بۇۇ ازىق-تۇلىك جانە اۋىلشارۋاشىلىق ۇيىمى بۇگىن جاريالاعان باياندامادا سۇرانىستىڭ تۇراقتالۋى مەن اقش دوللارىنىڭ السىرەۋى اسەرىنەن جاھاندىق ازىق-تۇلىك باعالارى تامىزدا قاتارىنان ءۇش اي بويى كوتەرىلگەنى ايتىلعان.

قانت، وسىمدىك مايلارى مەن ءىرى ءداندى داقىلدارعا حالىقارالىق باعا بەلگىلەنىمدەرى شىلدە ايىنان بەرى ءوسىپ كەلەدى، ال دۇنيەجۇزىندە جينالاتىن ەگىن بولجامدارى جىل سايىنعى رەكوردتىق كورسەتكىشكە جەتەتىن كورىنەدى.

ەڭ كەڭ تارالعان ازىق-تۇلىك شيكىزاتى تاۋارلارىنىڭ دۇنيەجۇزىلىك باعالارىنداعى وزگەرىستەردى قاداعالايتىن فاو ازىق-تۇلىك باعالارىنىڭ يندەكسى تامىزدا ورتا ەسەپپەن 96,1 ۇپايدى قۇراپ، وتكەن ايمەن سالىستىرعاندا 2,0 پايىزعا ارتقان. بۇل اقپان ايىنان بەرى تىركەلگەن ەڭ جوعارى كورسەتكىش.

فاو استىق باعالارىنىڭ يندەكسى شىلدەدەن باستاپ 1,9 پايىزعا كوتەرىلىپ، 2019 جىلدىڭ تامىزىنداعى مانىنەن ورتا ەسەپپەن 7,0 پايىزعا جوعارىلادى، بۇل ءوسىمنىڭ باستى جەتەكشىسى ءىرى ءداندى داقىلدار بولدى. قۇمايدىڭ باعاسى 8,6 پايىزعا كوتەرىلىپ، ءبىر جىل بۇرىنعى دەڭگەيدەن 33,4 پايىزعا كورسەتكىشتە تىركەلدى، بۇعان نەگىزىنەن قىتايدىڭ يمپورتقا دەگەن سۇرانىسىنىڭ ارتۋى سەبەپ بولدى. اقش-تىڭ ايوۆا شتاتىنداعى داقىلداردىڭ زاقىمدانۋى ۇسىنىسقا اسەر ەتۋى ىقتيمال دەگەن الاڭداۋمەن، جۇگەرىنىڭ باعاسى 2,2 پايىزعا ءوستى. حالىقارالىق كۇرىش باعالارى دا ماۋسىمدىق ۇسىنىستىڭ قىسقارۋى مەن افريكاداعى سۇرانىستىڭ ارتۋى اسەرىنەن قىمباتتادى.

فاو قانت باعالارى يندەكسى الدىڭعى ايمەن سالىستىرعاندا 6,7 پايىزعا ءوستى، بۇل ەۋروپالىق وداق ەلدەرى مەن الەمدەگى ەكىنشى ءىرى قانت ەكسپورتتاۋشى تايلاندتاعى اۋا رايىنىڭ قولايسىزدىعىنا، سونداي-اق قىتايدىڭ يمپورتقا دەگەن سۇرانىسىنا وراي وندىرىستىك جوسپارلاردىڭ قىسقارۋىن كورسەتتى.

فاو وسىمدىك مايلارىنىڭ يندەكسى اسىرەسە پالما مايىنا، سونىمەن قاتار سويا، كۇنباعىس جانە راپس مايلارىنا قاتىستى اسا جوعارى كورسەتكىشتەر اسەرىنەن 5,9 پايىزعا ارتتى. بۇل وزگەرىستەر يمپورتقا دەگەن الەمدىك جاھاندىق سۇرانىستىڭ تۇراقتى قالىپتا ساقتالۋى جاعدايىنداعى پالما مايىن وندىرەتىن جەتەكشى ەلدەردەگى ءوندىرىستىڭ بولجالدى باسەڭدەۋىن ايقىندايدى.

فاو ءسۇت ونىمدەرى باعاسىنىڭ يندەكسى شىلدەدەن باستاپ ايتارلىقتاي وزگەرىسكە ۇشىرامادى، ىرىمشىك پەن قۇرعاق ءسۇت ۇنتاعى وكەانيا ەلدەرىنىڭ ماۋسىمدىق ەكسپورتتىق مۇمكىندىكتەرىنىڭ قارقىنداۋى اياسىندا تومەندەدى. مايدىڭ باعاسى تامىزدا كۇننىڭ اسا ىسۋى اسەرىنەن ءسۇت شىعىمىنىڭ ازايۋىنا تاپ بولعان ەۋروپاداعى ەكسپورتتىق مۇمكىندىكتەردىڭ شەكتەلۋىنە بايلانىستى قىمباتتادى.

فاو ەت باعاسىنىڭ يندەكسى شىلدە ايىنان باستاپ ەلەۋلى وزگەرىستەرگە ۇشىراعان جوق – 2019 جىلدىڭ تامىز ايىنان باستاپ 8,9 پايىزعا تومەندەدى – ويتكەنى ءىرى قارا مال، قۇس ەتى مەن قوي ەتىنە سۇرانىستىڭ تومەندەۋى قىتايدان كەلەتىن شوشقا ەتىنە دەگەن سۇرانىستىڭ وسۋىمەن وتەلدى.

ءداندى داقىلداردىڭ بولجامدارى جاڭارتىلدى

فاو سونىمەن قاتار 2020 جىلى دۇنيەجۇزىلىك ءداندى داقىلدار ءوندىرىسى بويىنشا بولجامدى شىلدە ايىنداعى كورسەتكىشتەن 25 ميلليون تونناعا تومەندەتتى، بۇعان امەريكا قۇراما شتاتتارىندا جۇگەرى ءونىمىنىڭ ازايۋى تۋرالى بولجام نەگىز بولدى. الايدا، اتالمىش قىسقارتۋعا قاراماستان، مۇنداي ناتيجە بۇرىن-سوڭدى بولماعان ەڭ جوعارى دەڭگەيگە جەتپەك، سەبەبى 2019 جىلعى ءوندىرىس كولەمىنەن 58 ميلليون تونناعا ارتىق.

ارگەنتينا مەن برازيليادا جۇگەرىدەن رەكوردتىق ءونىم جيناۋ بولجانىپ وتىر، ال دۇنيەجۇزىلىك قۇماي ءوندىرىسى وتكەن جىلمەن سالىستىرعاندا 6 پايىزعا وسەدى دەپ كۇتىلۋدە. 2020 جىلى بۇكىل الەمدە كۇرىش ءوندىرىسى جاڭا رەكوردتىق كورسەتكىشكە - 509 ميلليون تونناعا جەتەدى دەپ كۇتىلۋدە.

باعالاۋ جايلى تولىعىراق اقپارات بۇگىن جاريالانعان داقىلدار سۇرانىسى مەن ۇسىنىسىنىڭ اقپارىندا قولجەتىمدى.

2020-2021 جىلعى ماۋسىمدا فاو دۇنيەجۇزىلىك ءداندى-داقىلداردى تۇتىنۋدىڭ جاڭا بولجامى 2 764 ميلليون توننانى قۇرايدى، بۇل جىلدىق ەسەپپەن بىلتىرعى كورسەتكىشتەن 2,0 پايىزعا جوعارى.

دۇنيەجۇزىلىك ءداندى داقىلدار قورى 1,7 پايىزعا ارتىپ، 2021 جىلعى ماۋسىم اياعىندا 895,5 ميلليون تونناعا دەيىن وسەدى دەپ بولجانىپ وتىر، الەمدىك ءداندى داقىلدار قورلارى مەن ولاردى تۇتىنۋ اراقاتىناسى 31,8 پايىزدى قۇراپ، شىلدەدەن بەرى سال تومەندەسە دە، سالىستىرمالى تۇردە جوعارى بولىپ قالا بەرمەك.

كۇرىش پەن ءىرى ءداندى داقىلداردىڭ كوبىرەك ساتىلۋى مەن جەتكىزىلۋى جايلى بولجامدارعا وراي، 2020-2021 جىلدارى ءداندى داقىلداردىڭ دۇنيەجۇزىلىك ساۋداسى 441,4 ملن. توننا دەڭگەيىندە، ياعني 2019-2020 جىلعى دەڭگەيدەن 1,6 پايىزعا جوعارى بولماق.

Abai.kz