90 جىلعا جۋىقتاعان تەرەڭ تامىرلى تاريحى، تولعاقتى تاعدىرى بار س.سەيفۋللين اتىنداعى قاراعاندى وبلىستىق اكادەميالىق قازاق دراما تەاترى  الەمدى جايلاعان قاتەرلى ىندەتكە قاتىستى التى ايلىق ۇزىلىستەن كەيىن 8 قازان كۇنى كورەرمەنىمەن قايتا قاۋىشادى. ارقانىڭ اقسارايى اتانعان قاراشاڭىراق ءوزىنىڭ 89-شى ماۋسىمىن ت.يبراگيموۆ پەن م.ءابىلدىڭ «جاس اباي» سپەكتاكلىمەن اشادى.

دانا ابايدىڭ بيىلعى 175 جىلدىق مەرەيتويىنا وراي ساحنالانعان بۇل پەساعا ۇلى جازۋشى م.اۋەزوۆتىڭ  «اباي جولى» رومانىنىڭ ءبىرىنشى تومىنداعى وقيعالار ارقاۋ بولعان.  ساعىنىشقا تولى جۇرەكپەن وقۋدان قايتىپ كەلگەن كەزدە ەستىگەن اكەنىڭ قاتال ۇكىمى،جاقىن جانداردىڭ جانىنا جارا سالعان ءىس-ارەكەتتەرى ابايدى ەرتە ەسەيتەدى.بالا ابايدىڭ دانا ابايعا اينالۋى...

ساكەن تەاترىنىڭ جاڭا قويىلىمى كورەرمەن كوڭىلىنە وي سالار كوركەمدىك شەشىمدەرگە تولى. اباي رولىندە تەاتردىڭ جاس اكتەرلەرى ا.جۇمامۇراتوۆ پەن ا.امانتاي. قۇنانباي رولىندە ارتيستەر ب.كيەكباەۆ پەن م.قويشىعارين.

سپەكتاكلدى قويعان رەجيسسەرى قر ەڭبەك سىڭىرگەن قايراتكەرى ن.جۇمانيازوۆ، قويۋشى-سۋرەتشىسى قر ەڭبەك سىڭىرگەن قايراتكەرى ە.تۇياقوۆ.

بيىلعى جىلدىڭ تاعى ءبىر مەرەيتويى وتىراردا تۋىپ، كۇللى الەمگە تانىلعان ۇلى ويشىل، فيلوسوف عالىم ءابۋ ناسىر ءال-ءفارابيدىڭ تۋعانىنا 1150 جىل تولۋى، وسى رەتتە ساكەن تەاترىندا جولتاي ءالماشۇلىنىڭ «عۇلاما عۇمىر» پەساسى دايىندالىپ جاتىر. پەسا ەجەلگى گرەك ويشىلدارى اريستوتەل مەن سوكراتتىڭ، پلاتوننىڭ فيلوسوفيالىق ءىلىمىن جالعاستىرۋشى ءال-ءفارابيدىڭ ونەگەلى ءومىرى مەن  عالىم رەتىندە قالىپتاسۋ جولىنا ارنالعان.  سپەكتاكلدى ساحنالاۋ ءۇشىن ش. ايتماتوۆ اتىنداعى حالىقارالىق سىيلىقتىڭ لاۋرەاتى، قازاق تەاتر ونەرىندەگى اكتەرلىك مەكتەپ پەن رەجيسسۋرا سالاسىنا ەلەۋلى ەڭبەك سىڭىرگەن رەجيسسەر قۋاندىق قاسىموۆ شاقىرىلعان بولاتىن.  قۋاندىق قۇلمامىرۇلى بۇعان دەيىن دە ساكەن تەاترىندا بىرنەشە سپەكتاكل قويعان.  ول وزىندىك قولتاڭباسى مەن رەجيسسەرلىك  تىڭ شەشىمدەرىمەن، اكتەردىڭ بارلىق قىرىن اشا الاتىن، كەز كەلگەن قويىلىم تاقىرىبىن بۇگىنگى كۇنمەن ورايلاستىرا بىلەتىن رەجيسسەر. قويۋشى-سۋرەتشىسى قر مادەنيەت قايراتكەرى قالتورە جۇماقۇلوۆ.

قىمباتتى تەاتر سۇيەر قاۋىم، «عۇلاما عۇمىر» سپەكتاكلىنىڭ پرەمەراسىن قازان ايىنىڭ 23-24-ءى كۇندەرى تەاتر ساحناسىنان تاماشالاي الاسىزدار.

قازان ايىنان باستاپ تەاتردىڭ باي دا مازمۇندى رەپەرتۋارىنان تراگەديالىق، كومەديالىق جانە تاريحي جانرداعى ءتۇرلى جاڭا قويىلىمدار دا كورەرمەن نازارىنا ۇسىنىلادى. سوڭعى ۋاقىتتارى ساحناعا دايارلانعان جاڭا سپەكتاكلدەر قاتارىندا ۇلتتىق كلاسسيكا جانە تاريحي تۋىندىلارمەن قاتار الەم دراماتۋرگتەرىنىڭ قالامىنان تۋعان شىعارمالار دا سونى رەجيسسەرلىك شەشىمدەرمەن، قويۋشى-سۋرەتشىلەردىڭ وي-قيالىنان تۋعان ساحنالىق بەزەندىرۋلەرمەن كورەرمەنىن وزىنە تارتادى.

ساكەن تەاترىنىڭ شىعارماشىلىق ۇجىمى زامانىمىزدىڭ زاڭعار جازۋشىسى مۇحتار اۋەزوۆتىڭ «تەاتر ادامنىڭ ىشكى جان-دۇنيەسىنە اسەر ەتىپ، ءبىزدىڭ ادامي قالپىمىزدى تاربيەلەيدى» دەپ بەرگەن جوعارى باعاسىنا ساي قالىڭ كورەرمەنىنە قىزمەت ەتۋ ءۇشىن تىڭ كۇش، سونى سەرپىلىسپەن 90 جىلدىق مەرەيتوي الدىنداعى ماۋسىمىن باستاپ وتىر. تەاتردى ساعىنعان كورەرمەندەرىن تەاتر دا ساعىندى، ەندەشە تەاتردان تابىلاسىزدار عوي دەگەن ۇمىتتەمىز.

Abai.kz