قازاقستاندا توتەنشە جاعدايلر مينيسترلىگى قايتا قۇرىلدى. ول بۇعان دەيىن قر ىشكى ىستەر مينيسترلىگىنىڭ قۇرامىندا بولعان. بۇل تۋرالى پرەزيدەنت جارلىعى اقوردا سايتىندا جاريالاندى.

قاۋلى ماتىنىندە:

قازاقستان رەسپۋبليكاسى كونستيتۋتسياسىنىڭ 44-بابىنىڭ 3) تارماقشاسىنا سايكەس مەملەكەتتىك باسقارۋ جۇيەسىن جاڭعىرتۋ جانە تيىمدىلىگىن ارتتىرۋ ماقساتىندا قاۋلى ەتەمىن:

1. قازاقستان رەسپۋبليكاسىنىڭ توتەنشە جاعدايلار مينيسترلىگى، وعان:

قازاقستان رەسپۋبليكاسى ىشكى ىستەر مينيسترلىگىنىڭ تابيعي جانە تەحنوگەندىك سيپاتتاعى توتەنشە جاعدايلاردىڭ الدىن الۋ جانە ولاردى جويۋ، ازاماتتىق قورعانىس، ءورت قاۋىپسىزدىگى، توتەنشە جاعدايلاردىڭ الدىن الۋ مەن ولاردى جويۋدىڭ مەملەكەتتىك جۇيەسىنىڭ جۇمىس ىستەۋىن جانە ودان ءارى دامۋىن قامتاماسىز ەتۋ، ورتتەردىڭ الدىن الۋدى جانە ءسوندىرۋدى ۇيىمداستىرۋ سالاسىنداعى قىزمەتى;

قازاقستان رەسپۋبليكاسى يندۋستريا جانە ينفراقۇرىلىمدىق دامۋ مينيسترلىگىنىڭ ونەركاسىپتىك قاۋىپسىزدىك سالاسىنداعى مەملەكەتتىك ساياساتتى قالىپتاستىرۋ جانە ىسكە اسىرۋ;

قازاقستان رەسپۋبليكاسى ۇلتتىق ەكونوميكا مينيسترلىگىنىڭ مەملەكەتتىك ماتەريالدىق رەزەرۆتى قالىپتاستىرۋ جانە دامىتۋ بويىنشا فۋنكتسيالارى مەن وكىلەتتىكتەرى بەرىلە وتىرىپ، قۇرىلسىن.

قازاقستان رەسپۋبليكاسىنىڭ ۇكىمەتى:

1) قازاقستان رەسپۋبليكاسى پرەزيدەنتىنىڭ اكىمشىلىگىمەن كەلىسۋ بويىنشا قايتا ۇيىمداستىرىلاتىن مەملەكەتتىك ورگاندار مەن جاڭادان قۇرىلعان قازاقستان رەسپۋبليكاسىنىڭ توتەنشە جاعدايلار مينيسترلىگى، سونداي-اق ولارعا ۆەدومستۆولىق باعىنىستى ۇيىمداردىڭ اراسىندا شتات سانىن قايتا ءبولۋدى;

2) وسى جارلىقتى ىسكە اسىرۋ بويىنشا وزگە دە شارالار قابىلداۋدى قامتاماسىز ەتسىن.

3) قازاقستان رەسپۋبليكاسىنىڭ توتەنشە جاعدايلار مينيسترلىگى بەرىلەتىن فۋنكتسيالار مەن وكىلەتتىكتەر شەگىندە قازاقستان رەسپۋبليكاسىنىڭ ىشكى ىستەر، يندۋستريا جانە  ينفراقۇرىلىمدىق  دامۋ، ۇلتتىق  ەكونوميكا مينيسترلىكتەرى-ءنىڭ قۇقىقتارى مەن مىندەتتەمەلەرىنىڭ ميراسقورى بولىپ بەلگىلەنسىن.

4) «قازاقستان رەسپۋبليكاسى ۇكىمەتىنىڭ قۇرىلىمى تۋرالى» قازاقستان رەسپۋبليكاسى پرەزيدەنتىنىڭ 1999 جىلعى 22 قاڭتارداعى № 6 جارلىعىنا   (قازاقستان رەسپۋبليكاسىنىڭ ءپۇاج-ى، 2019 ج.، № 22, 205-قۇجات) مىناداي تولىقتىرۋ ەنگىزىلسىن:

1-تارماق مىناداي مازمۇنداعى جولمەن تولىقتىرىلسىن:

«قازاقستان رەسپۋبليكاسىنىڭ توتەنشە جاعدايلار مينيسترلىگى».

5) وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.

6) وسى جارلىق قول قويىلعان كۇنىنەن باستاپ قولدانىسقا ەنگىزىلەدى، - دەپ جازىلعان.

ايتا كەتسەك، مەملەكەت باسشىسى قاسىم-جومارت توقاەۆ جىل سايىنعى حالىققا جولداۋىندا توتەنشە جاعدايلار مينيسترلىگىن قايتا قۇرۋ قاجەتتىگىن ايتقان بولاتىن.

Abai.kz