(ەسكە الۋ)

تاۋەلسىز ەلى مەن جەرىنىڭ تۋىن كوتەرىپ، قۇلشىنا ەڭبەكتەنگەن ارداقتى ازامات، اسىل اعامىز ەسەت ىسقاقۇلى قاجىمۇراتوۆتىڭ دۇنيەدەن وزعانىنا، مىنە، قىرىق كۇن ءوتىپتى.

بۇگىنگى الماتى وبلىسى، كوكسۋ اۋدانى مۇسابەك اۋىلىندا 1945-ءشى جىلى 3-ءشى ساۋىردە دۇنيەگە كەلگەن قازاق بالاسى ەسەت ىسقاقۇلى ءوز ەلىنىڭ ماڭداي الدى ماقتانىشىنا اينالدى.

سوناۋ ماسكەۋ پوليگرافيالىق ينستيتۋتىن  ءبىتىرىپ، پوليگرافيا مامانى رەتىندە قانات قاعا ءبىلدى. قاي ءىستى دە ويلانىپ-تولعانىپ شەشەتىن ەسەت اعا تالاپشىلدىعىمەن، ساناسىنىڭ ەلەگىنەن وتكىزىپ وتىراتىندىعىمەن، قاپى كەتپەۋگە، ءمۇلت جىبەرمەۋگە تىرىسىپ، جاڭاشىلدىققا ۇمتىلاتىندىعىمەن ەرەكشەلەنەتىن. سونىڭ ارقاسىندا پوليگرافيا سالاسىنا بار عۇمىرىن ارنادى.

ەسەت ىسقاقۇلى باسپا ءىسىنىڭ بىلگىر مامانى ەدى. ەسەت اعا بىرنەشە بۋىن باسپاگەرلەردى تاربيەلەۋگە، وندىرىسكە ۋاقىت اعىمىمەن بىرگە جاڭا تەحنولوگيالاردىڭ ەنۋىنە ۇلەس قوستى. ەسەت اعانى ەسكە العاندا اقجارقىن مىنەزى، تالاپشىلدىعى، باسپا ءىسىن بۇگە-شىگەسىنە دەيىن بىلەتىندىگى، ۇيىمداستىرعىشتىق قاسيەتى ءدال بۇگىنگىدەي كوز الدىمىزدا تۇرا قالادى. 

ەساعاڭنىڭ ءار ىسىنەن رۋحاني بەكزاتتىق تانىلىپ تۇراتىن. ءوزىنىڭ تاڭداپ العان باسپا ءىسى سالاسىندا بىلىكتى مامان رەتىندە 54 جىل قايمىقپاي قانات قاقتى. قىزمەتتىك جولىن باسپاحانانىڭ شەبەرىنەن باستاعان ول، مينيسترلىكتىڭ سەنىم ارتقان قىزمەتتەرىنىڭ بارىنەن دە سۇرىنبەي ءوتىپ، ەل ءۇمىتىن اقتاي ءبىلدى. سوندىقتان ەسەت ىسقاقۇلىنىڭ پوليگرافيا جانە باسپا سالاسىنداعى اتقارعان قىزمەتتەرى – ونىڭ ءومىر جولىنىڭ جارقىن بەتتەرى دەسەك تە قاتەلەسپەيمىز.

ەسەت ىسقاقۇلى ەڭ ءبىر كۇردەلى، كۇرمەۋى كوپ قيىن كەزەڭدەردە، توقسانىنشى  جىلدارى قازاق كسر مەملەكەتتىك ءباسپاسوز كوميتەتىنىڭ باسپا ءىسىن دامىتۋ ءبولىمىنىڭ باستىعى بولدى. ودان كەيىن مينيسترلىكتىڭ عىلىمي تەحنيكالىق دامۋ باس باسقارماسىنىڭ باسشىلىعىنا تاعايىندالدى. قانداي باسشىلىق قىزمەتتە جۇرمەسىن ءوزىنىڭ قاراپايىم مىنەزىمەن جۇرگەن ورتاسىندا سىيلى بولا ءبىلدى. نار تۇلعالى ازاماتتىڭ ۇلتتىق بانكتىڭ قالىپتاسۋىنا سىڭىرگەن ەڭبەگىن ايرىقشا اتاپ وتۋگە بولادى. ميلليونداردىڭ كوز قۋانىشىنا اينالىپ جۇرگەن تەڭگەمىزدى دۇنيەگە اكەلگەن باسپاگەر رەتىندە قارلىعاشتارىنىڭ ءبىرى سول كەزدەگى قازاقستان رەسپۋبليكاسى ۇلتتىق بانكىنىڭ وندىرىستىك كاسىپورىننىڭ باس ديرەكتورى – ەسەت اعا ەدى. وزىنەن كەيىنگى جاس تولقىن باسپاگەرلەرگە ۇلاعاتتى تالىمگەر بولعان ارداگەر اعا، مەملەكەتتىك ءمانى بار ىستەردە دە ءوزىنىڭ ۇلتجاندىلىعىن تانىتا ءبىلدى.

ەسەت اعانى پاراساتتىلىعى ءۇشىن ەرەكشە قۇرمەتتەپ، الدىنان قيا وتپەۋشى ەدىك. ەساعاڭنىڭ شەكپەنىنەن شىققان بىزدەر ءۇشىن اياۋلى اعانىڭ ءىنى-قارىنداستارىنا، قاباعىنان شاپاعات، كوزىنەن مەيىرىم نۇرى توگىلىپ تۇراتىن قالپىندا ءدال قازىر ەسىكتى شالقاسىنان اشىپ، كىرىپ كەلەتىن سياقتى بولادى دا تۇرادى. ارينە، باسپا سالاسىنداعى ىستەگەن لاۋازىمدى قىزمەتتەرىن تىزبەكتەپ جاتپاساق تا، ونىڭ ءومىرى ء"داۋىر" باسپاسىمەن بىتەقايناسىپ وتكەنى اقيقات. سۋىعىنا ءتوزىپ، ىستىعىنا كۇيە ءبىلدى. ء"داۋىر" باسپاسىنىڭ ابىرويىن اسقاقتاتقان، حالىقارالىق كىتاپ كورمەلەرىنەن العان ماراپاتتارىندا ەسەعاڭنىڭ دا زور ۇلەسى بار.

جۇمىس بارىسىندا قانداي قيىندىققا تاپ بولسا دا، سابىرلىقپەن جول تابۋعا بەيىم ەدى. ەسەت اعانىڭ بويىنان ازات ارىنىڭ، ازامات قالىپتاستىرعان قاسيەتتىڭ جاسامپاز كۇشىن كورىپ، ونەگە الۋشى ەدىك. ەندى ونى جالعاستىرۋ – ءبىزدىڭ پارىزىمىز.

ءبىز اياۋلى ەسەت اعامىزدىڭ ارىپتەستەرى، كەشە عانا اقىل-كەڭەسىن تىڭداپ وسكەن بۇكىل ۇجىم، جادىمىزدا ساقتايمىز. ەساعاڭنىڭ جىلى ءجۇزى، جۇرەك ءلۇپىلى، "اينالايىن" دەگەن اق تىلەگى ەشقاشان ۇمىتىلمايدى. اعانىڭ بىزگە قالدىرعان ونەگەسى مەن ءىس-تاجىريبەسىن ىزگىلىك دەپ بىلەمىز. سوڭىنان ەرگەن جاستارعا دەگەن سەنىمىن بولاشاققا دەگەن ۇمتىلىستىڭ ءبىر كورىنىسى دەپ قابىلدايمىز. قاشاندا قاسىمىزداسىز، ارداقتى ەسەت اعا! سالىپ كەتكەن سارا جولىڭىز ءبىزدىڭ سانامىزدا ماڭگى ساقتالادى...

ء"داۋىر" باسپاسىنىڭ ۇجىمى

Abai.kz