وتكەن كۇننەن ءبىر بەلگى

شاكەن ايمانوۆتىڭ «تاقيالى پەرىشتە» كينوكومەدياسىنداعى باستى ءرول - تايلاقتى سومداۋشى الىمعازى رايىمبەكوۆ مۇنان وزگە دە ونشاقتى كينوعا تۇسكەن تۋما تالانت جان. سوناۋ سەكسەنىنشى جىلدارى «تايلاقپەن» جولىمىز ءتۇيىسىپ، الماتىدا بىرەر اي ءبىلىم كوتەرۋ كۋرسىندا بىرگە وقىعانىمىز بار ەدى. تانىمال تۇلعا ءبىر وتىرىستا مىنا قىزىقتى جايدى بىلاي اڭگىمەلەگەن بولاتىن:

«مەنى ونەر جولىنا الىپ كەلگەن شاكەن ايمانوۆ قوي، كۇرەستەن جارىسقا قاتىسىپ جۇرگەنىمدە ىزدەپ تاپقان. ۇمىتپاسام، الپىس جەتىنشى جىل بولۋى كەرەك، ءالى تايلاقتىڭ رولىنە تۇسپەگەن كەزىم، شاكەڭ ءبىر كينونىڭ ۇزىندىسىندە قاجىمۇحاندى وينايسىڭ دەپ شىمكەنتكە الىپ باردى. قوناق ۇيگە ورنالاسىپ بولعان سوڭ، تاماقتانۋعا تومەنگى قاباتتاعى مەيرامحاناعا تۇستىك. ءبىر شەتتە جەكە وتىرعان مۇرتتى كىسىمەن شاكەڭ سالەمدەسىپ، شۇيىركەلەسە كەتتى. ءبىر كەزدە مەنى دە سول ۇستەلگە شاقىرىپ، «باۋكە، مىنا جىگىت الىمعازى دەگەن ءىنىڭىز، قاجىمۇحاننىڭ رولىندە وينايدى»، دەدى. سول كەزدە الگى ادام ماعان تەسىرەيە قارادى. كوزى تىپتەن وتكىر، سۇستى ادام ەكەن. دەنەم ءدىر ەتە قالدى. باتىر باۋىرجان مومىشۇلى وسى كىسى ەكەن. مەنىڭ سالەمدەسكەنىمە ءلام-ليم دەمەستەن بىردەن داياشىنى شاقىرتى دا، «دەرەۋ ءبىر تاباق ەت، ءبىر شىنى اراق الىپ كەل!» دەپ بۇيىردى. ولار دا باتىردىڭ اۋزىن باعىپ وتىرسا كەرەك، ايتقان مەزەت الگى تاپسىرىسىن جەتكىزدى.

باتىر ماعان تەسىلە قاراپ: «سەنىڭ قانداي قاجىمۇحان ەكەندىگىڭدى كورەيىك، مىنا اراقتى ءىشىپ، تاباق ەتتى تاۋىساسىڭ!» دەمەسى بار ما. ەتتى بىردەڭە ەتەرمىن-اۋ، ال ءومىرى اۋزىما الماعان اراقتى قايتپەكپىن؟! بالا كەزىمىزدەن داقپىرتىن ەستىپ، قۇرمەت تۇتىپ وسكەن باۋىرجان باتىردىڭ الدىندا نە ءۋاج ايتپاقپىن. مەنى سىناپ وتىرعان بولار دەگەن ويمەن تاماققا قول سالا بەرىپ ەدىم، اقىرىپ، قالت توقتاتتى. ءسويتتى دە، الدىندا تۇرعان ۆازانىڭ گۇلىن سۋىمەن قوسا ەدەنگە توگە سالدى دا، ءوز قولىمەن ءبىر شىنى اراقتى بىردەن سوعان تولتىرىپ قۇيدى. «اۋەلى، مىنانى تارت!» جازعان قۇلدا جازىق بار ما، سەسكەنگەنىم بولار، ەكى تولعاپ ىدىستى بوساتتىم دا، تاباقتاعى ەتكە كىرىستىم. ءاپ ساتتە جالاپ-جۇقتاپ تاستاسام كەرەك. باسىم اينالعانداي بولا باستاسا دا، سىر بىلدىرمەۋگە تىرىستىم. تاياعىنا سۇيەنىپ، سۇستانىپ وتىرعان باۋكەڭ شاكەڭە جايدارلانا قاراپ،

– بالاڭ جارايدى ەكەن،– دەدى ءبىر كەزدە. ءسويتتى دە، – ەندى مارش بولمەڭە، ايمانوۆ وسىندا قالسىن!، – دەپ تاياعىن تارس ەتكىزدى...»

الىمعازى رايىمبەكوۆتىڭ سول كەزدەگى «قازاقفيلمنىڭ» توراعاسى، اقىن  ولجاس سۇلەيمەنوۆپەن دوستىق قىرىم - قاتىناستىعى بولاتىن. وقۋعا  «قازاقفيلمنىڭ» جاتاقحاناسىنان ارنايى وزىنە بوساتتىرىپ بەرگەن جەرىنەن قاتىناپ كەلىپ ءجۇردى. ماعان، «سەنىڭ ادەبيەتكە بەيىمدىلىگىڭ بار ەكەن، ولجەكەڭمەن تانىستىرىپ قويايىن»، دەپ اعالىق تانىتقانى دا وسى كۇنى ەسىمە ءتۇسىپ وتىر.

بىردە اباي داڭعىلىنىڭ بويىن جاياۋ ارالاپ كەلە جاتىپ، فوتوسالوندا سۋرەتكە تۇسكەنىمىز بار. مىناۋ سونداعى فوتو. ورتاداعى شاپان جامىلىپ وتىرعان «تايلاق»، جانىنداعى شاشى قاۋقيعان مەن عوي. ەكى شەتتەگى  جامبىلدىق دوسىمىز بەرىك پە  ونىڭ كۇزەت بولىمىندە قىزمەت ىستەيتىن ءىنىسى بولاتىن.

ءيا، قازاق كينوكومەدياسىنىڭ «كوريفەيىمەن» بولعان قىزىقتى ءسات وسىلاي ەستە قالىپ ەدى.

نۇرماحان ەلتاي،

قازاقستان جازۋشىلار جانە جۋرناليستەر وداعىنىڭ مۇشەسى

Abai.kz