وتكەن اپتا دا عوي. قالا اكىمى مۇرات ايتەنوۆ شىمكەنتتىڭ ءبىلىم سالاسىنىڭ ەسەبىن تىڭدادى.

4 ينديكاتوردىڭ 3-ءۋى، 28 كورسەتكىشتىڭ 15-ءى عانا ورىندالعان. قولعا قالام مەن قاعاز الىپ، ارقايسىسى بويىنشا ناقتى ءىس-شارا ويلاستىرىلدى.

ايتپاعىم، وسىلاردىڭ ىشىندە «قوسىمشا بىلىممەن قامتىلعان وقۋشىلاردىڭ ۇلەسى» دەگەن كورسەتكىش بار. شىمكەنتتە بۇل كورسەتكىش تومەن. بۇل وقۋشىلار ءبىر مەزگىل ءبىلىم الىپ، ءبىر مەزگىل ءتۇرلى داعدىلارىن دامىتۋ ءۇشىن ويلاستىرىلعان، بالانىڭ سارقىلماس ەنەرگياسىن ءوزىن دامىتۋعا جۇمساتۋ ءۇشىن قاجەت كورسەتكىش. بۇل پراكتيكا بۇكىل الەمدە بار.

شىمكەنت قالاسىنداعى 147 مەملەكەتتىك مەكتەپتىڭ 19-ى ءۇش اۋىسىمدا. جىلىنا وقۋشىلار سانى 12 مىڭ بالاعا ارتىپ وتىر. قوسىمشا ءبىلىم تۇرماق، نەگىزگى ءبىلىمدى قامتۋ ءۇشىن جىل سايىن قانشاما مەكتەپ سالۋ كەرەك.

اكىم ويلانىپ وتىردى دا، «وسى قازىر تويحانالار جابىق. قاشان اشىلاتىنى بەلگىسىز. سولاردىڭ يەلەرىمەن سويلەسىڭدەر. ولاردىڭ بىرقاتارىن قوسىمشا ءبىلىم بەرۋ ۇيىمدارىنا اينالدىرايىق» دەپ تاپسىردى.

كەشە مەملەكەت باسشىسى كوروناۆيرۋستىڭ تاعى ەكى جىلعا سوزىلۋ مۇمكىن ەكەنىن ايتتى. وعان دەيىن قالاي بولاتىنىن قازىر ەشكىم ءدوپ باسىپ ايتا المايدى. وعان دەيىن حالىق تويدى شاعىن ەتىپ وتكىزۋدى ادەتكە اينالدىرادى دەپ ويلايمىن. ۇلكەن تويحانالاردىڭ سۇرانىسقا بۇرىنعىداي يە بولاتىنىنا كۇمانىم بار. ونىڭ ۇستىنە، ادامدار كوپشىلىك جەرگە بارۋعا اياق تارتىپ قالعان.

وسىندايدا شىمكەنتتەگى 134 تويحانانىڭ تاعدىرى نە بولماق؟ بوس تۇرا بەرە مە، الدە قوعامعا باسقالاي قىزمەت ەتە مە؟ مىسالى، ماڭدايىنا «سالتانات» تويحاناسى دەپ جازىلىپ تۇرعاننان، سول عيماراتقا ءبىلىم سارايى دەپ جازىپ قويسا، قانداي كەرەمەت! ءتىپتى ءبىلىم سارايىنا يەسىنىڭ اتىن بەرسىن.

مەنىڭ ويىمشا، تويحانالاردى ويحانالارعا وينالدىرۋدىڭ جولدارى مىنالار:

• Coworking center
• جاستار ورتالىعى
• شىعارماشىلىق ورتالىعى
• وقۋشىلار سارايى
• IT hub
• ونەر سارايى
• دومبىرا ورتالىعى
• شەبەرلەر مەكتەبى
• STEM center

ايتا بەرسەڭ، تويحانالاردى جاستاردىڭ الەۋەتىن ارتتىراتىن ورتالىققا اينالدىرۋدىڭ ءتۇرى كوپ. ماسەلەن، الماتىدا SmART POINT دەگەن سoworking center بار، قازىر IT hub-قا اينالىپ كەتتى. قازىر قازاقستانداعى ەڭ مىقتى IT-جوبالار سوندا جاسالادى.

P.S. ايتپاقشى، قازىر ءنۇرسات ىقشام اۋدانىندا ورنالاسقان «وڭتۇستىك» اتتى سالتانات سارايى مەكتەپكە اينالىپ جاتىر. بۇل اۋداندا ورنالاسقان 80-مەكتەپ ءۇش اۋىسىمدى. سالتانات سارايىنا باردىم. دۆورەتس. ساراي دەسە ساراي. مۇنداي ءزاۋلىم عيماراتتى مەكتەپكە اينالادى دەپ كىم ويلاعان!

بىراق بۇل اكىمدىكتىڭ تاپسىرماسىمەن اشىلعان مەكتەپ ەمەس. تويحانا يەسىنىڭ ءوز قالاۋى. رەسپەكت. مينيسترلىكتەن ليتسەنزيا العان.

نەگىزى تويحانالار، اكىم ايتپاقشى، قوسىمشا ءبىلىم بەرۋ ۇيىمدارىنا، جاستار ورتالىعى، كوۆوركينگ ورتالىقتارعا سۇرانىپ تۇر.

قۇرمەتتى كاسىپكەرلەر، ءبىلىم سالاسىنا قارجى سالىڭىزدار. تابىسى ازداۋ بولار. بالالارىڭىزدىڭ بولاشاعى جارقىن بولسىن دەسەڭىزدەر، ءبىلىم سالاسىنا باس بۇرىڭىزدار.

شىڭعىس مۇقان

Abai.kz