الەكساندر لۋكاشەنكو 23 قىركۇيەك كۇنى اياق استىنان ۇلىقتاۋ ءراسىمىن ۇيىمداستىرىپ، التىنشى مارتە بەلارۋس پرەزيدەنتى قىزمەتىنە كىرىسكەن بولاتىن. بىراق ونى ءوز حالقى دا، الىس-جۋىق بىرقاتار شەتەل دە مويىنداماي وتىر. 

فرانتسيا پرەزيدەنتى ەممانۋەل ماكرون Le Journal du Dimanche گازەتىنە بەرگەن سۇحباتىندا لۋكاشەنكونىڭ بيلىكتەن كەتۋى كەرەك ەكەنىن مالىمدەدى.

"بۇل بيلىكتىڭ، دەموكراتيانىڭ لوگيكاسىن قابىلداي المايتىن جانە كۇشپەن ۇستايتىن اۆتوريتارلىق ۇكىمەتتىڭ داعدارىسى", - دەدى ماكرون.

لۋكاشەنكونىڭ ۇلىقتاۋ ءراسىمى وتە سالا گەرمانيا، ليتۆا، سلوۆاكيا جانە چەحيا ونى بەلورۋس پرەزيدەنتى رەتىندە مويىندامايتىندارىن مالىمدەدى. سونداي-اق، ەۋرووداق تا وسىنداي مالىمدەمە جاسادى.

ال بەلارۋس وپپوزيتسياسىنىڭ ورتاق كانديداتى سۆەتلانا تيحانوۆسكايا ۆيدەو ۇندەۋ جاساپ، “لۋكاشەنكو زەينەتكە شىقتى، مەن – بەلورۋستىڭ زاڭدى ءارى حالىق سايلاعان پرەزيدەنتىمىن!” - دەپ مالىمدەدى.

وسىدان كەيىن، 27 قىركۇيەك كۇنى مينسكىنىڭ ورتالىعىندا ونداعان مىڭ ادام داستۇرگە اينالىپ ۇلگەرگەن قارسىلىق اكتسياسىنا شىقتى. الەكساندر لۋكاشەنكونىڭ بيلىكتەن كەتۋىن تالاپ ەتكەن شەرۋشىلەر اكتسيانى سايلاۋعا وپپوزيتسيا اتىنان تۇسكەن سۆەتلانا تيحانوۆسكايانىڭ "حالىقتىق يناۋگۋراتسياسى" دەپ اتادى. ولار پرەزيدەنت سايلاۋىندا لۋكاشەنكو ەمەس، تيحانوۆسكايا جەڭدى دەپ سانايدى.

ەستەرىڭىزگە سالا كەتەيىك، بەلارۋستە پرەزيدەنت سايلاۋى 9 تامىزدا وتكەن. رەسمي ەسەپ بويىنشا، الەكساندر لۋكاشەنكو 80,1, ال ونىڭ باستى قارسىلاسى سۆەتلانا تيحانوۆسكايا 10,1 پايىز داۋىس العان.

الايدا بەلارۋس حالقى سايلاۋدىڭ بۇل قورىتىندىلارىمەن كەلىسپەيدى. سايلاۋ وتكەن 9 تامىزدان باستاپ كۇنى بۇگىنگە دەيىن مينسكى باستاعان ءىرى-ءىرى قالالاردا نارازىلىق اكتسيالارى جالعاسۋدا.

ەۋرو وداق بەلارۋستەگى سايلاۋدىڭ قورىتىندىلارىن، الەكساندر لۋكاشەنكونىڭ جەڭىسىن مويىنداعان جوق. ءتىپتى، ەۋروپارلامەنت دەپۋتاتتارى ارنايى رەزوليۋتسيا قابىلداعان. ول بويىنشا الەكساندر لۋكاشەنكو 5 قاراشادان باستاپ پرەزيدەنت دەپ سانالمايدى. سونداي-اق، ەو الەكساندر لۋكاشەنكوعا قارسى سانكتسيالار پاكەتىن ازىرلەيتىنىن مالىمدەگەن.

ايتا كەتەيىك، الەكساندر لۋكاشەنكو بەلارۋستى 26 جىلدان بەرى باسقارىپ كەلەدى. بۇل جولعى سايلاۋ لۋكاشەنكونىڭ التىنشى سايلاۋى بولعان.

Abai.kz