قىرعىزستانداعى جالپىحالىقتىق ميتينگتەرگە قاتىستى اقوردا پىكىر ءبىلدىردى. اقوردانىڭ رەسمي پىكىرىن قازاقستان پرەزيدەنتىنىڭ ءباسپاسوز حاتشىسى بەرىك ءۋالي مىرزا «Facebook-تاعى» پاراقشاسىندا جاريالادى.

«قىرعىزستاندا بولىپ جاتقان وقيعالار – سول ەلدىڭ ىشكى ماسەلەسى. قازاقستاندا باۋىرلاس قىرعىزستانمەن ءوزارا ءداستۇرلى دوستىق قاتىناستاردى جانە ستراتەگيالىق سەرىكتەستىكتى نىعايتۋ اسا ماڭىزدى دەپ سانايدى.

سونىمەن قاتار كورشىلەس ەلدەگى احۋالدى تۇراقتاندىرۋ ءىسى قىرعىزستاننىڭ كونستيتۋتسياسى مەن زاڭدارىنا سايكەس جۇزەگە اسىرىلادى دەپ ۇمىتتەنەدى. قىرعىز حالقى ءوز مەملەكەتىنىڭ ۇزاق مەرزىمدى مۇددەسى ءۇشىن كۇردەلى جاعدايدان شىعۋدىڭ ءتيىمدى جولىن تابادى دەپ پايىمدايدى»، - دەپ جازدى بەرىك ءۋالي.

ايتا كەتەيىك، قىرعىزستاندا جالپىحالىقتىق تولقۋلار پارلامەنت سايلاۋىنىڭ قورىتىندىلارى جاريالانعاننان كەيى، كەشە باستالعان. قازىرگى ۋاقتا نارازى حالىق قاماۋداعى بىرنەش ساياساتكەردى بوساتىپ، پرەزيدەنت رەزيدەنتسياسى مەن پارلامەنت عيماراتىن باسىپ العان.

قاماۋدان بوساعاندار ىشىندە ەلدىڭ ەكس-پرەزيدەنتى المازبەك اتامباەۆ، ەكس-پرەمەر-مينيستر ساپار يسكاكوۆ، ەكس-دەپۋتاتتار سادىر جاپاروۆ پەن راۆشان جەەنبەكوۆتەر بار.

4 قازاندا قىرعىزستاندا جوگوركۋ كەڭەشتىڭ VII شاقىرىلىمىنا سايلاۋ ءوتتى. وعان 16 پارتيا قاتىستى. ولاردىڭ تەك تورتەۋى عانا 7 پروتسەنتتىك مەجەدەن ءوتتى.

جەڭىلگەن پارتيالار سايلاۋى كەزىندە اكىمشىلىك رەسۋرستاردىڭ كومەگىمەن ورەسكەل زاڭ بۇزۋشىلىقتاردىڭ ورىن العانىن مالىمدەدى.

Abai.kz