروۆتىڭ الەۋمەتتىك جەلىدەگى جانايقايىنا ءۇن قوسىپ، وبلىس اكىمى ابىلقايىر باقتىبايۇلىنىڭ اتىنا جازىلعان ءۇشبۋ حاتتى جاريالادىق.

وندا ەكىباستۇز قالاسىنداعى №25 قازاق قىزدار گيمنازياسى 27 جىلدا (1993 جىلدان بەرى قاراي) 4 رەت ورىن اۋىستىرعانى، ال 2008 جىلدان بەرى №24 ءورىستىلدى مەكتەپ عيماراتىنىڭ ءبىر قاناتىندا «سىعىلىسىپ» وقىپ جاتقانى باياندالعان. جاڭاعى ءورىستىلدى مەكتەپتىڭ ءوزى 1200 ورىنعا ەسەپتەلگەن. سول 1200 ورىننان قازاق قىزدار گيمنازياسىنا دەپ 200 ورىن بولىنگەن. №25 قازاق گيمنازياسىنىڭ 422 وقۋشىسى سول 200 ورىندا 2 اۋىسىمدا وقۋعا ءماجبۇر كورىنەدى. قىسقاسى، مەكتەپتىڭ اتى بار دا، زاتى جوق!

ماقالا سايىمىزدا 5 تامىز كۇنى جاريالاندى. سودان بەرى تۇپ-تۋرۋ 7 كۇن ءوتتى. بۇگىن سەگىزىنشى كۇن. وبلىس اكىمى مەن ءبىلىم مينيسترىنە حات جازعان ساياساتشى ەرلان سايروۆتىڭ دا، «وقۋشىلار 27 جىل بويى عيماراتسىز وتىر» دەپ ماقالا جازعان Abai.kz-ءتىڭ دە ايتار ءcوز، تالاپ تىلەگى –  27 جىل بويى «قاڭعىرىپ» جۇرگەن وقۋشىلارعا مەكتەپ سالىپ بەرۋ!

الايدا، ەل-جۇرتتىڭ، ەل-جۇرتتان بۇرىن، باسقا مەكتەپتىڭ 200 ورىندىق ءبىر بۇرىشىندا سىعىلىسىپ ءجۇرىپ وقىپ جاتقان 422 وقۋشىنىڭ «مەكتەپ سالىپ بەرىڭىز» تىلەگىن جەرگىلىكتى باسشىلار «سىن» دەپ قابىلداعان كورىنەدى. جەلىدە جازبا جاريالاپ، بۇل ۇسىنىستى قولداعان كەيبىر ازاماتتارعا پاۆلودار وبلىسى مەن ەكىباستۇز قالاسىنىڭ اكىمدىگى: «ەگەر گيمنازيا سالۋ جونىندەگى ماسەلەنى كوتەرە بەرسەڭدەر، بۇل وقۋ ورنىن جاۋىپ تاستايمىز»، دەپ «سەس» كورسەتكەن كورىنەدى. بۇل تۋرالى ەرلان سايروۆ الەۋمەتتىك جەلىدە جازىپتى.

جەرگىلىكتى بيلىك سىني كوزقاراستى كوتەرە المايدى!

ەرلان سايروۆ:

- مەنى «نەگە قوعام بيلىككە جۇيەلى تۇردە سىني كوزقاراسپەن قارايدى، نەلىكتەن ازاماتتار مەملەكەتتەن جيرەنىپ بارادى»، دەگەن سۇراق ءجيى مازالايدى.

بۇل نيگيليزمنىڭ سەبەپتەرى كوپ، سول سەبەپتەردىڭ ءبىرى – جەرگىلىكتى بيلىك وكىلدەرى وزدەرىنە دەگەن سىني كوزقاراستى كوتەرە المايدى. جەرگىلىكتى ازامات ءبىر ماسەلە كوتەرسە، «كوتەرەم قوي» ءتارىزدى قيسايىپ قالادى. سىناعان ازاماتتارعا بارلىق «كارىن» شاشادى.

ءبىر مىسال كەلتىرەيىن، مەن جاقىندا وسى جەلىدە ەكىباستۇز قالاسىنداعى قىزدار گيمنازياسىنىڭ 26 جىل (نەگىزى 27 جىل) بويى ءوزىنىڭ شاڭىراعىنسىز، باسقا مەكتەپتەردە وگەيدىڭ كەبىن كيىپ جۇرگەنى جونىندە جازعان بولاتىنمىن.

بۇل ماسەلەنى كوتەرۋگە مۇرىندىق بولعان ەكىباستۇز قالاسىنىڭ تۇرعىنى، «فەيسبۋكتاعى» مەنىڭ دوسىم داريا ەرگازينا (Daria Ergazina). ول كىسى جەرگىلىكتى گازەتتە قىزمەت اتقارادى. سول جەردىڭ پارتيوتى بولعاندىقتان ءار-ءتۇرلى وزەكتى ماسەلەلەردى كوتەرەدى. قىسقاسى، «ەلىم دەپ جۇرگەن ازامات». شىنى كەرەك، ناقتى ومىردە بىردە-ءبىر رەت ول كىسىنى كورمەگەنمىن.

«ەل بولامىن دەسەڭ، بەسىگىڭدى تۇزە» دەگەندەي، مەن بۇل گيمنازيانىڭ ماسەلەسىن كوتەرگەننەن كەيىن Abai.kz, جانە باسقا دا ءبىردى-ەكىلى سايت بۇل ماسەلەنى جازدى.

ەندى، پاۆلودار وبلىسىنىڭ اكىمدىگى، ەكىباستۇز قالاسىنىڭ اكىمدىگى وسى ازاماتتارعا «الەۋمەتتىك جەلىدەگى جازبانى الىپ تاستاڭدار»، «جۇمعان اۋىزدارىڭدى اشپاڭدار» دەگەن سىڭايدا اڭگىمە ايتاتىن كورىنەدى. ەڭ باستىسى، «ەگەر گيمنازيا سالۋ جونىندەگى ماسەلەنى كوتەرە بەرسەڭدەر، بۇل وقۋ ورنىن جاۋىپ تاستايمىز» دەگەن كورىنەدى.

ءبىزدىڭ بيلىكتى حالىقتىڭ جەك كورە باستاعانى – وسىنداي ورتاڭقول «شولاق بەلسەندىلەردىڭ» سولاقاي تىرلىگىنەن. ال، بۇكىل قازاقستان بويىنشا قانشاما اكىم-قارالار ەلدى وسىلاي «بيشىگىمەن بيلەتىپ» وتىر.

ەكىباستۇزداعى ماسەلەگە كەلەتىن بولساق، قىزدار گيمنازياسىنا پانا تاۋىپ بەرۋدىڭ ورنىنا، ءزاۋلىم وقۋشىلار ساراي جۇمىس ىستەپ تۇرسا دا، جەرگىلىكتى بيلىك تاعى ءبىر وقۋشىلار سارايىن سالماقشى ەكەن. مىنا تۇرىمەن، جەرگىلىكتى شەنەۋىكتەر قازاق قىزدار گيمنازياسىن جاۋىپ تىناتىن ءتارىزدى.

حالىق پەن بيلىك اراسىنا سىنا سالاتىن وسىنداي قۇبىلىستار. مەملەكەتكە سەنىمدى تۇردە «دەۆالۆاتسيا» جاسايتىن، حالىقتى مەنسىنبەيتىن شەنەۋىك پەن نومەنكلاتۋرانىڭ ءوزى. نە جىلارىڭدى، نە كۇلەرىڭدى بىلمەيسىڭ...

ءبىز بۇل ماسەلەنى ارقاشان ءوز نازارىمىزدا ۇستايتىن بولامىز!

Abai.kz