ازەربايجان باس پروكۋراتۋراسى نافتالان اۋدانىندا ارميان اسكەرلەرىنىڭ وعىنان ءبىر وتباسىنان بەس ادامنىڭ قازا تاپقانىن مالىمدەدى. وعان دەيىن 19 ادامنىڭ جارالانعانى حابارلانعان.
تاۋلى قاراباح ايماعىنىڭ وكىلدەرى اتىستان ەكى بەيبىت تۇرعىن قازا تاۋىپ، 30-دان استام ادام جاراقات العانىن حابارلادى.
ارميان بيلىگىنىڭ حابارلاۋىنشا، 50-دەن استام ەلدىمەكەن، ونىڭ ىشىندە ستەپاناكەرت قالاسى ازەربايجان دروندارى مەن ارتيللەرياسى شابۋىلىنىڭ استىندا قالعان. رەسمي مالىمەت بويىنشا، بۇل ايماقتا 16 سارباز قازا تاۋىپ، 100-دەن استامى جارالانعان.
ازەربايجان پارلامەنتى جەكسەنبى، 27 قىركۇيەك كۇنى كەزەكتەن تىس وتىرىسىندا ەلدىڭ اسكەري وقيعالار بولىپ جاتقان تەرريتورياسىندا اسكەري جاعداي ەنگىزۋ تۋرالى شەشىم قابىلدادى.
باكۋدە جانە كەي وزگە قالالاردا كومەندانت ساعاتى ەنگىزىلدى.
تاۋلى قاراباح توڭىرەگىندە داۋ سوۆەت وداعى كەزىنەن باستالعان. ول كەزدە تاۋلى قاراباح اۋدانى ازەربايجان سسر-ءى قۇرامىنا كىرگەن، بىراق تۇرعىندارىنىڭ كوبى ارميان بولعان. 1988-1994 جىلدارى ارالىعىندا بولعان اسكەري قاقتىعىس كەزىندە 30 مىڭ ادام قازا تاۋىپ، جۇزدەگەن مىڭ ادام بوسقىنعا اينالعان. ارمەنيا اسكەرىنىڭ قولداۋىنا يە بولعان سەپاراتيستەر تاۋلى قاراباحتىڭ باسىم بولىگىن باقىلاۋىنا الىپ، ءوزىنىڭ قاراماعىنا ازەربايجانعا تيەسىلى كەي اۋدانداردى دا تىركەپ الدى. ازەربايجان بۇل تەرريتوريانى وككۋپاتسيالانعان دەپ اتايدى. 1994 جىلى ەكى ەل اراسىندا قارۋلى قاقتىعىستى توقتاتۋ جانە شيەلەنىستى بەيبىت جولمەن شەشۋ جونىندە كەلىسىم جاسالدى. بىراق بۇل كەلىسىم شيەلەنىستى شەشكەن جوق.
