«سەرۆيستىك اكىمدىك». بۇل – ءتۇرلى مەملەكەتتىك قىزمەتتەر كورسەتەتىن مەكەمەلەردى ءبىر ورتالىققا شوعىرلاندىرعان ارنايى ورىن. ەل اراسىندا «اينەك اكىمدىك» اتالىپ كەتكەن مۇنداي ورتالىقتار قازىرگى ۋاقتا رەسپۋبليكامىزدىڭ ءوڭىر-وڭىلەرىندە اشىلىپ جاتىر.

العاش رەت «سەرۆيستىك اكىمدىك» تۋرالى اڭگىمە ەلباسى نۇرسۇلتان نازارباەۆتىڭ جولداۋىندا ايتىلىپ، مەملەكەتتىك ورگاندار جۇمىسىن وڭتايلاندىرۋ، حالىققا ۇسىنىلاتىن قىزمەت ءتارتىبىن جەڭىلدەتۋ تۋرالى تاپسىرما اياسىندا قولعا الىنعان ەدى. وسىلايشا العاش بولىپ الماتى وبلىسىندا «سەرۆيستىك اكىمدىك» اشىلدى.

حالىققا قىزمەت كورسەتۋدىڭ بۇل فورماتى مەملەكەت باسشىسى قاسىم-جومارت توقاەۆتىڭ «ەستيتىن مەملەكەت» كونتسەپتسياسىنا دا دالمە-ءدال كەلەتىنىن ساراپشىلار ايتۋدا. ال الماتى وبلىسىندا جۋىردا ءدال وسىنداي جانە ءبىر «سەرۆيستىك اكىمدىك» اشىلعانى اقپاراتتا تارادى. سونىمەن «سەرۆيستىك اكىمدىك» حالىققا ءتيىمدى مە؟ مۇنداي اكىمدىكتەر اشۋ رەسپۋبليكا بويىنشا قالاي جۇزەگە اسىرىلىپ جاتىر؟ ءبىز ءبىر شولىپ شىققان ەدىك...

الماتى وبلىسى

اماندىق باتالوۆ مىرزا تىزگىنىن ۇستايتىن الماتى وبلىسىندا جىل سوڭىنا دەيىن بارلىق اۋداندار مەن قالالاردا «سەرۆيستىك اكىمدىكتەر» اشىلۋ جوسپارلانىپ وتىر ەكەن. بۇل تۋرالى اكىمدىكتىڭ ءباسپاسوز قىزمەتى مالىمدەدى.

قازىرگى تاڭدا وبلىستا مۇنداي اكىمدىكتەر 7 اۋداندا بار ەكەن. ولار اقسۋ، كوكسۋ، بالقاش، قاراتال، قاراساي جانە رايىمبەك اۋداندارى مەن تالدىقورعان قالالارىندا حالىققا قىزمەت كورسەتۋدە.  ونداعى حالىققا كورسەتىلەتىن قىزمەت تۇرلەرى مەن قىزمەت كورسەتۋشى مەكەمەلەر وكىلدەرى ءبىر ورىنعا شوعىرلاندىرىلعان. وسىلايشا، ازاماتتارعا قىزمەت ۇسىنۋ ءتاتىبى جەڭىلدەتىلگەن. بارلىق مەكەمە وكىلدەرى «Open space» فورماتىندا، ازاماتتارعا اشىق كابينكالاردا وتىرىپ قىزمەت كورسەتەدى ەكەن.

اتالعان «سەرۆيستىك اكىمدىكتەردى» جىل سوڭىنا دەيىن وڭىردەگى وزگە دە اۋدانداردا اشۋ قاجەتتىلىگى تۋىنداپ وتىرعانىن الماتى وبلىسى سىبايلاس جەمقورلىققا قارسى كۇرەس دەپارتامەنتىنىڭ باسشىسى ەرنار ماقاجانوۆ ايتتى.

«قازىر وبلىسىمىزدا وسىنداي جەتى اكىمدىك بار. بىراق، بۇل رەسپۋبليكا بويىنشا تومەن كورسەتكىش. سوندىقتان، جىل سوڭىنا دەيىن وبلىستاعى بارلىق اۋدانداردا وسىنداي اكىمدىكتەر اشىلۋى كەرەك»، - دەيدى ماقاجانوۆ مىرزا.

ايتا كەتەيىك، وسىدان 1,5 جىل بۇرىن قازاقستاندا العاش بولىپ «سەرۆيستىك اكىمدىك» وسى الماتى وبلىسىندا اشىلعان. وسىعان بايلانىستى وبلىس اكىمى اماندىق عابباسۇلى: «كەڭسەلەر مەن مەكەمەلەرگە كىرۋ شەكتەلگەن قازىرگىدەي تار كەزەڭدە «سەرۆيستىك اكىمدىكتەر» حالىققا قىزمەت كورسەتۋدىڭ ەڭ وڭتايلى فورماتى ەكەنىنە كوزىمىز جەتتى. سوندىقتان، جىل سوڭىنا دەيىن وبلىستاعى بارلىق اۋداندار مەن قالالاردا «سەرۆيستىك اكىمدىكتەر» اشىلاتىن بولادى»، - دەدى.

اقمولا وبلىسى

ءدال وسىنداي «سەرۆيستىك اكىمدىكتەر» اقمولا وبلىسىندا دا اشىلىپ جاتىر ەكەن. جۋىردا اقمولا وبلىسىنىڭ جارقايىڭ اۋدانىندا جاڭادان «سەرۆيستىك اكىمدىك» اشىلعانى اقپاراتتا ايتىلدى. بۇل وبلىس اۋماعىندا اشىلعان ەڭ سوڭعى «سەرۆيستىك اكىمدىك» بولىپ وتىر. وسىلايشا، اقمولا وبلىسىنىڭ بارلىق اۋلداندارى مەن قالالارىندا «ءبىر تەرەزە» فورماتىندا جۇمىس ىستەيتىن اشىق اكىمدىكتەر ءوز جۇمىسىنا تولىق كىرىسكەن.

«سەرۆيستىك اكىمدىكتىڭ» اشىلۋىندا ءسوز العان وبلىستىق سىبايلاس جەمقورلىققا قارسى كۇرەس دەپارتامەنتىنىڭ وكىلى ارمان بەردالين: «سەرۆيستىك فورمات بۇل ءبىرىنشى كەزەكتە – سىبايلاس جەمقورلىقتىڭ الدىن الۋ مەن جويۋ ءۇشىن قولعا الىنعان باستاما. پرەزيدەنت قاسىم-جومارت توقاەۆ مەملەكەتتىك قىزمەتتىڭ اشىقتىعى، قولجەتىمدىلىگى، كورسەتىلەتىن قىزمەتتىڭ جۇيەلىلىگى تۋرالى ناقتى تاپسىرمالار بەرگەن ەدى. بۇل مىندەتتەر مەن تاپسىرمالاردى جۇزەگە اسىرۋدا اتالعان تاجىربيەنىڭ بەرەرى مول»، - دەدى.

«سەرۆيستىك اكىمدىك» قىزمەتى – بۇل «ءبىر تەرەزە» فورماتىمەن جۇمىس ىستەيتىن اكىمدىك. ياعني، ازاماتتار قۇجات جيناپ ءار كەڭسەلەرگە سابىلماي، بارلىق جۇمىسىن ءبىر جەردەن اياقتاپ شىعادى.

اقتوبە وبلىسى

بيىل تامىز ايىندا اقتوبە وبلىسىنىڭ ايتەكە بي اۋدانىندا دا «سەرۆيستىك اكىمدىك» اشىلعان. وندا تۇرعىنداردىڭ ساپالى ءارى جەدەل، كاسىبي قىزمەت تۇرلەرىن الۋعا بارلىق جاعداي جاسالعان. ارنايى ماماندار قابىلداۋلار جۇرگىزىپ، كەزدەسۋلەر وتكىزەدى ەكەن. سونداي-اق، وسى اكىمدىكتە حالىققا قىزمەت كھورسەتۋ ورتالىعى دا ورنالاسقان. وسىلايشا، بارلىق مەكەمەلەر ءبىر ورتالىققا شوعىرلاندىرىلعان.

جامبىل وبلىسى

ال جامبىل وبلىسىندا وسىمەن التىنشى «سەرۆيستىك اكىمدىك» پايدالانۋعا بەرىلگەن. اتالعان اكىمدىك جامبىل اۋدانىنىڭ تاراز قالاسىندا اشىلعان. ول جەردە وبلىس تۇرعىندارىنا كاسىپكەرلىك، تۇرعىنۇي، كوممۋنالدىق جانە اۋىل شارۋاشىلىق، قۇرىلىس ت.ب. سالالار بويىنشا قىزمەت كورسەتىلەدى دەپ جوسپارلانعان. ۇزىن-ىرعاسى 20-دان استام مەملەكەتتىك قىزمەت تۇرلەرى ءبىر ورتالىقتان جۇمىس جاسايدى.

«Open space» فورماتىنداعى فرونت-ءوفيستىڭ تاراز قالاسىنىڭ اكىمدىگى مەن مەملەكەتتىك قىزمەت ىستەرى اگەنتتىگى بىرلەسە وتىرىپ جۇزەگە اسىرعان. قازىرگى تاڭدا جامبىل وبلىسىنىڭ تالاس، مەركى، شۋ، سارىسۋ اۋداندارىندا جۇمىس جاساپ جاتىر. الداعى ۋاقىتتا رىسقۇلوۆ جانە قورداي اۋداندارىندا وسىنداي «سەرۆيستىك اكىمدىكتەر» اشۋ جوسپارلانعان.

تۇركىستان وبلىسى

«سەرۆيستىك اكىمدىك» تۇركىستان وبلىسىنىڭ كەلەس اۋدانىندا دا اشىلعان. حالىقتىڭ تسيفرلىق ساۋاتىن كوتەرۋ مەن سىبايلاس جەمقورلىقتىڭ الدىن الۋ ماقساتىندا اشىلعان وسىنداي اكىمدىكتەر وڭىردەگى وزگە دە اۋداندار مەن قالالاردا اشىلادى دەپ جوسپارلانىپ وتىر.

Abai.kz