شىمكەنتتە قالاداعى اتشاباردىڭ ورنىنا BI Group قۇرىلىس كومپانياسى قالا اكىمشىلىگىمەن كەلىسىمدە كوپقاباتتى تۇرعىن ءۇي سالۋ جوسپارلاپ وتىر. بىراق بۇل ماسەلە داۋعا اينالىپ شىعا كەلگەن. اتشابارعا “اراشا” ءتۇسۋشى توپتىڭ ءۋاجى يپپودرومنىڭ ورنىنا كوپقاباتتى ءۇي سالىنسا، قالانىڭ ەكوجۇيەسىن بۇزادى-مىس، قالانىڭ باس جوسپارىندا ول جەر دەمالىس جانە ساياجاي اۋماعى بولىپ بەكىتىلگەن، جاسىل اۋماققا تۇرعىن ءۇيدىڭ سالۋدىڭ ءجونى جوق-مىس. قارسىلار قالا اكىمشىلىگىنە اتشاباردىڭ ورىنان جاڭا تۇرعىن ءۇي كەشەنىن سالعانشا،  بۇرىنعى جوسپارلانعان قۇرىلىس جوبالارىن جالعاستىرماي ما دەپ تە ءۋاج ايتادى.

ال قالا اكىمشىلىگى نە دەيدى؟ اكىمشىلىك اتشاباردىڭ ورنىنا BI Group سالاتىن تۇرعىن ءۇي كەشەنىمەن بىرگە ول جەردە مەكتەپ، بالاباقشا تاعى باسقا الەۋمەتتىك نىساندار قوسا سالىنىپ، قۇرىلىس سالۋعا جانە ودان كەيىن دە مىڭداعان ادامعا جۇمىس تابىلاتىنىن، تۇرعىن ءۇي تاپشىلىعىن جويۋعا سەپتىگى تيەتىنىن العا تارتادى. ەڭ قىزىعى، قۇرىلىس كومپانياسى اۋماعى قازىرگى يپپودرومنان ۇلكەن اتشابار سالىپ بەرۋگە دە كەلىسكەن. ونىڭ ۇستىنە قازىرگى اتشاباردىڭ قولدانۋ مەرزىمى ەسكىرىپ، ويپاڭ جەردە ورنالاسقاندىقتان بايگە، كوكپار كەزىندە اۋا جەتپەي اتتاردىڭ ءولۋى دە بىرنەشە رەت بولعان. ءتىپتى اتشاباردى باسقا جەرگە كوشىرۋ ماسەلەسى بۇرىننان بەرى كوتەرىلىپ كەلە جاتقان ماسەلە ەكەن. سوندا اتشابار ورنالاسقان اۋماقتى قورعاۋعا بىلەك سىبانا كىرىسكەن توپتىڭ كوكسەگەنى نە؟ كومپانيا جاڭا اتشابار سالۋعا كەلىسىپ وتىرسا وندا قاسارىسىپ قارسىلاسۋدىڭ ءمانى نە؟ ءبىزدىڭ شە، ماسەلە باسقا دا سەكىلدى. داۋ بولىپ وتىرعان دەمالىس جانە ساياباق اۋماعى سانالاتىن اۋداننىڭ ءبىراز بولىگى قالتالى ادامداردىڭ مەنشىگىنە ءوتىپ كەتكەن. جانە قارسى تاراپتىڭ داۋلى جەرگە تۇرعىن ءۇي سالماي، تۋريستىك ايماققا اينالدىرۋ كەرەك دەگەن ءۋاجىنىڭ دە ار جاعىنان الدەبىر مۇددەلى توپتىڭ ارەكەتى قىلاڭ بەرەدى. ياعني، ۇزاق جىلدان بەرى باسقا جاققا كوشىرىلۋى ءسوز بولىپ كەلە جاتقان اتشابار جانە ونىڭ اۋماعىنا بۇرىننان كوز تىگىپ كەلە جاتقان مۇددەلى توپتىڭ “ارمانىن” قالا اكىمشىلىگى مەن BI Group كومپانياسى كەلىسىپ سالماقشى بولىپ وتىرعان تۇرعىن كەشەنىنىڭ جوسپارى كۇل-تالقان ەتكەن. كوز تىگىپ وتىرعان جەر قولدان سۋسىپ شىعىپ بارا جاتقانىن بىلگەن مۇددەلى توپ جەردىڭ داۋىن بلوگەرلەردى جانە باسقا ادامداردى، ۇيىمداردى قوسىپ، جوق جەردەن دا شىعارىپ، قوعامدىق پىكىردى وزگەرتۋگە بارىن سالىپ جاتقانداي كورىنەدى. بۇل ارينە، بولجام. قالاي بولعاندا دا تۇرعىندارىنىڭ سانى كۇن ساناپ ءوسىپ جاتقان قالا ءۇشىن حالىققا تۇرعىن ءۇي، مەكتەپ، بالاباقشا اسا قاجەت ەكەنى ايتپاسا دا تۇسىنىكتى.