بۇگىن ءۇرجار اۋدانىنا قاراستى جاربۇلاق ەلدىمەكەنىندەگى ورتا مەكتەپتە ءسوز زەرگەرى، تاريحشى-ەتنوگراف زەينوللا سانىك اتىنداعى سىنىپتىڭ اشىلۋى ءوتتى.

بۇل تۋرالى بەلگىلى اقىن اقبەرەن ەلگەزەك فەيسبۋكتاعى پاراقشاسىندا جازدى.

سالتاناتتى شارانى “زەينوللا سانىك اتىنداعى مادەنيەت قورى” ۇيىمداستىردى.

زامان تالاپتارىنا ساي جاساقتالعان ادەبيەت كابينەتى 3,5 ملن. تەڭگەگە جاساقتالعان.

"سول سىنىپتا ءبىلىم الىپ، ارماندارىن ۇشتايتىن جاسوسپىرىمدەر ءۇشىن قۋاندىق. سونداي مۇمكىندىكتەر جاساعان قانات سانىك اعامىزعا، قانەكەڭنىڭ قاسىندا وسىنداي ۇلكەن شارۋالاردى تىڭعىلىقتى ۇيىمداستىرىپ جۇرگەن اقىن سەرىك قاليەۆ پەن جارقىن سالەنۇلى مىرزالارعا ءدان ريزا بولدىق...

قور بيىل جارتى ميلليونعا جۋىق قارجى جۇمساپ، ۇزدىك وقۋشىلارعا اتالارىنىڭ اتىنداعى شاكىرتاقى تاعايىنداپتى. شاكىرتاقىسىن العان وقۋشىلاردىڭ بال-بۇل جايناعان جۇزدەرىن كورگەن ادام “ە، ءار قالتالى ادامنىڭ قولىنان كەلەتىن شارۋا عوي، وستىسە بولادى عوي” دەپ ريزا كوڭىلمەن ويلانىپ قالار ەدى. وسىنداي يگى جۇمىستار قازاقتىڭ ىشىندە كوپ بولسىنشى!.." - دەيدى قالامگەر ءوز جازباسىندا.

ايتا كەتەيىك، زەينوللا مۇباراكۇلى سانىك 1935 جىلى قىتايدىڭ تارباعاتاي ايماعىندا دۇنيەگە كەلگەن. پەكين قالاسىنداعى ورتالىق جاستار ينستيتۋتىن ءبىتىرىپ، ەڭبەك جولىن باسپاگەرلىكتەن باستاعان. ۇرىمجىدەگى جاستار باسپاسىندا جاۋاپتى رەداكتور بولىپ قىرىق جىلداي قىزمەت اتقارعان. 1955 جىلدان باستاپ ادەبي زەرتتەۋ جۇمىستارىن جازا باستاعان. سول ۋاقىتتا قىتايدا جۇرگىزىلگەن “مادەني توڭكەرىستىڭ” اۋىر سوققىسىنا ۇشىراپ، “حالىق جاۋى” بولىپ، اۋىر كۇندەردى دە وتكەرگەن.

سوعان قاراماستان، قالامگەردىڭ عىلىمي ەڭبەكتەرىنەن، رومان، پوۆەستەرىنەن قۇرالعان جيىرمادان استام كىتابى جارىق كورگەن. قازاقستاندا “قاراكەرەي قابانباي”، “حاس باتىر قابانباي”، “تۇعىرىل حان”، “دەمەجان باتىر”، حالىق كۇيشىسى قايراقباي”، “باسپاي” اتتى كىتاپتارى مەن ەڭبەكتەرى جاريالانعان.

Abai.kz