سەنات دەپۋتاتى ءابدالى نۇراليەۆ پرەمەر-مينيستر اسقار ءماميننىڭ اتىنا دەپۋتاتتىق ساۋال جولدادى. وندا سەناتور جامبىل وبلىسىنىڭ ديقاندارى كوتەرگەن سۋارمالى اعىن سۋ تۋرالى ماسەلەنى ارقاۋ ەتتى.

جامبىل وبلىسىندا پايدالاناتىن اعىن سۋ رەسۋرستارىنىڭ 80 پايىزى – كورشىلەس قىرعىز رەسپۋبليكاسىنىڭ اۋماعىنان باستاۋ الىپ، شۋ، تالاس ترانسشەكارالىق وزەندەرى ارقىلى بەرىلەدى. سەناتور وبلىستا سۋارمالى جەردىڭ كولەمى 229 700 گەكتار ەكەنىن ايتا كەلىپ، جۇزەگە اسىپ جاتقان اۋقىمدى شارالارعا قاراماستان، سۋمەن كامتاماسىز ەتۋ ماسەلەلەرى وتە وزەكتى ءارى شەكارالاس مەملەكەتتىڭ سۋ ساياساتىنا تاۋەلدى بولىپ قالعانىن مالىمدەدى.

«قازسۋشار» رەسپۋبليكالىق مەملەكەتتىك كاسىپورنى جامبىل فيليالىنىڭ مالىمەتى بويىنشا 2020 جىلى جالپى اۋدانى 122 مىڭ گا بولاتىن 1025,0 ملن. تەكشە مەتر سۋ ءۇشىن اۋىلشارۋاشىلىق تاۋار وندىرۋشىلەرىمەن سۋ جەتكىزۋ تۋرالى كەلىسىم جاساعان. الايدا، بيىلعى ءساۋىر ايىنان قىركۇيەك ايىنا دەيىن 79,6 مىڭ گەكتار القاپ 550,3 ملن. تەكشە مەتر سۋمەن قامتاماسىز ەتىلگەن. جوسپاردى ورىنداماۋدىڭ باستى سەبەبى ترانسشەكارالىق كوزدەردەن كەلەتىن سۋدىڭ جەتىسپەۋشىلىگى.

قازىرگى تاڭدا جامبىل وبلىستىق اۋىل شارۋاشىلىعى باسقارماسى ماماندارىنىڭ ەسەبى بويىنشا 2020 جىلدىڭ ۆەگەتاتسيالىق كەزەڭىندە سۋ كولەمىنىڭ تومەن بولۋ سالدارىنان وبلىستا بارلىعى جالپى قۇنى 1 ملرد. 300 ملن. تەڭگەنى قۇرايتىن 36,4 مىڭ توننادان استام ءونىم الىنىپ، شارۋالاردىڭ كۇنكورىس دەڭگەيىنىڭ تومەندەۋى ورىن الىپ وتىر.

سەناتور ءا.نۇراليەۆ وسى ايتىلعان ماسەلەلەردى ەسكەرە وتىرىپ، ۇكىمەت باسشىسىنا وڭىردەگى ترانسشەكارالارىق شۋ، تالاس وزەندەرىنىڭ سۋ قورلارىن ەكى مەملەكەت اراسىندا بولۋگە بايلانىستى بىرقاتار ۇسىنىسىن جولدادى. وندا:

1.قىرعىز رەسپۋبليكاسى اۋماعىنداعى سۋ قويمالارىنان ەلىمىزدىڭ سۋ تۇتىنىشىلارىنىڭ تاۋەلدىلىگىن ازايتۋ ماقساتىندا جامبىل وبلىسى اۋماعىندا شۋ، تالاس وزەندەرىنىڭ بويىندا جوسپارلانعان 3 جاڭا سۋ قويماسىنىڭ قۇرىلىسىنا 2021 جىلعا ارنالعان رەسپۋبليكالىق بيۋدجەتتەن قارجى ءبولۋ;

2.قازاقستان رەسپۋبليكاسى مەن قىرعىز رەسپۋبليكاسى اراسىنداعى كەلىسىم نەگىزىندە رەتتەلەتىن مەملەكەتارالىق سۋ كانالدارى ارقىلى سۋ بەرۋدىڭ كەلىسىلگەن كەستەلەرىن ورىنداۋ بويىنشا تەتىكتەر قۇرۋ، كەلىسىمدەردى پىسىقتاۋ;

3.شەكتەس مەملەكەتتەردەن كەلەتىن سۋ رەسۋرستارىنىڭ كولەمىن مونيتورينگتەۋ، سۋدى كەشەندى پايدالانۋ مەن قورعاۋدىڭ باسسەيندىك سحەمالارىن ناقتىلاۋ، جاڭارتۋ بويىنشا تسيفرلاندىرۋ شارالارىن قابىلداۋ كەرەك ەكەنى ايتىلعان.

سەنات دەپۋتاتى قالىپتاسقان جاعدايدىڭ ماڭىزدىلىعىنا بايلانىستى ۇسىنىستاردىڭ ەسكەرىلۋىن جانە قازاقستان رەسپۋبليكاسى ۇكىمەتى تاراپىنان ءتيىستى شارالار قابىلداۋدى سۇرادى.

دەپۋتاتتىق ساۋالعا سەنات دەپۋتاتتارى ءا.نۇراليەۆ، ق.قوجامجاروۆ، ءا.مامىتبەكوۆ، ب.ورىنبەكوۆ قول قويدى.

Abai.kz