قازاق عالىمى سايلىباي بەكبولاتوۆ جاڭا كۇنتىزبە ازىرلەپتى. «حابار 24» ارناسى حابارلاپ جاتىر، انە. 

جوبا تۇرىندە ازىرلەنگەن جاڭا كۇنتىزبەنىڭ بۇرىنعىسىنان ايىرماشىلىعى جانە  باستى ايىرماشىلىعى - جاڭا كۇنتىزبەدە 13 اي بار ەكەن.

اكادەميك جىلدار بويى كونە تۇركى كەزەڭىن زەرتتەپ، سونىڭ نەگىزىندە كۇنتىزبە قۇراستىرعان. جاڭا كۇنتىزبەنىڭ جوباسىن «جاھاندىق جاڭالىق» كونفەرەنتسياسىنىڭ قاتىسۋشىلارى تالقىلاعان.

«قولدانىستاعى مىناۋ گريگوري كۇنتىزبەسى قاتە. وسىنىڭ قاتەسىن تۇزەيىك دەدىك. ايدىڭ ءبارى بىردەي بولۋ كەرەك ەمەس پە؟ ءبىر اي 28-ىنەن، 29-ىنان، 30-ىنان، 31-ىنەن اياقتالادى. 13 شوقجۇلدىز بولعاننان كەيىن سونىڭ جولىمەن ءجۇرۋ قاجەت. بۇل – تابيعاتتىڭ زاڭى. سوندىقتان ءبىر جىلدا 13 اي بولادى دەپ ەسەپتەدىك»,- دەپتى كۇنتىزبە اۆتورى سايلىباي بەكبولاتوۆ.

سايلىباي بەكبولاتوۆتىڭ ءسوزىن قوشتاي سويلەگەن اكادەميك ءادىل احمەتوۆ تە قازىر قولدانىپ جۇرگەن گريگوريان كۇنتىزبەسىنىڭ عىلىمي نەگىزدەمەسى جوق دەپ ەسەپتەيتىنىن ايتىپتى.

Abai.kz