دەنساۋلىق ساقتاۋ ءمينيسترى الەكسەي تسوي قازاقستاندا كوروناۆيرۋس ينفەكتسياسىنىڭ قايتادان ءورشىپ كەتۋىنە جول بەرمەۋ ءۇشىن قانداي شارا قابىلدانىپ جاتقانىن ايتتى.

«قازىرگى ۋاقىتتا كوروناۆيرۋس ينفەكتسياسىنىڭ قايتادان ءورشىپ كەتۋىنە جول بەرمەۋ ءۇشىن بىرىنشىدەن، ءدارى-دارمەكپەن قامتاماسىز ەتۋ بويىنشا شۇعىل شارالار قابىلداندى.

ايماقتار ءدارى-دارمەكتىڭ 91 ءتۇرى بويىنشا قۇنى 14 ميلليارد تەڭگەلىك قوسىمشا زاتتارعا ءوتىنىش جاسادى. كوروناۆيرۋس بويىنشا ءدارى-دارمەك قورى جينالدى. جوعارىدا اتالعان سومانىڭ 11,4 ملرد تەڭگەلىك ءدارى-دارمەگى تيەلىپ، ايماقتارعا جەتكىزىلدى. ايماقتاردىڭ بارىندە قاجەتتى ءدارى-دارمەكتەر بويىنشا قۇنى 13 ملرد تەڭگە بولاتىن قوسىمشا تۇراقتاندىرۋ قورلارى قۇرىلدى. امبۋلاتوريالىق دەڭگەيدە بەرىلەتىن ءدارى-دارمەكتىڭ ءتىزىمى ۇزارتىلدى»، - دەدى الەكسەي تسوي ۇكىمەت وتىرىسىندا.

ءمينيستردىڭ ايتۋىنشا، كوروناۆيرۋستى ۇيدەن ەمدەۋ ءۇشىن 1 ميلليون ادامعا جىل سوڭىنا دەيىن تەگىن ءدارى-دارمەك قاراستىرىلعان.

«سونىمەن قاتار، تۇماۋعا قارسى 2,2 ملن ۆاكتسينا ساتىپ الىندى. ەكپە جۇمىستارى 15 قىركۇيەكتە باستالدى»، - دەدى ول.

سونىمەن قاتار، دەنساۋلىق ساقتاۋ ءمينيسترى قاۋىپسىزدىك شارالارى بويىنشا ايماق باسشىلارىنان ءتۇسىندىرۋ جۇمىستارىن كۇشەيتۋدى سۇرادى.

«ەلدەگى ەپيدەميولوگيالىق جاعدايدىڭ تۇراقتالۋىمەن بىرگە حالىقتىڭ ساقتىعى السىرەپ بارا جاتقانىن بايقاپ وتىرمىز. ماسكا تاعۋ مەن الەۋمەتتىك قاشىقتىق رەجيمى ساقتالا بەرمەيدى. وسىنىڭ سالدارى ەلدە كوروناۆيرۋس جۇقتىرعان ازاماتتاردىڭ سانىنىڭ ارتىپ، كارانتين شارالارىن كۇشەيتۋگە الىپ كەلۋى مۇمكىن. قازىر مۇنداي جاعدايدى بىرقاتار مەملەكەتتەن كورىپ وتىرمىز»، - دەدى الەكسەي تسوي ۇكىمەت وتىرىسىندا.

ءمينيستردىڭ ايتۋىنشا، ايماقتارعا بۇعان دەيىن بىرقاتار رەيد جۇرگىزىلگەن.

«سول رەيدتەردەن بايقاعانىمىزداي، كارانتين رەجيمىنىڭ السىرەۋىمەن بىرگە كارانتين ءتارتىبىن بۇزۋ جاعدايلارى 34 پايىزدان 47 پايىزعا دەيىن ارتتى. كارانتين ءتارتىبىن بۇزۋ جاعدايى ون وڭىردە بايقالدى. 5-27 قىركۇيەك ارالىعىندا ماسكا رەجيمىن ساقتاماعانى ءۇشىن 1130 ادام جازالاندى. وسىعان بايلانىستى ايماق باسشىلارى نىسانداردا ماسكا رەجيمىنىڭ ساقتالۋىن قاداعالاپ، ەلگە ءتۇسىندىرۋ جۇمىستارىن كۇشەيتسە دەيمىز»، - دەدى ول.

Abai.kz