بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن پالاتانىڭ التىنشى سەسسياسىنداعى العاشقى بيۋرو وتىرىسى ءوتتى.

بيۋرودا مەملەكەت باسشىسى قاسىم-جومارت توقاەۆتىڭ التىنشى سەسسيانىڭ اشىلۋىندا قازاقستان حالقىنا ارناعان جولداۋىندا كورسەتىلگەن باسىمدىقتارىن ەسكەرە وتىرىپ، دەپۋتاتتىق كورپۋس قىزمەتىنىڭ نەگىزگى باعىتتارى تالقىلاندى.

وتىرىستى اشقان ءماجىلىس توراعاسى نۇرلان نىعماتۋلين مەملەكەت باسشىسىنىڭ العا قويعان مىندەتتەرىنىڭ اۋقىمدىلىعانا توقتالىپ، ولاردىڭ شەشىمى قازاقستاندىقتاردىڭ ءومىرىنىڭ بارلىق سالالارىن جاڭعىرتۋ جانە قارقىندى دامىتۋ ءۇشىن قاجەتتىگىنە نازار اۋداردى. سونىمەن بىرگە، دەپۋتاتتارعا مەملەكەتتىك باسقارۋدىڭ جاڭا مودەلىن زاڭنامالىق قامتاماسىز ەتۋ، كۆازيمەملەكەتتىك سەكتورداعى رەفورمالاردى قولداۋ، سالىق زاڭناماسى مەن بيۋدجەتتىك ساياساتتى جەتىلدىرۋ ماسەلەلەرى بويىنشا جۇمىس جاساۋ قاجەت ەكەنىنە توقتالدى. جۇمىستىڭ باسىم بولىگى ازاماتتاردىڭ الەۋمەتتىك ءال-اۋقاتىن جاقسارتۋمەن، سونىڭ ىشىندە، دەنساۋلىق ساقتاۋ، ءبىلىم بەرۋ، بالالاردىڭ قۇقىقتارىن قورعاۋ ماسەلەلەرىن شەشۋمەن بايلانىستى.

نۇرلان نىعماتۋلين اتاپ وتكەندەي، پرەزيدەنت جولداۋى – ەلدى جاڭعىرتۋدىڭ جاڭا كەزەڭى.

بيۋرو وتىرىسىنىڭ كۇن ءتارتىبىنىڭ جوباسىندا بىرقاتار ماڭىزدى قۇجاتتاردى جۇمىسقا الۋ كوزدەلگەن.

اتاپ ايتقاندا، ۇلتتىق قوردان 2021–2023 جىلدارعا ارنالعان كەپىلدەندىرىلگەن ترانسفەرت تۋرالى، 2021–2023 جىلدارعا ارنالعان رەسپۋبليكالىق بيۋدجەت تۋرالى زاڭ جوبالارى بار.  وسىلاردىڭ قاتارىندا: ورتالىق جانە جەرگىلىكتى مەملەكەتتىك ورگاندار اراسىندا اۋىزسۋمەن جابدىقتاۋدى سۋبسيديالاۋ جونىندەگى وكىلەتتىكتەردىڭ اراجىگىن اجىراتۋ ماسەلەلەرى بويىنشا تۇزەتۋلەر ەنگىزۋ تۋرالى زاڭ جوباسى، سونداي-اق، «تەحنيكالىق رەتتەۋ تۋرالى» جانە وعان ىلەسپە زاڭ جوبالارى بار.

الداعى جالپى وتىرىستا «ەرەكشە تاۋارلاردى باقىلاۋ تۋرالى» جانە وعان ىلەسپە زاڭ جوبالارى بويىنشا قورىتىندى ازىرلەۋ مەرزىمى بەلگىلەنەتىن بولادى.

سونىمەن قاتار، جۇمىسقا الىنعان قۇجاتتاردىڭ قاتارىندا «قازاقستان رەسپۋبليكاسىنىڭ حالىقارالىق شارتتارى تۋرالى» زاڭىنا وزگەرىستەر مەن تولىقتىرۋ ەنگىزۋ تۋرالى جانە اقپارات ماسەلەلەرى بويىنشا زاڭ جوبالارى بار.

وسى كۇنى دەپۋتاتتار بىرقاتار راتيفيكاتسيالىق زاڭ جوبالارىن دا جۇمىسقا الماق. اتاپ ايتساق، ولار: ەاەو تۋرالى شارتقا وزگەرىستەر ەنگىزۋ تۋرالى حاتتاما، قازاقستان مەن بىرىككەن اراب امىرلىكتەرى اراسىنداعى ەكى ەل استانالارىندا ەلشىلىكتەردىڭ جەر ۋچاسكەلەرىن وتەۋسىز پايدالانۋعا ءوزارا بەرۋ تۋرالى كەلىسىم، قازاقستان مەن سولتۇستىك ماكەدونيا،  بولگاريا، كورەيا جانە بىرىككەن اراب امىرلىكتەرى ەلدەرى اراسىنداعى سوتتالعان ادامداردى بەرۋ شارتتارى تۋرالى زاڭ جوبالار. سونداي-اق، جۇمىسقا قابىلدانعاندار ىشىندە تمد قاتىسۋشى مەملەكەتتەردىڭ باس بوستاندىعىنان ايىرۋمەن بايلانىستى ەمەس جازالاردى ورىنداۋدى بەرۋ تۋرالى كونۆەنتسيا، سونىمەن قاتار قازاقستان رەسپۋبليكاسىنىڭ ۇكىمەتى مەن ءبىلىم، عىلىم جانە مادەنيەت ماسەلەلەرى جونىندەگى بىرىككەن ۇلتتار ۇيىمى (يۋنەسكو) اراسىنداعى يۋنەسكو اياسىندا مادەنيەتتەردى جاقىنداستىرۋ حالىقارالىق ورتالىعىن (2-سانات) قۇرۋ، ەاەو شەڭبەرىندە اۋىل شارۋاشىلىعى جانۋارلارىمەن سەلەكتسيالىق-اسىل تۇقىمدىق جۇمىس جۇرگىزۋدى بىرىزدەندىرۋگە باعىتتالعان شارالار تۋرالى كەلىسىمدەر.  وسىلاردىڭ قاتارىندا، ەاەو تۋرالى شارتقا قىرعىز رەسپۋبليكاسىنىڭ قوسىلۋىنا بايلانىستى ەاەو تۋرالى شارتتى، ەۋرازيالىق ەكونوميكالىق وداقتىڭ قۇقىعىنا كىرەتىن جەكەلەگەن حالىقارالىق شارتتاردى جانە ەۋرازيالىق ەكونوميكالىق وداق ورگاندارىنىڭ اكتىلەرىن قولدانۋى جونىندەگى جاعدايلار مەن وتپەلى ەرەجەلەر تۋرالى راتيفيكاتسيالاناتىن زاڭ جوبالارى بار.

Abai.kz