تاجىكستاندا 11 قازاندا پرەزيدەنت سايلاۋى ءوتتى. ەلدىڭ بارلىق ايماعىندا سايلاۋ ۋچاسكەلەرى 6.00-دا اشىلىپ، 20.00-دە جابىلدى. بۇل تاجىكستاندا 1994 جىلدان بەرى وتكەن بەسىنشى پرەزيدەنت سايلاۋى.

ەلدىڭ ورتالىق سايلاۋ كوميسسياسىنىڭ توراعاسى باحتيور حۋدويورزودا سايلاۋ ءوتتى دەپ مالىمدەدى.

رەسمي اقپاراتقا سايكەس، تۇسكە دەيىن سايلاۋشىلاردىڭ 70,7 پروتسەنتى داۋىس بەرگەن.

وسك مالىمەتى بويىنشا، تاجىكستاندا 4 ملن 900 مىڭ 545 ادامنىڭ داۋىس بەرۋ قۇقىعى بار. ازاماتتاردىڭ جارتىسى رەسەيدە جانە قازاقستاندا جۇمىس ىستەپ ءجۇر.

تاجىكستاندا وتكەن پرەزيدەنت سايلاۋىنا بەس ەلدەن 145 حالىقارالىق باقىلاۋشى قاتىسقان. ولاردىڭ اراسىندا ەقىۇ-نىڭ 7 وكىلى دە بار.

سايلاۋعا بەس ۇمىتكەر قاتىستى.

ولار - كوممۋنيستىك پارتيا اتىنان ابدۋللوەۆ ميرودج ء(بىرىنشى رەت قاتىسىپ جاتىر). سوتسياليستىك پارتيا اتىنان گاففورزودا ابدۋحاليم ء(ۇشىنشى رەت). اگرارلىق پارتيا اتىنان لاتيفزودا رۋستام ء(بىرىنشى رەت), ەكونوميكالىق رەفورمالار پارتياسى اتىنان راحماتزودا رۋستام ء(بىرىنشى رەت), حالىقتىق-دەموكراتيالىق پارتيا اتىنان ەمومالي راحمون (بەسىنشى رەت).

ەمومالي راحمون 1994 جىلدان بەرى بيلىك تىزگىنىن ۇستاپ كەلەدى. 2016 جىلدىڭ 4 اقپانىندا تاجىكستاننىڭ كونستيتۋتسيالىق كەڭەسى ەمومالي راحمونعا شەكسىز سايلاۋعا تۇسۋگە مۇمكىندىك بەرەتىن وزگەرىستەردى زاڭدى دەپ تانىدى.

Abai.kz