رەداكتسيادان. گەرمانياداعى ەۋروپا قازاقتارى قاۋىمداستىعىنىڭ توراعاسى، قوعام قايراتكەرى ءومىرحان التىن الەۋمەتتىك جەلى پاراقشاسىندا بالجىگىت تورىباي ەسىمدى وتانداسىمىزدىڭ تۇرىك پرەزيدەنتىنەن ازاماتتىق سۇراپ وتىرعانىن جازدى. ءومىرحان مىرزانىڭ ايتۋىنشا، بالجىگىتتىڭ ەكى پەرزەنتى اۋىر دەرتكە شالدىققان. بىراق، ول بۇلدىرشىندەردى قازاقستاندا ەمدەۋگە مۇمكىندىك تاپپاعان. ەگەر بالجىگىت تۇركيا ازاماتتىعىن السا، ەكى پەرزەنتى ول جاقتا تەگىن ەمدەلەتىن كورىنەدى. ءبىز بۇل ماسەلەگە قر دەنساۋلىق ساقتاۋ مينيسترلىگى بەي-جاي قارامايدى دەپ ۇمىتتەنەمىز...

«اسا وكىنىشتى جاعداي!!!

قازاق بالاسى تۇرىك پرەزيدەنتىنەن كومەك سۇراپ وتىر!!!

اسا اۋىر دەرتكە شالدىققان قوس بىردەي پەرزەنتىن ءوز وتانىندا ەمدەۋ ءۇشىن ەشقانداي مۇمكىنشىلىككە قول جەتكىزە الماعان بالجىگىت - Balzhigit Torybay - باۋىرىمىز، بالالارىنىڭ تاعدىرىنا الاڭداپ، ەم ىزدەپ وسىدان بىرنەشە اي الدىن تۇرىك ەلىنە، ستامبۋل قالاسىنا بارعان.

ارۋجان مەن بەيبارىس ەسىمدى بۇلدىرشىندەرىمىز وكىنىشكە وراي الەمدە سيرەك كەزدەسەتىن "ارقا-تىرەك بۇلشىقەت اتروفياسى(سپينالنايا مىشەچنايا اتروفيا)” دەپ اتالاتىن اۋرۋعا شالدىققان.

بالجىگىت پەن جولداسى قازاقستاندا رەسمي ورىندارمەن قاتار كازمۇنايگاز، سامۇرىق قازىنا، حالىق بانك، كاسپي بانك دەگەن سياقتى ءىرى كومپانيالار مەن بانكتەرگە حابارلاسىپ كومەك سۇراعان. الايدا ولاردان ەش كومەك بولماعان.

جاقىن ارادا ولار ماعان حابارلاسىپ جاگدايلارىن تۇسىدىرگەننەن سوڭ وسى گەرمانياداعى ورىندارعا شىعىپ كومەك جولدارىن قاراستىردىم. بۇل وتە سيرەك كەزدەسەتىن اۋرۋدى ەمدەۋ وتە كۇردەلى دە قىمبات ەكەن. ءار ءبىر بالا ءۇشىن قاجەت ءبىر رەتتىك ءبىر ءدارىنىڭ باعاسى 100.000 ەۆرو تۇرادى ەكەن. شىندىعىن ايتقاندا ارۋجان مەن بەيبارىستى بۇل جاققا اكەلىپ ەمدەتۋ وتە قيىن بولىپ تۇر.

ەندى بارار جەرى، باسار تاۋى قالماعان بالجىگىت باۋىرىمىز تىكە تۇركيا پرەزيدەنتى رەجەپ ەردوعانعا ۇندەپ كومەك، اتاپ ايتقاندا ازاماتتىق سۇراپ وتىر. ەگەر ول تۇركيا ازاماتتىعىنا قابىلدانسا بالالارى سوندا تەگىن ەمدەلەتىن بولادى.

اللا تاعالا تاعدىر تالكەگىنە ۇشىراعان ارۋجان مەن بەيبارىس بۇلدىرشىندەرىمىزگە شيپاسىن بەرسىن!

اللا تاعالا اتا-اناسىنا كۇش-قۋات جانە سابىر بەرسىن!»

ءومىرحان التىننىڭ جازباسى

Abai.kz