اقپاراتتىق قاۋىپسىزدىك – ۇلت قاۋىپسىزدىگى، نەلىكتەن قازاق-قىتاي شەكاراسىندا ورنالاسقان ەلدى مەكەندەردە قازاقتىڭ ءۇنى شىقپاي تۇر؟

ءماجىلىس دەپۋتاتتارى قازاق-قىتاي شەكارالارىندا ورنالاسقان ەلدى مەكەندەردە جەرگىلىكتى تۇرعىندار قازاق راديولارىن تىڭداي المايتىندىعىنا الاڭداۋشىلىق ءبىلدىرىپ، قر اقپارات جانە قوعامدىق دامۋ ءمينيسترى مەن تسيفرلىق دامۋ، يننوۆاتسيالار جانە اەروعارىش ونەركاسىبى مينيستىنە دەپۋتاتتىق ساۋال جولداپتى. اتالعان دەپۋتاتتىق ساۋالدى بۇگىن ءماجىلىس وتىرىسىندا «اق جول» فراكتسياسىنىڭ دەپۋتاتى بەرىك دۇيسەمبينوۆ وقىعان.

دەپۋتتىق ساۋال:

قازاقستان رەسپۋبليكاسىنىڭ
اقپارات جانە قوعامدىق
دامۋ ءمينيسترى
ا. ع. بالاەۆاعا،

قازاقستان رەسپۋبليكاسى
تسيفرلىق دامۋ، يننوۆاتسيالار جانە
اەروعارىش ونەركاسىبى ءمينيسترى
ب. ب. مۋسينگە.

قۇرمەتتى ايدا عالىمقىزى!

قۇرمەتتى باعدات باتىربەكۇلى!

بۇگىنگى اقپاراتتىق زاماندا، ينتەرنەت، ۇيالى بايلانىس، تەلەديدار، راديو قوعام ءومىرىنىڭ ەڭ ءبىر ماڭىزدى تەتىگىنە اينالدى.  سونىمەن قاتار، الەۋمەتتىك جەلىنىڭ، تەلەديدار مەن راديونىڭ ماڭىزدى ماقساتتارىنىڭ ءبىرى – اۋديتورياعا اقپارات تاراتۋمەن قاتار، ساياسي-مادەني، يدەولوگيالىق تاربيە مەن ناسيحات جۇمىسىن جۇرگىزۋ ەكەندىگى دە جاسىرىن ەمەس.

سوندىقتان، ەلىمىزدىڭ اقپاراتتىق قاۋىپسىزدىگىن قامتاماسىز ەتۋ، وزەكتى ماسەلەلەردىڭ بىرىنە اينالىپ، ۇلتتىق قاۋىپسىزدىك ساناتىنا جاتقىزۋ قاجەتتىلىگى تۋىنداپ وتىر.

اتا زاڭىمىزدا، اركىمنىڭ ەركىن اقپارات الۋعا جانە تاراتۋعا قۇقىعى بار ەكەندىگىن ەسكەرە وتىرىپ، شەتەلدىك بۇقارالىق اقپارات قۇرالدارىمەن قاتار، ەلىمىزدىڭ بۇكىل كەڭىستىگىندە ءار ازاماتىمىزعا قازاقستاندىق اقپارات كوزدەرىنە قول جەتىمدىگىنە كەپىلدىك جاساۋ – مەملەكەتتىڭ مىندەتى.

الايدا، بۇل تۇرعىدا بۇگىنگى كۇنگە دەيىن قازاقستاندىق كوممۋنيكاتسيا جەلىلەرى قامتىماعان ەلىمىزدىڭ اۋماقتارى بار ەكەندىگىن ءبارى بىلە بەرمەيدى.

مىسالى، الماتى، شىعىس قازاقستان وبلىستارىنىڭ قىتاي شەكاراسىنا جاقىن ورنالاسقان كەيبىر اۋماقتارىندا قازاقستاندىق نە تەلەديدار، نە راديو، نە ينتەرنەت ۇستامايتىن جەرلەر بار. بىراق، قىتاي جاقتان قازاق تىلىندە راديو سايراپ تۇرادى.. ال شەكارا ماڭىنداعى جەرگىلىكتى حالىق تەك قىتاي راديوسىن تىڭداۋعا ءماجبۇر.

تاعى ءبىر مىسال كەلتىرسەك،  شىعىس قازاقستان وبلىسىنىڭ ءۇرجار اۋدانىنا تابان تىرەگەن كەز-كەلگەن ازاماتتىڭ تەلەفونىنا ءاپ ساتتە-اق «دوبرو پوجالوۆات ۆ كيتاي! پولزۋيتەس ۆىگودنىمي تاريفامي ۆ روۋمينگە!»، «Activ پريۆەتستۆۋەت ۆاس ۆ كيتاە! پولزۋيتەس ۆىگودنىمي تاريفامي ۆ روۋمينگە» سيپاتتى حابارلامالار كەلىپ تۇسەدى دە، ىزىنشە تەلەفونىڭىزداعى نۇر-سۇلتان ۋاقىتى دەرەۋ قىتاي ۋاقىتىنا وزگەرەدى ەكەن.

وسىعان ۇقساس جاعداي، وزبەك جانە رەسەي شەكاراسىنىڭ ماڭىندا دا كەزدەسەدى.

بيىل ۇلتتىق تاۋەلسىزدىگىمىزگە تابانداي 29 جىل تولادى. سوندا 30 جىلداي تاۋەلسىزدىكتىڭ بارىسىندا اقپاراتتىق، بايلانىس جۇيەمىزدىڭ تاۋەلسىزدىگىن قامتاماسىز ەتە الماعانىمىز با؟ حالقىمىزدىڭ، ونىڭ ىشىندە اسىرەسە جاس ۇرپاقتىڭ وتانشىلدىق، پاتريوتتىق سانا-سەزىمىنىڭ، ۇلتتىق ار-نامىسىمىزدىڭ، ۇلتتىق قاۋىپسىزدىگىمىزدىڭ تامىرىنا بالتا شاباتىن مۇنداي قۇبىلىسقا ۇلتتىق قاۋىپسىزدىك كوميتەتى، باس پروكۋراتۋرا جانە باسقا دا تيەسىلى مەملەكەتتىك مەكەمەلەر نەگە نازار اۋدارمايدى، نەگە تيەسىلى ءارى تاباندى ءىس-شارا قابىلدامايدى

وسىعان وراي، «اق جول» قدپ فراكتسياسى اقپاراتتىق قاۋىپسىزدىكپەن جانە ۇلتتىق سانا-سەزىممەن بايلانىسقان جوعارىدا باياندالعان ماسەلەلەردىڭ قالاي جانە قاشان شەشىلەتىندىگى جونىندە اقپارات بەرۋلەرىڭىزدى سۇرايدى.

قۇرمەتپەن،

«اق جول» قدپ فراكتسياسىنىڭ دەپۋتاتتارى

Abai.kz