قازاقستاندىق قۇقىق قورعاۋشىلار ەلدەگى «ساياسي تۇتقىندار» ءتىزىمىن جاڭارتىپتى. دالىرەك ايتساق، جاڭا تىزىمگە تاعى التى ادام قوسىلعان ەكەن. بۇل تۋرالى قۇقىق قورعاۋشى باقىتجان تورەعوجينا ءوزىنىڭ الەۋمەتتىك جەلىسىندە جازدى.

ساراپشىلار كەڭەسىنىڭ 2020 جىلدىڭ 8 قىركۇيەكتەگى شەشىمىمەن تومەندەگى التى ازاماتى «ساياسي تۇتقىن» دەپ تانىلعان. ولار:

1.ساناۆارا زاكيوۆا. بەلسەندى. قر قىلمىستىق كودەكسىنىڭ 107 بابى، 2 ءبولىمى بويىنشا 1 جىلعا باس بوستاندىعىنان ايىرىلعان.

2. اسقار يبراەۆ. قوستانايلىق بەلسەندى. قر قىلمىستىق كودەكسىنىڭ 405 بابى، 2 ءبولىمى بويىنشا 1 جىلعا باس بوستاندىعىنان ايىرىلعان.

3. سەرىك يدىرىشەۆ. شقو، بوبروۆكا اۋىلىنىڭ بەلسەندىسى. قر قىلمىستىق كودەكسىنىڭ 405 بابى، 2 ءبولىمى بويىنشا 1 جىلعا باس بوستاندىعىنان ايىرىلعان.

4. اسحات جەكسەباەۆ. الماتىلىق بەلسەندى. سوتقا دەيىنگى تەرگەۋ كەزىندە 2 اي مەرزىمگە تۇتقىنداۋ شاراسى قولدانىلعان. قر قىلمىستىق كودەكسىنىڭ 405 بابى، 2 ءبولىمى بويىنشا ايىپتالعان (تىيىم سالىنعان «كوشە پارتياسىنا» قاتىسى بار دەلىنگەن).

5. اباي بەگىمبەتوۆ. الماتىلىق بەلسەندى. سوتقا دەيىنگى تەرگەۋ كەزىندە 2 اي مەرزىمگە تۇتقىنداۋ شاراسى قولدانىلعان. قر قىلمىستىق كودەكسىنىڭ 405 بابى، 2 ءبولىمى بويىنشا ايىپتالعان (تىيىم سالىنعان «كوشە پارتياسىنا» قاتىسى بار دەلىنگەن).

6. قايرات كلىشەۆ. الماتىلىق بەلسەندى. سوتقا دەيىنگى تەرگەۋ كەزىندە 2 اي مەرزىمگە تۇتقىنداۋ شاراسى قولدانىلعان. قر قىلمىستىق كودەكسىنىڭ 405 بابى، 2 ءبولىمى بويىنشا ايىپتالعان (تىيىم سالىنعان «كوشە پارتياسىنا» قاتىسى بار دەلىنگەن).

«ساياسي تۇتقىندار تىزىمىنە قوسىلعان بارلىق ازاماتتار بوستاندىعى شەكتەلگەن نەمەسە سوتقا دەيىنگى تەرگەۋ كەزىندە قاماۋدا بولعان. ساياسي تۇتقىندار ءتىزىمىنىڭ تالاپتارىنا ساي. تىزىمگە قوسۋ تالاپتارىن «حالىقارالىق امنيستي» مەن ەۋروپا كەڭەسىنىڭ كريتەريلەرى بويىنشا ساراپشىلار كەڭەسى ازىرلەگەن»، - دەپ جازدى تورەعوجينا.

ساراپشىلار كەڭەسىنىڭ قۇرامىندا عالىم اعەلەۋوۆ، لۇقپان احمەدياروۆ، زاۋرەش باتتالوۆا، گۇلميرا بيرجانوۆا، اانارا يبراەۆا، ەرلان قاليەۆ، باقىتجان تورەعوجينا جانە امانگەلدى شورمانباەۆ بار.

ەستەرىڭىزگە سالا كەتەيىك، وسىعان دەيىن «ساياسي تۇتقىندار» تىزىمىندە بولعان كاسىپكەر ەسكەندىر ەرىمبەتوۆ پەن «قازاتومپروم» باسشىسى مۇحتار جاكىشەۆ قاماۋدان بوساتىلعان ەدى.

2013 جىلى قازان ايىندا قۇقىق قورعاۋشىلار اليانسى مۇحتار جاكىشەۆتى ساياسي تۇتقىندار تىزىمىنە قوستى. وعان سوت پەروتسەسسى كەزىندە جاكىشەۆتىڭ قۇقىعىنىڭ ورەسكەل بۇزىلۋى تۋرالى فاكتىلەر سەبەپ بولعان. بۇعان دەيىن جاكىشەۆ «ساياسي تۇتقىنعا قاتىسى بار تۇتقىن» دەپ سيپاتتالىپ كەلگەن. مۇحتار جاكىشەۆ 2018 جىلعى ساياسي تۇتقىنداردىڭ جاڭارتىلعان تىزىمىنە دە ەنگەن.

11 جىلعا جۋىق تۇرمەدە وتىرعان مۇحتار جاكىشەۆ بيىل ناۋرىزدا قاماۋدان بوساتىلعان ەدى.

ال «ازاتتىق» سايتىنىڭ جازۋىنشا، قازاقستاندا العاشقى ساياسي تۇتقىندار ءتىزىمى 2013 جىلى جاسالعان. قۇقىق قورعاۋشىلار «ساياسي تۇتقىن» دەپ تانىعاندار قاتارىندا اقىن ءارى ديسسيدەنت ارون اتابەك، 2016 جىلعى جەر ميتينگىسىنەن كەيىن سوتتالىپ، تۇرمەدە وتىرعان بەلسەندى ماكس بوقاەۆ پەن   جاڭاوزەندىك بەلسەندى ەرجان ەلشىباەۆ بار.

Abai.kz