قر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى م.تىنىشپاەۆ اتىنداعى قازاق كولىك جانە كوممۋنيكاتسيا اكادەمياسىن (الماتى ق.) باس ليتسەنزياسىنان ايىرۋ تۋرالى شەشىم قابىلدادى. بۇل تۋرالى مينيسترلىكتىڭ رەسمي سايتى حابارلادى.

شەشىم 10 جۇمىس كۇنى وتكەننەن كەيىن زاڭدى كۇشىنە ەنەدى، كەيىن جوعارى وقۋ ورنى ءبىلىم بەرۋ سالاسىنداعى قىزمەتىن توقتاتۋعا مىندەتتى بولادى.

جىل بويى اكادەميادا جوسپارلى جانە جوسپاردان تىس تەكسەرۋلەر جۇرگىزىلىپ، ءبىلىم بەرۋ سالاسىنداعى ورەسكەل بۇزۋشىلىقتار انىقتالدى. اتاپ ايتقاندا، وقۋ پروتسەسى پروفەسسورلىق-وقىتۋشىلىق قۇراممەن، وندىرىستىك پراكتيكا بازالارىمەن، وقۋ، وقۋ-ادىستەمەلىك جانە عىلىمي ادەبيەتتەرمەن قامتاماسىز ەتىلمەگەن. ءبىلىم بەرۋ باعدارلامالارى جۇمىس بەرۋشىلەردىڭ سۇرانىسىنا تولىق سايكەس كەلمەدى، بۇل تۇلەكتەردىڭ جۇمىسقا ورنالاسۋىنا دا اسەر ەتتى. «اتامەكەن» قر ۇكپ جۇرگىزگەن رەيتينگ بويىنشا اكادەميانىڭ ءبىلىم بەرۋ باعدارلامالارىنىڭ شامامەن 60% جۇمىس بەرۋشىلەردىڭ تالاپتارىنا سايكەس كەلمەيدى.

بۇعان دەيىن ءبىلىم جانە عىلىم مينيسترلىگىنە وسى ۋنيۆەرسيتەتتە «وقىعان» شەتەلدىك ستۋدەنتتەر دە جۇگىنگەن بولاتىن. ولار وقۋدىڭ اقىسىن تولەگەن، بىراق ءىس جۇزىندە اكادەميادا «وقىماعان» بولىپ شىقتى. ماتەريالدار ءتيىستى قۇقىق قورعاۋ ورگاندارىنا جىبەرىلدى.

«ءبىز اكادەميا يەلەرى قارسىلىق تانىتۋى مۇمكىن ەكەنىن  تۇسىنەمىز. ولار كوميتەتتىڭ شەشىمىنە سوت ءتارتىبى بويىنشا شاعىمدانۋعا قۇقىلى. ءبىز مەملەكەت باسشىسىنىڭ ساپالى ءبىلىم بەرۋدى قامتاماسىز ەتپەيتىن جوعارى وقۋ ورىندارىن جابۋ بويىنشا قويعان مىندەتتەرىن ىسكە اسىرۋعا ءتيىسپىز. ءبىرىنشى كەزەكتە، ستۋدەنتتەردىڭ ساپالى قىزمەت الۋ قۇقىقتارى مەن مۇددەلەرىن ەسكەرىپ جاتىرمىز. ولارعا الاڭداۋعا ەش سەبەپتەرى جوق. ءبىلىم الۋشىلار سول قالاداعى باسقا جوعارى وقۋ ورىندارىنا گرانتىن ساقتاي وتىرىپ، اۋىسا الادى، سونداي-اق اقىلى نەگىزدە وقىعاندار ءۇشىن دە وقۋ قۇنى ارتپايدى. اۋىسۋ ءۇشىن ولارعا سەمەستردىڭ اياقتالۋىن كۇتۋدىڭ قاجەتى جوق، ءبىز قازىردەن باستاپ باسقا جوو اۋىسۋعا رۇقسات بەردىك. سونىمەن قاتار ستۋدەنتتەردىڭ وقۋ ناتيجەلەرى دە ساقتالادى جانە اۋىسىپ بارعان جوعارى وقۋ ورنىندا ەسكەرىلەدى. بۇعان دەيىن 35 مىڭ ستۋدەنتى بار جوعارى وقۋ ورنى جابىلعاندا، بارلىق ستۋدەنتتەردى باسقا وقۋ ورنىندارىنا اۋىستىرۋ بويىنشا جۇمىس اتقارعان بولاتىنبىز، ياعني مۇنداي تاجىريبە بار. پروفەسسورلىق-وقىتۋشىلىق قۇرامدى جۇمىسقا ورنالاستىرۋ بويىنشا دا جۇمىس جۇرگىزىلەتىن بولادى»، – دەپ اتاپ ءوتتى قر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.

قازىرگى ۋاقىتتا  م. تىنىشپاەۆ اتىنداعى قازاق كولىك جانە كوممۋنيكاتسيا اكادەمياسىندا 5 مىڭنان استام ادام وقيدى. اكادەميادا وقۋ قۇنى – ءبىلىم بەرۋ باعدارلاماسىنا بايلانىستى 427 مىڭ تەڭگەدەن باستاپ 1,5 ملن تەڭگەگە دەيىن.

«قازاق كولىك جانە كوممۋنيكاتسيا اكادەمياسىنا قاتىستى تۇسكەن شاعىمدار ءبىر جىلدىڭ كولەمىندە تولاستاعان ەمەس. اكادەميانىڭ 30-شى جىلداردان باستاۋ العان تاريحىنا قاراماستان, ۋنيۆەرسيتەت باسشىلىعى وقۋ ورنىن وسى جاعدايعا جەتكىزدى. كەزىندە ءدال وسى جوعارى وقۋ ورنى تەمىرجول سالاسىن ساپالى كادرلارمەن قامتاماسىز ەتكەن بولاتىن. وكىنىشتىسى سول، قازىرگى تاڭدا بۇل ءبىلىم ورداسىندا بولاشاق مامانداردى ءتيىستى دەڭگەيدە دايارلاۋ بويىنشا تۇيتكىلدى ماسەلەلەر جەتەرلىك. مۇنداي جاعداي ەلدىڭ ەكونوميكاسى ءۇشىن ستراتەگيالىق ماڭىزدى سالاسىنا مامان دايىنداۋ بارىسىندا ورىن الماۋى ءتيىس. ءبىلىم بەرۋ باعىتتارى ۇقساس وقۋ ورىندارىنىڭ كۇش-جىگەرىن بىرىكتىرۋ قاجەت شىعار», – دەي كەلە، قر جوعارى وقۋ ورىندارى قاۋىمداستىعىنىڭ پرەزيدەنتى راحمان الشانوۆ سالا ماماندارىن دايارلاۋدى ساقتاپ قالۋدىڭ ماڭىزدىلىعىن اتاپ ءوتىپ.

اكادەمياداعى باكالاۆرياتتىڭ 8 باعىتى، ماگيستراتۋرانىڭ 6 باعىتى، دوكتورانتۋرانىڭ 4 باعىتى بويىنشا ليتسەنزيالار الماتى قالاسىنىڭ باسقا 30 جوعارى وقۋ ورنىندا بار.

«ماتەريالدىق-تەحنيكالىق ينفراقۇرىلىمنىڭ جانە ءبىلىم بەرۋ پروتسەسىن جۇزەگە اسىرۋعا سالىنعان ينۆەستيتسيالاردىڭ بولۋىن ەسكەرە وتىرىپ، قازاق كولىك جانە كوممۋنيكاتسيا اكادەمياسى بازاسىندا مەكتەپ نەمەسە كوللەدج قۇرۋ تۋرالى ۇسىنىستى قاراستىرۋعا بولادى. سونداي-اق ولار قالاداعى باسقا دا ۇقساس بەيىندەگى جوعارى وقۋ ورىندارىمەن بىرىگە الادى»، – دەدى قر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.

Abai.kz