ەرەۆان ازەربايجانعا قاراتا وق اتپاعانىن ايتتى. بىراق ازەربايجاننان جىكشىل ايماعى تاۋلى قاراباقتىڭ دە-فاكتو باسشىسى گياندجاعا ء"بىز شابۋىلدادىق" دەپ، ونداعى اسكەري اۋە بازاسىن كوزدەگەنىن ايتتى. ەكى ەلدىڭ تاۋلى قاراباقتاعى قاقتىعىسىنا ءبىر اپتا بولدى.
ازەربايجان قورعانىس مينيسترلىگىنىڭ سايتىندا جاريالانعان مالىمدەمەدە ەلدىڭ باتىسىنداعى 330 مىڭ تۇرعىنى بار گياندجا قالاسىنا جانە سونىڭ توڭىرەگىندەگى بىرنەشە اۋماققا زىمىران جانە سنارياد وعى جاۋعانى حابارلاندى. مالىمدەمەدە ازەربايجاننىڭ ء"تيىستى قارىمتا شارا قابىلداپ جاتقانى" ايتىلادى.
قورعانىس ءمينيسترى زاكير حاسانوۆ ارمەنيا تارابىنىڭ ازەربايجان تەرريتورياسىنا وق جاۋدىرۋىن "اشىق ارانداتۋ" دەپ اتاپ، ونىڭ اسكەري قيمىلدار اۋماعىن كەڭەيەتىنىن ايتتى.
مينيسترلىك ازەربايجاننىڭ تەرتەر جانە گوراديز قالالارىنىڭ دا نىساناعا الىنعانىن ايتتى.
قورعانىس مينيسترلىگى قارىمتا شارا دەپ نەنى ايتقانىن ناقتىلامادى. بىراق قاقتىعىس ايماعىندا جۇرگەن جۋرناليستەر تاۋلى قاراباقتىڭ باس قالاسى ستەپاناكەرتتە جارىلىستار بولىپ جاتقانىن حابارلادى.
"ازەربايجان كۇشتەرى ستەپاناكەرتتەگى بەيبىت تۇرعىنداردى زىمىراندارىمەن اتقىلاپ جاتىر" دەدى ارمەنيا قورعانىس مينيسترلىگىنىڭ ءباسپاسوز حاتشىسى ارتسرۋن وگانەسيان. بىراق تاۋلى قاراباقتىڭ دە-فاكتو باسشىسى ارايك ارۋتيۋنيان اسكەري كۇشتەرىنىڭ گياندجاداعى اسكەري اۋە بازاسىن جويدىق دەپ وتىر.
3 قازان كۇنى ازەربايجان پرەزيدەنتى يلحام اليەۆ اسكەرىنىڭ تاۋلى قاراباقتاعى بىرنەشە اۋىلدى باقىلاۋىنا العانىن مالىمدەگەن. اليەۆ تەرتەردەگى، دجەبرايلدەگى جانە فۋزۋليدەگى جەتى اۋىلدى "ازات ەتتىك" دەدى.
وگانەسيان ازەربايجاننىڭ جەتى اۋىلدى باقىلاۋىنا العانىن راستامادى، بىراق سول ايماقتا اۋىر شايقاستىڭ بولعانىن ايتتى.
ەكى تاراپ تا قارسىلاسىنىڭ زاردابىن اسىرە باعالاپ، اسكەري قاقتىعىسپەن قاتار اقپاراتتىق سوعىس جۇرگىزىپ وتىر.
تاۋلى قاراباق حالىقارالىق دەڭگەيدە ازەربايجان تەرريتورياسى سانالادى. بىراق ونى ەرەۆان قولداۋىنا يە ۇلتى ارميان سەپاراتيستەر باقىلاۋدا ۇستاپ وتىر. ارمەنيا كۇشتەرى تاۋلى قاراباق توڭىرەگىندەگى جەتى ايماقتى دا باقىلاپ وتىر.
Abai.kz
