قىزمەتىمەن قوشتاساتىن 15 حاتشى كىم؟
كۇنى كەشە عانا قازاقستان حالقىنا جولداۋ جولداعان پرەزيدەنت توقاەۆ مينيسترلىكتەردەگى جاۋاپتى حاتشىلاردى، حاتشىلىق ينستيتۋتتى قىسقارتۋ قاجەت دەپ سويلەگەن ەدى.
«اتالعان ينستيتۋتتى ەنگىزەردە ولاردىڭ اۋىسپايتىندىعى مينيسترلەردى اكىمشىلىك-كادرلىق جۇكتەمەدەن بوساتىپ، اپپارات تۇراقتىلىعىن قامتاماسىز ەتەدى دەپ كۇتىلگەن.
ىسكە كەلگەندە ولاي بولماي شىقتى. ول ول ما، مينيسترلەر مەن جاۋحاتشىلار اراسىندا ءوزارا تۇسىنىسپەۋشىلىكتەر ورىن العان جاعدايلار دا بولدى. بۇنىڭ كەسىرى ورتاق ىسكە ءتيدى.
سۇراۋ ءبىر ادامنان، پرەزيدەنت ءوزى تاعايىندايتىن مينيستردەن بولۋى كەرەك!
سوندىقتان جاۋحاتشىلىق ينستيتۋت تاراتىلۋى، ولاردىڭ مىندەتتەرى مەن قىزمەتتەرى مينيسترلىكتەردىڭ اپپارات باسشىلارىنا بەرىلۋى ءتيىس!»، - دەگەن پرەزيدەنت.
ءسويتىپ، پرەزيدەنت ايتتى. جاۋاپتى حاتشىلىق ينستيتۋتى تاراتىلاتىن بولدى. سونىمەن، كىمدەر قىزمەتىمەن قوشتاسادى؟
مىنە، ءتىزىم:
ارمان جۇمابەكوۆ – ۇلتتىق ەكونوميكا مينيسترلىگىنىڭ جاۋحاتشىسى،
قانات سارسەمباەۆ – ءبىلىم جانە عىلىم مينيسترلىگىنىڭ جاۋحاتشىسى،
جانات قوجاحمەتوۆ – اقپارات جانە قوعامدىق دامۋ مينيسترلىگىنىڭ جاۋحاتشىسى،
باقىتجان بەرىكبايۇلى – مادەنيەت جانە سپورت مينيسترلىگىنىڭ جاۋحاتشىسى،
مارات ورازاەۆ – اۋىلشارۋاشىلىق مينيسترلىگىنىڭ جاۋحاتشىسى،
جانىبەك گۋپيروۆ – ساۋدا جانە ينتەگراتسيا مينيسترلىگىنىڭ جاۋحاتشىسى،
ايدا قۇرمانعاليەۆا – ەڭبەك جانە حالىقتى الەۋمەتتىك قورعاۋ مينيسترلىگىنىڭ جاۋحاتشىسى،
ايدىن اشۋەۆ – قارجى مينيسترلىگىنىڭ جاۋحاتشىسى،
ءانۋار احمەتجانوۆ – تسيفرلىق دامۋ، يننوۆاتسيا جانە اەروعارىش ءوندىرىسى مينيسترلىگىنىڭ جاۋحاتشىسى،
ءسابيت نۇرلىباي – ەكولوگيا، گەولوگيا جانە تابيعي رەسۋرستار مينيسترلىگىنىڭ جاۋحاتششىسى،
تالعات مومىشەۆ – ەنەرگەتيكا مينيسترلىگىنىڭ جاۋحاتشىسى،
ازامات امىرعاليەۆ – ادىلەت مينيسترلىگىنىڭ جاۋحاتشىسى،
اركەن ۋتەنوۆ – سىرتقى ىستەر مينيسترلىگىنىڭ جاۋحاتشىسى،
مەرەكە پشەمباۆ – يندۋستريا جانە ينفراقۇرىلىمدىق دامۋ مينيسترلىگىنىڭ جاۋحاتشىسى،
اسەم ءنۇسىپوۆا – دەنساۋلىق ساقتاۋ مينيسترلىگىنىڭ جاۋحاتشىسى.
جاۋاپتى حاتشى لاۋازىمى «ا» كورپۋسىنا جاتادى. جاۋاپتى حاتشى – ايرىقشا ستاتۋسقا يە مەملەكەتتىك قىزمەتكەر. ونى پرەزيدەنت اكىمشىلىگىنىڭ ۇسىنۋىمەن، مەملەكەت باسشىسى پرەمەر-مينيسترمەن اقىلداسا وتىرىپ تاعايىندايدى جانە قىزمەتىنەن بوساتادى. كەيبىر دەرەكتەرگە سۇيەنسەك، 2017 جىلى بۇل لاۋازىمداعى قىزمەتكەرلەردىڭ ەڭ جوعارعى جالاقىسى 685 مىڭ تەڭگەنىڭ توڭىرەگىندە بولعان.
Abai.kz
