ءبىلىم جانە عىلىم ءمينيسترى اسحات ايماعامبەتوۆ 1 قىركۇيەكتە قازاقستاندىق مەكتەپتەردە قانداي وزگەرىستەر بولاتىنىن ايتتى. 

ءمينيستردىڭ ايتۋىنشا، مەكتەپتەردە كەزەكشى توپتارعا كەلەتىن بالالار ءۇشىن ءبىلىم كۇنى وتەدى.

«بۇگىندە ءبىز مەكتەپ ديرەكتورلارى مەن ءبىلىم باسقارمالارىنا ادىستەمەلىك نۇسقاۋلاردى جىبەردىك. ارينە، 1 قىركۇيەك – ءبىلىم كۇنى وتەدى، ءتيىستى شارالار دا وتەدى. سەبەبى كەزەكشى توپتارعا كەلەتىن بالالار بار», - دەدى ايماعامبەتوۆ.

ياعني، مەكتەپتەگى شارالار 1-4 سىنىپتار ءۇشىن ۇيىمداستىرىلادى. ال قالعان وقۋشىلار ونلاين فورماتتا قاتىسادى.

«ادەتتە قالاي بولدى؟ 1 قىركۇيەكتە بالالار مەكتەپكە كەلەتىن. سول جەردە سالتاناتتى جيىن ءوتىزىلىپ، ارى قاراي بالالار سىنىپ ساعاتتارىنا قاتىساتىن. وسى جولى جيىن وتكىزۋدىڭ قاجەتى جوق. سوندىقتان سىنىپ ساعاتتارى عانا وتەتىن بولادى. دەمەك، كەزەكشى توپتار ءۇشىن سىنىپ ساعاتتارى ۇيىمداستىرىلادى. ال قاشىقتان وقيتىندار ءۇشىن ونداي شارا ونلاين رەجيمدە وتەدى», - دەدى مينيستر.

باستاۋىش سىنىپ وقۋشىلارى «كەزەكشى سىنىپتاردا» توپتا 15 بالادان وقيدى. سوڭعى مالىمەتتەر بويىنشا، 530 مىڭ بالانىڭ اتا-اناسى وففلاين وقۋعا ءوتىنىش بەرگەن، بۇل وقۋشىلاردىڭ جالپى سانىنىڭ 15%. 5% - شاعىن جيناقتاۋشى مەكەمەلەردە ءبىلىم الاتىن وقۋشىلار، ولاردىڭ سانى - 202 مىڭ.

دەگەنمەن، كەزەكشى سىنىپتا ءداستۇرلى فورماتتا ءبىلىم بەرۋ بارىسىنا بىرنەشە قاتاڭ تالاپ قويىلادى.

«كەزەكشى سىنىپتار ءداستۇرلى فورماتتا وقيدى دەسەك تە بىرنەشە قاتاڭ تالاپ قويىپ وتىرمىز. ويتكەنى، ءبىز ءۇشىن ەڭ باستىسى - قاۋىپسىزدىك ماسەلەسى. سوندىقتان بىرىنشىدەن ءۇزىلىس ءارتۇرلى ۋاقىتتا بولادى. ساباقتىڭ باستالۋى دا ءارتۇرلى ۋاقىتتا جۇرگىزىلەدى. ەكىنشىدەن، قىركۇيەكتە ساباق ۇزاقتىعى 40 مينۋتپەن شەكتەلەدى»، - دەدى مينيستر.

ونىڭ اتاپ وتۋىنشە، كەزەكشى سىنىپتاردا سانيتارلىق تالاپتار قاتاڭ ساقتالۋى ءتيىس.

«بالالار ءبىر كابينەتتە عانا وقيدى. ادەتتەگىدەي ءبىر كابينەتتەن ەكىنشى كابينەتكە كوشىپ وقۋعا جول بەرمەيمىز دەپ شەشتىك. ءار كۇن سايىن تەرمومەتريا جۇرگىزىلەدى. جۋ، جەلدەتۋ رەجيمى بويىنشا ءتيىستى تالاپتار قولدانىلادى. شاعىن جيناقتالعان مەكتەپتەردە ءداستۇرلى ءبىلىم بەرۋ بارىسىنا دا وسى تالاپتار قويىلىپ وتىر. بۇعان قوسا، ءبىر سىنىپتا 25-30 بالا بولاتىن بولسا، وندا ولاردى 15 بالادان اسپايتىن توپقا ءبولۋ كەرەك دەگەن شەشىم قابىلدادىق. وسى شەشىم اياسىندا جۇمىس جۇرگىزىلەدى»، - دەدى اسحات ايماعامبەتوۆ.

بۇگىندە جالپى رەسپۋبليكا بويىنشا، 2,6 ملن وقۋشى بار. ولاردىڭ 80% قاشىقتان وقيدى.

«ونىڭ ەكى جولى بار - ينتەرنەت نەمەسە تەلەديدار ارقىلى. «ەل ارنا» مەن «بالاپان» ارنالارى 9 ساعاتقا دەيىن تەلەساباق كورسەتۋگە دايىن. قازىر تۇسىرىلىمدەر جالعاسۋدا»، - دەدى مينيستر.

ال، قاشىقتان وقىتۋ 8 ينتەرنەت پلاتفورمادا جۇرگىزىلەدى.

«ارينە، قاشىقتان وقىتۋ بويىنشا ەكى نەگىزگى باعىت بار. ءبىرىنشى باعىت - ينتەرنەت ارقىلى وقىتۋ. ينتەرنەت ارقىلى وقىتۋ بويىنشا بىزدە ارنايى بىرنەشە ينتەرنەت پلاتفورما بار. جالپى، وتكەن وقۋ جىلىنىڭ 4-توقسانىندا بىزدە ەكى نەگىزگى 2 ينتەرنەت پلاتفورما بولسا، وسى ۋاقىتتا وعان تاعى 6 ينتەرنەت پلاتفورما قوسىلىپ، 8-گە جەتتى»، - دەدى اسحات ايماعامبەتوۆ.

ونىڭ اتاپ وتۋىنشە، وسى پلاتفورمالاردىڭ ىڭعايىنا بايلانىستى، بەرىپ وتىرعان مۇمكىندىگىنە بايلانىستى مەكتەپتەر، قالالىق، اۋداندىق ءبىلىم بولىمدەرى شەشىم قابىلداپ، كەلىسىمشارتقا قول قويادى جانە سول پلاتفورمامەن جۇمىس ىستەيدى.

«ەكىنشى باعىتتا بالالار تەلەارنالار ارقىلى ساباق بەرىلەدى. «ەل ارنا» جانە «بالاپان» تەلەارنالارى تەلەساباقتارعا تاۋلىگىنە 9 ساعاتقا دەيىن ەفير ءبولىپ وتىر»، - دەدى مينيستر.

Abai.kz