مەن اۋىت مۇقيبەكتى اتاجۇرتقا ورالعان ساتىنەن باستاپ بىلەمىن. تۇمانباي اقىننىڭ قاسىندا ءجۇردى. ەلورداعا 2012-جىلى كوشىپ كەلدى. ءوزىم جۇمىسقا الىپ، وسىندا قالۋىنا كومەكتەستىم. ول سودان بەرى ءبىرجولاتا كوشى-قون ساياساتىمەن اينالىسىپ كەلەدى. ۋاقىتتىڭ تالابى سولاي بولدى.

مەن بىلەتىن اۋىت مۇقيبەك ۇلت تاعدىرىنا قاتىستى ماسەلەگە كەلگەندە ايتىسىپ تا، تارتىسىپ تا شىدايتىن ازامات. كەزەگى كەلگەندە سوزگە توقتايتىن، جۇيەگە جىعالا دا بىلەتىن جىگىت. اششى ايتقان، ايعايلاپ ايتقان تۇستارى دا كوپ بولدى. بىراق، سونىڭ بارىندە ادەپتەن اسقان، زاڭدى سىيلاماعان جەرى جوق. ايتار ويى مەن تالاپ-تىلەگىن قيسىنعا سۇيەپ، دالەلدەرمەن ايتتى.

كوشى-قون – ەلباسىمىزدىڭ ۇلى ساياساتى. وسى ساياساتتىڭ ارقاسىندا ەلگە ەل قوسىلدى. قازاقستاننىڭ دەموگرافيا، مادەنيەت، ءتىل، ەكونوميكا سالاسىنىڭ تامىرىنا جاڭا قان جۇگىردى.

كوش توقتاماۋ كەرەك!

كوشى-قون، ورالعان جانە ورالماعان قانداستارىمىزدىڭ ماسەلەسىن ءبارىمىزدىڭ ايتقىمىز، كوتەرگىمىز كەلەدى. ايتىپ تا، جازىپ تا جاتىرمىز. بىراق، جالپىلاما، ۇزىن ىرعاسىن ايتىپ جاتىرمىز.

ال، ونىڭ زاڭنامالارىنداعى تۇيتكىلدى تۇيىندەرىن اۋىت مۇقيبەكتەي جىنتىكتەپ، بورشالاپ ايتاتىن جانە ونى شەشۋگە بار كۇشىن سالعان ازاماتتى كورگەم جوق.
ەلوردادا الىستان كەلگەن اعايىننىڭ زيالى قاۋىمى مەن اۋقاتتى كاسىپكەرلەرى شوعىرلانعان. اۋىت مۇقيبەك كەلگەنگە دەيىن بۇل ماسەلە تىم-تىرىس جاتقان بولاتىن. اۋىت ءىنىم كەلدى دە بىلەك ءتۇرىپ كىرىستى دە كەتتى. قاقپاعان ەسىگى، كىرمەگەن باسشىسى قالعان جوق. بەينە، مۇزجارعىش كەمە بولدى دەسەم، ارتىق ايتقاندىق بولماس. ءتىپتى، كوشى-قون قۇردىمعا كەتىپ بارا جاتقاندا ەلباسىنىڭ اتىنا «اشىق حات» جازىپ، شىرىلداعانى ەلدىڭ ەسىندە بولار. ەلباسى اۋىت مۇقيبەكتىڭ حاتىن وقىپ، قۇلاپ بارا جاتقان كوشتى قولتىعىنان دەمەپ، ءتورت جىلسىز ازاماتتىق بەرىلمەيتىن زاڭدى قايتا قالپىنا كەلتىرگەنىن ءبىز جاقسى بىلەمىز.

قازىر ناتيجەسىن كورىپ وتىرمىز، قانداستارىمىزدىڭ قۇجاتتانا الماي سەرگەلدەڭگە تۇسەتىن تاريحى اياقتالدى. سەبەبى، اۋىت اقىننىڭ ارقاسىندا زاڭدارداعى كەدەرگىلەر جويىلدى. جاڭا، ءتيىمدى باپتار ەنگىزىلدى.

مىنە، سول اۋىت مۇقيبەك باۋىرىمىز «نۇر وتان» پارتياسىنىڭ پرايمەريزىنە قاتىسىپ، ءماجىلىس دەپۋتتى بولۋعا اتتانىپ جاتىر ەكەن.
اق جول تىلەيمىن!

سايلاۋالدى باعدارلامالارى مەن ونىڭ تۇيىندەرىن تارقاتىپ تۇسىندىرگەن ماقالالارىمەن تۇگەل تانىسىپ شىقتىم. «ەگەر، مەن ماجىلىسكە دەپۋتات بولىپ سايلانسام، شەتەلدەگى قانداستارىمىزدى قازاقستان رەسپۋبليكاسىنىڭ كونستيتۋتسياسىمەن قورعاۋعا، ءسويتىپ جالپى كوشى-قون ساياساتىن مەملەكەتتىڭ ماڭىزدى ءارى باسىم باعىتتاعى ساياساتتارىنىڭ بىرىنە اينالدىرۋعا مۇمكىندىك بەرەتىن جوبالار ۇسىنام جانە ول جوبالاردىڭ جۇزەگە اسۋىنا ىقپال ەتەم!»-دەپتى اۋىت مۇقيبەك.

وتە دۇرىس!  قازاقتىڭ سانى كوبەيمەي، ەلىمىز دامىمايدى. ءتىپتى، مەملەكەتىمىزگە قاۋىپ پەن قاتەر ءتونۋى مۇمكىن.

«شەكارالىق وڭىرلەردە تۇراقتى تۇراتىن ازاماتتار مەن ولاردىڭ وتباسى مۇشەلەرىنە «شەكارالىق وڭىردە تۇرادى» دەگەن وزگەشە مارتەبە (ستاتۋس) بەرەتىن، ولارعا تۇراقتى تۇردە اي سايىن 2 اەك كولەمىندەگى تولەمدەر تولەيتىن جانە وزگە دە جەڭىلدىكتەر قاراستىراتىن «شەكارالىق ءوڭىر تۇرعىندارىن الەۋمەتتىك قورعاۋ تۋرالى» ارنايى زاڭ قابىلداۋدى ۇسىنامىن»، - دەپتى...

تاماشا ۇسىنىس! حالىقتى شەكارالىق وڭىرلەرگە شوعىرلاندىرۋدىڭ بۇدان وزگە ءتيىمدى جولىن كورىپ تۇرعام جوق. باعدارلاما جاساۋ دا كەرەك شىعار. بىراق، ول جەمقورلاردىڭ جەمى بولىپ كەتەمە دەپ قاۋىپتەنەم.

ماجىلىستە سويلەپ قانا وتىراتىن دەپۋتاتتاردىڭ زامانى ءوتتى. ەندى بىلىكتى ماماندار مەن تۇلعالار كەرەك. مەن اۋىت مۇقيبەكتىڭ ءماجىلىس دەپۋتاتى بولعانىن قالايمىن!
جولىڭ بولسىن، اۋىتجان!

نەسىپبەك ايتۇلى،

مەملەكەتتىك سىيلىقتىڭ لاۋرەاتى

Abai.kz