پارلامەنت سەناتىنىڭ توراعاسى ماۋلەن اشىمباەۆ پالاتا جانىنداعى جاس ساراپشىلار كلۋبىنىڭ مۇشەلەرىمەن كەزدەستى.

كەزدەسۋدى اشقان سەنات توراعاسى ءىس-شاراعا قاتىسۋشىلارعا پرەزيدەنت جولداۋىن ىسكە اسىرۋعا قاتىستى ەلىمىزدىڭ الدىندا تۇرعان باستى مىندەتتەردى، سونداي-اق، سەنات پەن ساراپشىلار قاۋىمداستىعى اراسىنداعى ىنتىماقتاستىقتىڭ ءوزارا ءىس-قيمىل مۇمكىندىكتەرىن تالقىلاۋدى ۇسىندى.

ماۋلەن اشىمباەۆ ءوز سوزىندە مەملەكەتىمىز بەن قوعامىمىزدىڭ قازىرگى كەزەڭدەگى دامۋىن ايقىندايتىن ۇردىستەرگە تالداۋ جاسادى.

«سەناتتىڭ الدىندا تۇرعان نەگىزگى مىندەت – مەملەكەت باسشىسىنىڭ جولداۋىندا كورسەتىلگەن بارلىق باسىمدىقتاردى زاڭنامالىق تۇرعىدان قامتاماسىز ەتۋ. وسى جۇمىس بارىسىندا بىزگە قوعامدىق ۇيىمدار مەن ءارتۇرلى سالا ماماندارىنىڭ پىكىرىن تىڭداۋ، ولاردى ەسكەرۋ ماڭىزدى. سوندىقتان بۇگىن سەنات جانىنان جاس ساراپشىلار كلۋبىن قۇرۋدى ۇسىنامىز. سىزدەردىڭ بىلىمدەرىڭىز، كۇش-قۋاتتارىڭىز جانە تاجىريبەلەرىڭىز قازاقستاندى وزگەرتۋگە جانە پرەزيدەنتىمىزدىڭ رەفورمالارىن ىسكە اسىرۋعا تىڭ سەرپىن بەرەدى دەپ سەنەمىن»، – دەدى سەنات توراعاسى.

سونىمەن قاتار ماۋلەن اشىمباەۆ مەملەكەت باسشىسىنىڭ جاڭعىرتۋ باعدارى مەن جولداۋىن جۇزەگە اسىرۋ كەزىندە باسشىلىققا الاتىن قاعيدالاردى اتاپ ءوتتى. ءبىرىنشىسى – جۇيەلىلىك قاعيداسى.

«قازىر ەل دامۋىنىڭ باسقا باعىتتارىن ەسكەرۋسىز قالدىرىپ، ءبىر سالانى عانا رەفورمالاۋعا بولمايدى. مىسالى، ساياسي رەفورمالارسىز ەكونوميكالىق دامۋ بولمايدى. مەملەكەتتىك باسقارۋ جۇيەسىندە رەفورما جۇرگىزبەسە ەكونوميكادا ەلەۋلى وزگەرىستەر بولا قويمايدى. ءوز كەزەگىندە مەملەكەتتىك باسقارۋداعى ىلگەرىلەۋ ءبىلىم ساپاسىنا تىكەلەي بايلانىستى»، – دەدى ماۋلەن اشىمباەۆ.

ەكىنشىسى – ستاندارتتى ەمەس شەشىمدەر قاعيداسى. «بۇگىنگى الەم تىم كۇردەلى جانە تەز وزگەرۋدە. ول بۇرىنعى قابىلداۋلار مەن جۇيەلەۋگە ساي كەلمەيدى. سوندىقتان مەملەكەت پەن قوعامعا پروبلەمالاردى شەشۋدىڭ ستاندارتتى ەمەس تاسىلدەرى قاجەت»، – دەپ اتاپ ءوتتى سەنات توراعاسى.

ءۇشىنشىسى – ماسەلەنىڭ ءمان-ماڭىزىنا زەر سالۋ.

«قازىرگى شىندىققا سايكەس كەلە بەرمەيتىن اقپاراتتار جانە قوعامدىق سانانى مانيپۋلياتسيالاۋ داۋىرىندە سىرتقى كورىنىستەرگە ەمەس، ىشكى مازمۇنعا نازار اۋدارا وتىرىپ، قۇبىلىستار مەن پروتسەستەردىڭ ءمانىن ءتۇسىنۋ قاجەت»، – دەدى ماۋلەن اشىمباەۆ.

كەزدەسۋ بارىسىندا كلۋب مۇشەلەرى پرەزيدەنتتىڭ «جاڭا جاعدايداعى قازاقستان: ءىس-قيمىل كەزەڭى» اتتى جولداۋىن ىسكە اسىرۋعا قاتىستى ءوز ويلارىن ايتتى.

پىكىرتالاسقا قاتىسۋشىلار مەملەكەت پەن قوعامدى ودان ءارى جاڭعىرتۋ ءۇشىن زاڭنامالىق قىزمەتتە جاس سالالىق ساراپشىلاردىڭ الەۋەتىن پايدالانۋدىڭ ماڭىزى زور ەكەنىن اتاپ ءوتتى.

جاس ساراپشىلار كلۋبىنىڭ قۇرامىندا مەملەكەتتىك باسقارۋ، ەكونوميكا، قارجى، الەۋمەتتىك قولداۋ، سوت-قۇقىقتىق رەفورما، ءبىلىم بەرۋ، دەنساۋلىق ساقتاۋ جانە تسيفرلاندىرۋ سالالارى بويىنشا 30-دان استام مامان بار. كلۋبتىڭ الداعى وتىرىستارى وزەكتى قوعامدىق-ساياسي، ەكونوميكالىق جانە الەۋمەتتىك ماسەلەلەرگە ارنالادى.

قر پارلامەنتى سەناتىنىڭ ءباسپاسوز قىزمەتى

Abai.kz